မဲခေါင်၊ ဖေဖော်ဝါရီ ၂၂
အမေရိကန်တရားရေးဌာနက ဂျပန်ယာကူဇာခေါင်းဆောင်ဟာ မြန်မာနိုင်ငံက ထွက်တဲ့ နျူကလီးယားလက်နက် ထုတ် ဓာတ်သတ္တုတွေိကို အီရန်ဆီ ရောင်းချဖို့ စီစဉ်ခဲ့တယ်လို့ ဖေဖော်ဝါရီ ၂၁ ရက်နေ့မှာ ထုတ်ပြန်သွားပါတယ်။
အသက် ၆၀ ရှိပြီဖြစ်တဲ့ ယာကူဇာ ခေါင်းဆောင် တာကဲရှီအီဘီဆာဝါကို ၂၀၂၂ ခုနှစ်မှာ အမေရိကန်က ထိုင်းအစိုးရ နဲ့ ပူးပေါင်းဖမ်းဆီးခဲ့တာဖြစ်ပြီး မူးယစ်ဆေးဝါးမှောင်ခိုမှုနဲ့သာ စွဲချက်တင်ထားတာဖြစ်ပေမယ့် အခု မြန်မာ တိုင်းရင်းသားလက်နက်ကိုင်အဖွဲ့တစ်ဖွဲ့ရဲ့ အကြီးအကဲဆီက ယူရေနီယံနဲ့ သိုရီယံဓာတ်သတ္တုတွေကို နမူနာရယူပြီး အီရန် စစ်ခေါင်းဆောင်ဆီ နျူကလီးယားလက်နက်ထုတ်ဖို့ ရောင်းချနိုင်ရေး ကွန်ရက်ဖွဲ့ စီစဉ်ခဲ့ကြောင်းပါ ထပ်မံထုတ်ပြန်သွားပါတယ်။
အီဘီဆာဝါဟာ ၆၁ နှစ်အရွယ် ထိုင်းနိုင်ငံသား ဆွမ်ဖော့ဆင်ဂါဆရီ ဆိုသူနဲ့ ပူးပေါင်းပြီး ၂၀၂၀ ပြည့်နှစ်အစောပိုင်း ကာလက မြန်မာနိုင်ငံမှာ တိုင်းရင်းသားလက်နက်ကိုင်အဖွဲ့ တူးဖော်ထုတ်လုပ်နေတဲ့ ယူရေနီယံနဲ့ သိုရီယံ ဓာတ်သတ္တု နမူနာတွေကို ရယူပြီး ဓာတ်ခွဲခန်းနမူနာ ထောက်ခံချက်တွေပါ ပြုလုပ်လို့ အီရန် စစ်ခေါင်းဆောင်ထံ ရောင်းချရေး စီစဉ်ခဲ့တာဖြစ်ပါတယ်။
အမေရိကန် မူးယစ်ဆေးဝါးတားဆီးကာကွယ်ရေး (DEA) ရဲ့ ထောက်လှမ်းရေးအေးဂျင့် ၂ ဦးဟာ အသွင်ယူထောက်လှမ်းသူတွေဖြစ်တာကို မသိဘဲ အီဘီဆာဝါက ဆက်သွယ် ပြီး ဒီလို ဓာတ်သတ္တုတွေအများကြီးကို ရောင်းချင်ကြောင်း၊ အီရန်ဘက်က မြေပြင်မှ ဝေဟင်ပစ်ဒုံး၊ ဒုံးကျည်၊ စက်သေနတ်၊ ဒုံးပျံသုံးလက်ပစ်ဗုံးတွေ ပြန်ဝယ်မှာဖြစ်ကြောင်း ချိတ်ဆက်ခဲ့ပါတယ်။
တရားရုံးမှတ်တမ်းတွေအရ အီဘီဆာဝါကို အီရန်စစ်ခေါင်းဆောင်လို့ လိမ်လည်ပြီး ပေးတွေ့ခဲ့တာလည်း အမေရိကန်ရဲ့ အသွင်းယူထောက်လှမ်းရေးအေးဂျင့်သာဖြစ်တယ်လို့ သိရပြီး ထိုင်းနိုင်ငံဖူးခက်မှာ အကြိမ်ကြိမ် ဆွေးနွေးမှုတွေလုပ်ရင်းက ဖမ်းဆီးခံရတာဖြစ်တယ်လို့ ဆိုပါတယ်။
ဒါကြောင့် အီဘီဆာဝါနဲ့ ဆင်ဂါဆရီတို့ နှစ်ဦး ကို မူးယစ်ဆေးမှောင်ခိုမှုအပြင် နျူကလီးယားလက်နက်တိုးမြှင့်ထုတ်လုပ်ပြီး ကမ္ဘာကို ခြိမ်းခြောက်နေတဲ့ အီရန် ထံ နျူကလီးယားထုတ် ဓာတ်သတ္တုတွေရောင်းချဖို့ ကြံစည်မှု၊ နယ်စပ်ဖြတ်ကျော်ပြီး လက်နက်မှောင်ခိုမှု၊ ငွေကြေး ခဝါချမှုတွေနဲ့ ထပ်မံ စွဲချက်တင်လိုက်ကြောင်း နယူးယောက်တောင်ပိုင်းခရိုင် အမေရိကန်ရှေ့နေများရုံးက ထုတ်ပြန်သွားပါတယ်။
Ref: independent
MKF-001
