မဲခေါင်၊ ဇန်နဝါရီ ၂၅
ကရင်နီပြည်နယ်မှာရှိတဲ့ စစ်ကောင်စီတပ်ရင်းတွေအနေနဲ့ ပြည်သူ့ဘက်ကို ဘက်ပြောင်းခိုလှုံဖို့အတွက် ကရင်နီအမျိုးသားများကာကွယ်ရေးတပ် -KNDF က ဇန်နဝါရီလ ၂၄ ရက်နေ့က တိုက်တွန်းထားပါတယ်။
ကရင်နီပြည်မှာ ၂ နှစ်ကျော်ကာလအတွင်း စစ်ကောင်စီတပ်ရဲ့ တပ်မ ၅၅နဲ့ တပ်မ ၆၆ လက်အောက်ရှိ တပ်ရင်းတွေနဲ့ ပြည်သူ့ကာကွယ်ရေးတပ်တွေကြား တိုက်ပွဲတွေပြင်းထန်နေပြီး စစ်ကောင်စီဘက်က အများအပြားသေဆုံးတဲ့အပြင် လက်နက်ချအညံ့ခံသူတွေလည်း ရှိတယ်လို့သိရပါတယ်။
တပ်ရင်းတချို့က ပြည်သူ့နေအိမ်တွေ မီးရှို့ဖျက်ဆီးတာ၊ အစုလိုက်အပြုံလိုက်သတ်ဖြတ်တာ၊ စစ်ရာဇဝတ်မှုကိုကျူးလွန်တဲ့သူတွေကို ချေမှုန်းဖို့ပြင်ဆင်ထားပြီး လက်နက်ချအညံ့ခံသူတွေကိုတော့ စစ်သုံ့ပန်းအဖြစ် နိုင်ငံတကာ ဥပဒေနဲ့အညီ ထိန်းသိမ်းထားတယ်လို့ဆိုပါတယ်။
“ ကျွန်တော်တို့က စစ်ဆင်ရေးတွေကို အပြီးသတ်လုပ်ဆောင်မှာဖြစ်တယ်။ အပြီးသတ်ချေမှုန်းမှာဖြစ်တယ်။ ဒါကြောင့် စစ်ကောင်စီတပ်ဖွဲ့အနေနဲ့ အာဏာရှင်စနစ်ကို ကာကွယ်မယ့်အစား သူတို့ဘက်က ဘက်ပြောင်းခိုလှုံမယ်ဆိုရင် အထိအခိုက်နည်းမယ်။ သွေးထွက်သံယိုနည်းမယ်။ ပြည်သူတွေရဲ့တိုင်းပြည်အေးချမ်းရေးနဲ့ ဖက်ဒရယ်ဒီမိုကရေစီပြည်ထောင်စု ဆောင်ရွက်ရေးတွေမှာ ပူးပေါင်းဆောင်ရွက်နိုင်ဖို့ ရည်ရွယ်တာဖြစ်တယ်” လို့ KNDF တပ်က ပြန်ကြားရေးတာဝန်ရှိသူ တယောက်က ပြောပါတယ်။
ဘက်ပြောင်းခိုလှုံလာသူတွေအနေနဲ့ လက်ရှိရာထူးရာခံများအတိုင်း တော်လှန်ရေးအစိုးရဘက်မှာ တာဝန်ပြန်လည်ထမ်းဆောင်နိုင်အောင် စီမံပေးပြီး ကရင်နီပြည်နယ်မှာရှိတဲ့ ခြေမြန်တပ်၊ ခြေလျင်တပ်၊ အမြောက်တပ်က တပ်သားတွေက မိသားစုနဲ့အတူ ပြည်သူ့ဘက်ကို ဘက်ပြောင်းခိုလှုံလာရင်ဖြစ်စေ၊ တပ်ရင်းအလိုက် ခိုလှုံလာရင်ဖြစ်စေ ကြိုဆိုနေပြီး ဘက်ပြောင်းရေးအစီအမံအတိုင်း အထူးအကျိုး ခံစားခွင့်များကို စီမံဆောင်ရွက် ပေးမယ်လို့ ဆိုပါတယ်။
ကရင်နီပြည်နယ်အတွင်း တစ်ပြိုင်တည်း စုပေါင်းဘက်ပြောင်းမှု အစီအစဥ်ကို အကောင်အထည်ဖော်ဆောင်နေပြီး စစ်ကောင်စီတပ်ရင်း အချို့ကတာဝန်ရှိသူတွေနဲ့ ကနဦး ညှိနှိုင်းသဘောတူမှု ရရှိထားတယ်လို့ ဆိုပါတယ်။
ဒါကြောင့် စစ်အာဏာရှင်ကို ကျောခိုင်းပြီး ပြည်သူ့အောင်ပွဲတွေမှာ ပါဝင်နိုင်ဖို့နဲ့ ဖက်ဒရယ် ဒီမိုကရေစီ ပြည်ထောင်စုအသစ်တွင် သာယာလှပသော ဘဝအနာဂတ်များကို မျိုးဆက်သစ်တွေကိုပါ လက်ဆင့်ကမ်းနိုင်ဖို့အတွက် ပြည်သူဘက်ကို မျက်နှာမူပြီး ဘက်ပြောင်းခိုလှုံဖို့ကို တိုက်တွန်းရတာဖြစ်တယ်လို့ ဆိုပါတယ်။
CJ-004
#MeKongNews
#KNDF
#စစ်ကောင်စီ
#ဘက်ပြောင်း
#ခိုလှုံ