မဲခေါင်၊ ဧပြီ ၃
ရှမ်းပြည်တောင်ပိုင်း၊ ဆီဆိုင်မြို့ကို ဒေသခံတွေ ဝင်တာမှာ မိုင်းနင်းမိတဲ့ ဖြစ်စဉ်တွေရှိနေတာဖြစ်တဲ့အပြင် စစ်ကောင်စီက မနေ့ကအထိ လက်နက်ကြီးနဲ့ ပစ်ခတ်နေဆဲဖြစ်တာကြောင့် ပြည်သူလူထုတွေ မလိုလားအပ်တဲ့ ထိခိုက်မှုမရှိအောင် မြို့ထဲကို ပြန်မဝင်ကြဖို့ PNLO ပြောရေးဆိုခွင့်ရှိသူက မေတ္တာရပ်ခံထားပါတယ်။
“မြို့ထဲမှာက တော်လှန်ရေးအင်အားစုတွေလဲရှိတယ်၊ စစ်ကောင်စီတွေလဲရှိတယ်ပေါ့နော်၊ မြို့တွင်းမှာ တိုက်ပွဲဖြစ်ပွားနေတဲ့ အနေအထားဖြစ်ပါတယ်၊ မြို့တခုလုံး တစ်မြို့လုံးက စစ်ဇုံထဲမှာကျရောက်နေပါတယ်၊ ဒေသခံ ၂ ဦး မိုင်းနင်းမိတာ ကျနော်တို့လဲကြားရတယ်၊ အဓိကက ပစ္စည်းတွေ ပြန်သယ်ရင်း ပြန်ကြည့်ရင်းနဲ့ထိတယ်လို့ ကျနော်တို့ကြားရတယ်၊ ဒါကြောင့် ကျနော်တို့က မေတ္တာရပ်ခံနေရတာ ဖြစ်ပါတယ်၊ မြို့ထဲကို ပြန်လို့ရတဲ့ အခြေအနေ မဟုတ်သေးပါဘူး” လို့ ခွန်ရိန်းယံက မဲခေါင်ကို ပြောပါတယ်။
မြို့ထဲမှာ စစ်ကောင်စီက လက်နက်ကြီးတွေနဲ့ ပစ်ခတ်နေဆဲဖြစ်ပြီး စစ်ကောင်စီတွေက ထောင်ထားတဲ့ မြေမြုပ်မိုင်းတွေ အများအပြားရှိနေသေးသလို မပေါက်ကွဲသေးတဲ့ လက်နက်ကြီးကျည်တွေလဲရှိနေတဲ့ အနေအထားမှာ ဖြစ်လို့ ပြည်သူတွေက PNLO ရဲ့တရားဝင် ထုတ်ပြန်မှုကို စောင့်ကြည့် လိုက်နာကြဖို့ တိုက်တွန်းပါတယ်။
သတင်းတု သတင်းမှားတွေကို ယုံပြီး မြို့ထဲကို အရဲ့စွန့် ဝင်ယူတာမျိုးတွေ လုပ်တဲ့အခါမှာ မလိုလားအပ်တဲ့ ထိခိုက်မှုမျိုးတွေဖြစ်နေတာကို စိတ်မကောင်းဖြစ်ရလို့ တရားဝင်ထုတ်ပြန်ချက်ကို စောင့်ကြည့်လိုက်နာကြဖို့ အထူး(အထူး)မေတ္တာရပ်ခံကြောင်း တိုက်တွန်းပြောကြားပါတယ်။
ဆီဆိုင်မြို့ကို ယမန်နေ့ ဧပြီလ ၁ ရက်က ပြန်သူ ၂ ဦး မိုင်းနင်းမိပြီး တဦးက ခြေထောက်ဖြတ်ရတဲ့အထိ ဖြစ်ခဲ့ရပါတယ်။ မြို့အတွင်း နေရာအနှံ့အများအပြားမှာ မပေါက်ကွဲသေးတဲ့ ဗုံးလက်နက်ကြီးကျည်တွေ ရှိနေသေးတာကို မြေပြင်သတင်းဓာတ်ပုံတွေအရ သိရပါတယ်။
“ပြန်သာပြန်ရတာ မြို့ထဲမှာ လက်နက်ကြီးက ပစ်နေတာ၊ ပြန်နေဖို့တော့ မရသေးဘူး၊ အခြေအနေကလဲ မပေးသေးဘူး၊ အိမ်ပြန်ကြည့်တာနဲ့ ကျန်တာလေးတွေ ယူတာပဲ ရှိပါတယ်၊ အမြန်သွား အမြန်ထွက်လာရတယ်” လို့ ဆီဆိုင်မြို့ အောင်ချမ်းသာရပ်ကွက်က ဒေသခံတစ်ဦးက မဲခေါင်ကို ပြောပါတယ်။
ပြီးခဲ့တဲ့ ဇန်နဝါရီလ ၂၃ ရက်က မတ်လ၃၁ ရက်အတောအတွင်းမှာ ဆီဆိုင်မြို့ရဲ့ ၃ ပုံ ၂ ပုံဟာ လေယာဉ်ရဲ့ ပေါင် ၅၀၀ ဗုံးတွေ၊ လက်နက်ကြီးကျည်တွေ ၊ ဒရုန်းဗုံးတွေအပြင် ယခု မိုင်းတွေနဲ့ပါ ဖျက်ဆီးခံရတာဖြစ်ပြီး လူဦးရေ ၆၅၉၀၀ ဦးဟာ ဆီဆိုင်မြို့ကို စွန့်ခွာထွက်ပြေးပြီး စစ်ဘေးရှောင်နေရတာဟာ ယခုချိန်ထိဖြစ်လို့ စားဝတ်နေရေးတွေ အလွန်ခက်ခဲနေပြီး အထောက်အပံ့တွေ လိုအပ်နေတယ်လို့ စစ်ဘေးရှောင်တွေထံက သိရပါတယ်။
MK-012