မဲခေါင်၊ ဖေဖော်ဝါရီ ၂၈
ရှမ်းပြည်နယ်တောင်ပိုင်း၊ ဆီဆိုင်မြို့နယ်က နားခိုက်ကျေးရွာကို စစ်ကောင်စီက တိုက်ပွဲဖြစ်ပွားတာမရှိဘဲ လေယာဉ်နဲ့ဗုံးကြဲလို့ ပြည်သူ ၁ ဦးသေဆုံးပြီး နေအိမ် ၄ လုံး ထိခိုက်ပျက်စီးရတယ်လို့ ယနေ့ ဖေဖော်ဝါရီ ၂၈ ရက်မှာ PNLA က ထုတ်ပြန်ကြေငြာပါတယ်။
ယနေ့မနက် ၉နာရီခွဲအချိန်မှာ စစ်ကောင်စီဟာ နားခိုက်ကျေးရွာအပေါ်ကို ၈ကြိမ်တိုင်တိုင် ဗုံးကြဲတိုက်ခိုက်ခဲ့တဲ့အပြင် လေယာဉ်ပေါ်က စက်သေနတ်ပစ်ခတ်တိုက်ခိုက်ခဲ့တာဖြစ်ပြီး ယင်းတိုက်ခိုက်မှုကြောင့် နားခိုက်ရွာက အသက် ၆၃ အရွယ် ဖြားခွန်ဆိုသူ သေဆုံးပြီး နေအိမ် ၄ လုံးနဲ့ ရွာစာသင်ကျောင်း တံခါးပြတင်းတွေ ထိခိုက်ပျက်စီးခဲ့ရတယ်လို့ အဆိုပါသတင်းစဉ်မှာ ပါရှိပါတယ်။
အဆိုပါကျေးရွာမှာ ပအိုဝ်းအမျိုးသားလွတ်မြောက်ရေးတပ်မတော် PNLO က တပ်စွဲထားခြင်းမရှိသလို မြေပြင်တိုက်ပွဲတွေလည်းမရှိပဲ စစ်ကောင်စီက အကြောင်းမဲ့တိုက်ခိုက်ခဲ့တာဖြစ်လို့ လူမဆန်တဲ့လုပ်ရပ်ဖြစ်တယ်လို့ ဆိုပါတယ်။
ပြီးခဲ့တဲ့ တမြန်မနေ့ ဖေဖော်ဝါရီ ၂၆ ရက်ကလည်း ဟိုပုံးမြို့နယ် စငေါကျေးရွာအုပ်စု တဖူကဲင်းကျေးရွာကို စစ်ကောင်စီက ဗုံးကြဲခဲ့လို့နေအိမ် ၁ လုံး ပျက်စီခဲ့ရတယ်လို့လည်း ပါရှိပါတယ်။
မြေပြင်တိုက်ပွဲတွေမှာ အထိနာနေတဲ့စစ်ကောင်စီဟာ စစ်ရာဇဝတ်မှုနဲ့ လူ့အခွင့်အရေးကျင့်ဝတ်တွေကို ပေါ်ပေါ်တင်တင် ကျူးလွန်ဖောက်ဖျက်နေကာ ပြည်သူကို ရန်သူသဖွယ်တိုက်ခိုက်နေတာ ဖြစ်လို့ ပြည်သူတွေအနေနဲ့ စစ်ကောင်စီရဲ့လေကြောင်းရန်က ကာကွယ်ဖို့ ဗုံးခိုကျင်းတွေ ကိုယ်စီတူးထားကြရန် တိုက်တွန်းတယ်လို့ ပြောပါတယ်။
လက်ရှိအချိန်ဟာ စစ်အာဏာရှင်စနစ်ကို ပြည်သူတရပ်လုံးက ဝိုင်းဝန်းတိုက်ဖျက်နေချိန်ဖြစ်လို့ စစ်ကောင်စီလက်အောက်ခံပြည်သူ့စစ်တွေအနေနဲ့ စစ်အာဏာရှင်ကာကွယ်ပေးနေရတဲ့ လုပ်ရပ်တွေကို ဦးနှောက်ကြီးကြီးနဲ့ သေချာသုံးသပ်စဉ်းစားပြီး စစ်အာဏာရှင်စနစ်အောက်က ရုန်းထွက်ကာ အမျိုးသားလွတ်မြောက်ရေးလမ်းကြောင်းပေါ်ကို အမြန်ဆုံးကူးပြောင်းကြဖို့ တိုက်တွန်းထားပါတယ်။
MK-012