မဲခေါင်၊ ဖေဖော်ဝါရီ ၇

ရှမ်းပြည်တောင်ပိုင်း၊ ဆီဆိုင်မြို့နယ်တွင် ဖြစ်ပွားနေသည့် စစ်ကောင်စီနဲ့လက်အောက်ခံပြည်သူ့စစ် PNO တို့ရဲ့ လက်နက်ကြီးပစ်ခတ်မှုကြောင့် ထီတမောင်းဘုန်းတော်ကြီးကျောင်း ပျက်စီးသွားတယ်လို့ သိရပါတယ်။

ဒီနေ့မှာ ဖေဖော်ဝါရီ ၇ ရက် မနက်ပိုင်းက ဆိုက်ခေါင်ဘက်က ပစ်တဲ့စစ်ကောင်စီရဲ့ လက်နက်ကြီးကျည်ကျရောက်ပေါက်ကွဲမှုက ထီးတမောင်းဘုန်းကြီးကျောင်းရဲ့ ဇရပ်၊ ဓမ္မာရုံတွေ ပျက်စီးသွားစေခဲ့တယ်လို့ ဒေသခံများထံက သိရပါတယ်။

“ရဟန်းသံဃာနဲ့ကိုရင်တွေ ထိခိုက်မှုတော့ မသိရသေးဘူး” လို့ အဲ့ဒီ့ဒေသခံက ပြောပါတယ်။

ဆီဆိုင်မြို့ကို လေယာဉ်နဲ့ဗုံးကြဲခြင်း၊ ဒရုန်းဗုံးများကြဲချခြင်းနဲ့ အဝေးက လက်နက်ကြီးကျည်ပစ်ခတ်မှုများကြောင်း ယခုကျောင်းအပါအ၀င် ဘုန်းကြီးကျောင်း ၆ ကျောင်း၊ ဓမ္မာရုံ ၁ ခု၊ ခရစ်ယန်ချပ်ချ် ၁ခုနဲ့ စာသင်ကျောင်း ၁ကျောင်းတို့ ပျက်စီးခဲ့ရပြီဖြစ်သည်။

စစ်ကောင်စီအနေနဲ့ ဘာသာရေးအဆောက်အဦတွေ၊ စာသင်ကျောင်းတွေနဲ့ အများပြည်သူ ခိုလှုံရာနေရတွေကို ညှာတာမှုကင်းမဲ့စွာ ပစ်ခတ်တိုက်ခိုက်နေတာဟာ စစ်ရာ၀တ်မှုတွေကို ကျူးလွန်နေတာ ဖြစ်လို့ စစ်ရေးဆိုင်ရာပစ်မှတ်မဟုတ်တာတွေကို တိုက်ခိုက်နေတဲ့ စစ်ရာဇ၀တ်ကောင်တွေအနေနဲ့ အပြည်ပြည်ဆိုင်ရာ တရားရုံးကို တင်ဖို့ ပြည်တွင်းပြည်ပ အဖွဲ့အစည်းတွေက ထိထိရောက်ရောက် တရားစွဲလုပ်ငန်းလုပ်ကိုင်ဖို့လိုတယ်လို့ အထက်မြန်မာပြည်နိုင်ငံရေး အကျဉ်းသားများကွန်ရက် (POPUB) အဖွဲ့၀င် ၁ဦးက မဲခေါင်ကို ပြောပါတယ်။

`စစ်ကောင်စီရဲ့ လူမဆန်မှုယုတ်မာကြမ်းကြုတ်မှုကတော့ နောင်ဥဒါန်းမကျေစရာတွေချည့်ပါပဲ၊ နောက်ကိစ္စထက် အခုဖြစ်နေတာတွေကို ပြည်တွင်းပြည်ပ အဖွဲ့အစည်းတွေကရော ပြည်ပနိုင်ငံတွေကပါ ထိထိရောက်ရောက် အမြန်ဆုံး အရေးယူဆောင်ရွက်ပေးဖို့ လိုမယ်’ လို့ပြောပါတယ်။

စစ်ကောင်စီရဲ့ စစ်ရာဇ၀တ်မှုတွေကျူးလွန်မှုများအနက် ဘာသာရေးနဲ့ ပညာရေးအဆောက်အဦတွေကို အဓိကပစ်မှတ်ထားတိုက်ခိုက်ခဲ့တာမှာဘာသာရေးနဲ့ စာသင်ကျောင်း ၁၉၉ ကျောင်းပျက်စီးခဲ့ပြီလို့ အမျိုးသားညီညွတ်ရေးအစိုးရ NUG က ဖေဖော်ဝါရီ ၆ ရက်က ထုတ်ပြန်ထားပါတယ်။

MK-012

#MeKongNews

#စစ်ကောင်စီ

#ဘုန်းကြီးကျောင်း

#လက်နက်ကြီး

#ပျက်စီး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)