မဲခေါင်၊ ဖေဖော်ဝါရီ ၁၃
ရှမ်းပြည်တောင်ပိုင်း၊ ဆီဆိုင်မြို့နယ်အတွင်းက စစ်ဘေးရှောင်ပြည်သူတွေဟာ စနစ်တကျသတ်မှတ်ထားတဲ့ စစ်ရှောင်စခန်းတွေမရှိတဲ့အတွက် ကိုယ်၀န်ဆောင်တွေကအစ သက်ကြီးရွယ်အို ၊ ကလေးငယ်တွေအဆုံး ဘ၀ရပ်တည်မှုခက်ခဲလာနေတယ်လို့ စစ်ရှောင်ပြည်သူတွေက ပြောကြပါတယ်။
ပြီးခဲ့တဲ့ ဇန်နဝါရီ ၂၄ ရက် စခဲ့တဲ့ ဆီဆိုင်မြို့တိုက်ပွဲစတဲ့နေ့ကနေ ဆီဆိုင်မြို့ပေါ် ၆ ရပ်ကွက်မှ ပြည်သူတွေအပြင် မြို့နယ်ထဲက ကျေးရွာတွေ၊ ပင်လောင်းဘက်က ပြည်သူတွေအားလုံးပေါင်း ၆ သောင်းကျော်ဟာ ယနေ့အထိ စစ်ရှောင်နေရဆဲဖြစ်ပါတယ်။
အဓိက က တောင်ကြီးနဲ့ ကက္ကူဘက် ဖြစ်ပြီး ကက္ကူဘက်ကို အများဆုံးသွားရောက်ကြကာ ဒုတိယက တောင်ကြီးဘက်ကိုရောက်ရှိပြီး မြို့ပေါ် ဘုန်းကြီးကျောင်းအားလုံးနီးပါး ခိုလှုံနေကြတာဖြစ်ပါတယ်။
အေးသာယာ၊ ရွှေညောင်၊ ညောင်ရွှေ၊ ဟိုပုံးနဲ့ ကျေးရွာတွေမှာလည်း ရောက်ရှိခိုလှုံ နေကြတာဖြစ်သော်လည်း နေစရာရှိပေမယ့် စားစရာနဲ့ အခြားလိုအပ်ချက်တွေ အများအပြားရှိနေတာဖြစ်ပြီး ရက်ကြာလာတာနဲ့အမျှ ၀င်ငွေမရှိလို့ဒုက္ခရောက်လာကြပြီလို့ ဆိုကြပါတယ်။
အထူးသဖြင့် ကိုယ်၀န်ဆောင်မိခင်နဲ့ မွေးကင်းစကေလေးတွေ အတွက် ပိုမိုတဲ့ခက်ခဲမှုတွေရှိနေသလို မီးဖွားဖို့အတွက်ပါ အရမ်းခက်ခဲနေကြတာတွေရှိတာ၊ သက်ကြီးရွယ်အိုတွေ စစ်ရှောင်ရင်း လူကွဲပျောက်ဆုံးတာတွေ အများအပြားရှိနေတာဖြစ်လို့ ကျန်းမာရေးစောင့်ရှောက်မှုအတွက် လိုအပ်နေတယ်လို့ ဆိုပါတယ်။
စစ်ရှောင်စာရင်းမှာ ယေဘူယျအားဖြင့် ကက္ကူ ၃၀၀၀ ခန့်၊ တောင်ကြီး ၁၅၀၀ ခန့်၊ နီးရွာတောတောင်တွေမှ ဆီဆိုင်မြို့ ၆ ရွာမှ ၁၅၀၀၀ ခန့်နဲ့ တိုက်ပွဲဧရိယာအတွင်းကျရောက်တဲ့ ရွာတွေက ၂၀၀၀၀ ခန့်ရှိနေတယ်လို့ သိရပါတယ်။
MK-012
#MeKongNews
#ဆီဆိုင်
#စစ်ရှောင်
#ခက်ခဲ
#ကြာမြင့်