မဲခေါင်၊ အောက်တိုဘာ ၂၇
ဂါဇာကို လေကြောင်းတိုက်ခိုက်မှုလုပ်အပြီး ဟားမက်စ်အကြမ်းဖက်အဖွဲ့ ထိပ်တန်းခေါင်းဆောင် ၃ ဦး သေဆုံးခဲ့ပြီဖြစ်ကြောင်း အစ္စရေးကာကွယ်ရေးဝန်ကြီးဌာနက အောက်တိုဘာ ၂၇ ရက်နေ့ မနက်ပိုင်းမှာ သတင်းထုတ်ပြန်သွားပါတယ်။
အီဘရာဟင်ဂျက်ဘာ၊ ရီဖတ်အဘက်စ်နဲ့ တာရက်ခ်မားရုဖ်လို့ အမည်ရတဲ့ ဟားမက်စ်ခေါင်းဆောင် ၃ ယောက် ဟာ အောက်တိုဘာ ၇ ရက်နေ့က အစ္စရေးနယ်စပ်ဖြတ်ကျော်လာပြီး ကလေးငယ်နဲ့ အမျိုးသမီးများစွာအပါ ပြည်သူပေါင်း ၁၄၀၀ ကျော်ကို သတ်ဖြတ်၊ ၂၂၀ ကို ပြန်ပေးဆွဲသွားတဲ့ ဟားမက်စ်စစ်ဆင်ရေး အဓိကတာဝန်ရှိ ခေါင်းဆောင်တွေဖြစ်တယ်လို့ ဆိုပါတယ်။
ဒီ ၃ ယောက်ကို ရှင်းလင်းပစ်နိုင်ခဲ့မှုဟာ တိကျတဲ့ ထောက်လှမ်းရေးသတင်းကို ပေးနိုင်ခဲ့တဲ့ နိုင်ငံထိပ်တန်း ထောက်လှမ်းရေးအဖွဲ့ Shin Bet ရဲ့ အစွမ်းအစကြောင့်ဖြစ်ကြောင်း၊ အောက်တိုဘာ ၂၆ ရက်နေ့ကလည်း ဟားမက်စ်စစ်ထောက်လှမ်းရေး ဒုတိယရာထူးအကြီးဆုံး ရှာဒီဘာရတ်ဒ်ကို လေကြောင်းတိုက်ခိုက်မှုကနေပဲ ရှင်းလင်းပစ်နိုင်ခဲ့တယ်လို့ ထုတ်ပြန်သွားတာဖြစ်ပါတယ်။
ဟားမက်စ်ရဲ့ တစ်ရက်တာ အစ္စရေးဘက် ဝင်ရောက်တိုက်ခိုက်အပြီး အစ္စရေးဘက်က ၂၁ ရက်ကြာ မနားတမ်း လေကြောင်းတိုက်ခိုက်မှု၊ ဒုံးကျည်ပစ်ခတ်မှုတွေ လုပ်နေခဲ့ရာ ဂါဇာမှာ ပျက်ဆီးသေဆုံးမှုများစွာရှိနေပါတယ်။
ကလေး ငယ်တွေ၊ ပြည်သူတွေကိုပါ မဆင်မခြင် တိုက်ခိုက်တယ်ဆိုတဲ့ စွပ်စွဲချက်နဲ့ အစ္စရေးကို အာရပ်ကမ္ဘာက ဝေဖန် ရှုတ်ချနေကြပြီး လူသားချင်းစာနာမှုဆိုင်ရာ အကူအညီတွေ ဝင်ခွင့်ပေးဖို့ ကုလသမဂ္ဂကနေတစ်ဆင့် တောင်းဆို နေကြပါတယ်။
မကြာခင် လောင်စာဆီ၊ ရေနဲ့စားနပ်ရိက္ခာ ပြတ်လတ်တော့မှာဖြစ်လို့ အကူအညီတွေပေးဝင်မှ ဖြစ်မယ်လို့ ကုလသမဂ္ဂပါလက်စတိုင်းဒုက္ခသည် အေဂျင်စီ UNRWA က တောင်းဆိုပေမယ့် အစ္စရေးဝန်ကြီးချုပ် နက်တန်ယာဟုက လောင်စာဆီတွေကို အရပ်သားပြည်သူတွေအတွက် ဟားမက်စ်က ပေးမသုံးဘဲ လက်ဝယ် ချုပ်ကိုင်ထားတာသာဖြစ်တယ်လို့ ထုတ်ပြန်သွားပါတယ်။
Ref: indiatoday
MKF-001
#MeKongNews
#အစ္စရေး
#ဂါဇာ
#လေကြောင်း
#သေဆုံး
#ထိပ်တန်း
#ဟားမက်စ်