မဲခေါင်၊ ဖေဖော်ဝါရီ ၁၄
ရှမ်းပြည်တောင်ပိုင်းမှာရှိတဲ့ စစ်ကောင်စီလက်အောက်ခံ PNO ပြည်သူ့စစ်က စစ်ကောင်စီထံက အလကားရတဲ့လက်နက်တွေကို ၁ လက် ကျပ် သိန်း ၁၆၀ နဲ့ ရွာတွေဆီက ကောက်ခံနေတယ်လို့ ဒေသခံတွေဆီက သိရပါတယ်။
PNO ထိန်းချုပ်ရွာတွေမှာ တစ်ရွာ ၅ ယောက် ပြည်သူ့စစ်ထဲ မ၀င်မနေရ လူသစ်စုနေသလို စစ်သင်တန်း ၁၀ ရက်ပေးပြီး စစ်တပ်ပေးတဲ့ သေနတ်တွေကို တစ်လက် သိန်း ၁၆၀ နဲ့ ၅ ယောက်စာ ကျပ်သိန်း ၈၀၀ ပေးဖို့ ကောက်ခံနေတာလို့ သိရပါတယ်။
ဒီအတိုင်း ၁၆၀ လုံး တပ်ကိုပြန်ပေးရတာလား၊ သူတို့ယူတာလား မသိဘူး၊ ပေးတာတော့ ပေးနေရတယ်၊ ၀င်ငွေမရှိတဲ့ကြားက လူလဲပေးရ၊ ထမင်းလဲကျွေးရ၊ သေနတ်ဖိုးလဲပေးရ ယူနီဖောင်းဖိုးလဲပေးရနဲ့ ပေးစရာလဲ မရှိလည်း ရှာပေးရ ၊ စားဖို့တောင် ငတ်လာလို့ ဖြစ်နေတဲ့စစ်တွေ မြန်မြန်ပြီး စေချင်ပါပြီလို့ လဲသက်အုပ်စုကျေးရွာတစ်ရွာက ပအို၀်းဒေသခံတစ်ဦး က ပြောပါတယ်။
လဲသပ်ကျေးရွာအုပ်စုအနီး ဝ တပ်ဖွဲ့ UWSA အဖွဲ့တွေလည်း ရှိပြီး PNO ပြည်သူ့စစ်က လူသစ်စုတာ၊ ငွေတောင်းတာတွေလုပ်နေတာလို့ ဆိုပါတယ်။ ဟိုပုံးမြို့နယ် နောင်ဒေးကျေးရွာ အုပ်စုမှာလည်း PNO ပြည်သူ့စစ်က လက်နက်ဖိုးငွေတာင်းတာတွေ ရှိတယ်လို့ ဒေသခံတွေက ပြောပါတယ်။
အဆိုပါ ကျေးရွာအုပ်စုအတွင်းရှိတဲ့ မှော်ဘီ၊ မောက်လွစ်ကျေးရွာ အနီး၀န်းကျင်တွေမှာ ရှမ်းတပ်တွေဖြစ်တဲ့ RCSS နဲ့ SSPP တို့ရှိနေကြသလို UWSA တပ်ဖွဲ့တွေလည်းရှိ နေတယ်လို့ သိရပါတယ်။
ယင်းကျေးရွာအုပ်စုတွေက ဒေသခံတွေဟာ PNO ရဲ့ ဆင့်ခေါ်မှုတွေ အပြင် အနီးနားက လက်နက်ကိုင်တွေရဲ့ တောင်းဆိုမှုတွေကို ဖြည့်ဆည်းပေးနေရလို့ အခက်အခဲများစွာ တွေ့ကြုံနေရတယ်လို့ သိရပါတယ်။
ပြီးခဲ့တဲ့ ဖေဖော်ဝါရီ ၂ ရက်နေ့က ပြုလုပ်တဲ့ ပြည်သူ့စစ်လက်နက်တပ်ဆင်ပွဲမှာ အင်အား ၁ သိန်းကျော် လက်နက်တပ်ဆင်ပြီးပြီလို့ PNO က ပြောကြားထားပါတယ်။
MK-012
