မဲခေါင်၊ ဖေဖော်ဝါရီ ၂၀
မွန်ပြည်နယ်၊ ရေးမြို့နယ်မှာရှိတဲ့ အမှတ်(၁၉) စစ်ဆင်ရေးကွပ်ကဲမှုဌာနချုပ် (စကခ ၁၉) တပ်ရင်းဝန်းထဲရှိ အရာရှိအိမ်ယာကို Fixed Winds Drone အဖွဲ့က ဖေဖော်ဝါရီ ၁၉ နေ့လယ်ပိုင်းက ဒရုန်းနဲ့ဗုံးကြဲ တိုက်ခိုက်ခဲ့တယ်လို့ ထုတ်ပြန်ပါတယ်။
ဒေါနစစ်ကြောင်းနဲ့အတူ ရေးပြောက်ကျားတပ် (ဒေါနတပ်ခွဲ-၃) တို့က တိုက်ခိုက်ခဲ့တာကြောင့် ပစ်မှတ်ကို ထိမှန်ပေါက်ကွဲခဲ့ပြီး လူနာတင်ယာဥ်တစ်စီးနဲ့ လာရောက်သယ်ထုတ်သွားခဲ့တယ်လို့ ဆိုပါတယ်။
ထိခိုက်သေဆုံးမှုကိုတော့ အတိအကျမသိရသေးဘဲ စစ်ကောင်စီဘက်က လက်နက်ကြီးတွေနဲ့ အချက် ၅၀ လောက် ပြန်ပစ်ခဲ့တယ်လို့ ရေးပြောက်ကျားအဖွဲ့ ထုတ်ပြန်ချက်က ဆိုပါတယ်။
စစ်ကောင်စီရဲ့လက်နက်ကြီးကြောင့် ဗုံးကြဲတဲ့ Fixed Wing Drone ရဲ့ လေယာဥ်ထိမှန်ခဲ့ပြီး ပျက်စီးခဲ့တယ်လို့ ဒရုန်းအဖွဲ့က ဒီနေ့ ဖေဖော်ဝါရီ ၂၀ မှာ ထုတ်ပြန်အသိပေးပါတယ်။
ရေးပြောက်ကျားတပ် (ဒေါနတပ်ခွဲ-၃) ဟာ ဖေဖော်ဝါရီ ၁၃ ရက်နေ့ကလည်း ရေးမြို့နယ်၊ လမိုင်းမြို့နယ်ခွဲ၊ မော့ကနင်ကျေးရွာအခြေစိုက် စစ်ကောင်စီ ခလရ-၁၀၆ တပ်ရင်း ဗဟိုကင်းကို ကိုက် ၃၀၀ အကွာကနေ RPG နဲ့ ပစ်ခတ်တိုက်ခိုက်ခဲ့ပါသေးတယ်။