မဲခေါင်၊ ဖေဖော်ဝါရီ ၂၀
ဟားမက်စ်တွေအနေနဲ့ နောက်ထပ် ၂၁ ရက်အတွင်း ဖမ်းဆီးသွားတဲ့ ဓားစာခံအကုန်မလွှတ်ပေးရင် ဂါဇာကမ်း မြောင်ဒေသက ပါလက်စတိုင်းပြည်သူ တစ်ဝက်ကျော် ရှောင်ပြေးခိုလှုံရာ ရာဖာမြို့ကို အပြတ်သားဆုံး တိုက်ခိုက် သွားမယ်လို့ ၃ ဦးပါ အစ္စရေးစစ်ဝန်ကြီးအဖွဲ့ဝင် ဗိုလ်ချုပ်ဟောင်း ဘန်နီဂရန့်ဇ်က ဖေဖော်ဝါရီ ၁၉ ရက်မှာ ရာဇသံပေးလိုက်ပြီဖြစ်ပါတယ်။
အစ္စရေးဝန်ကြီးချုပ် နက်တန်ယာဟုနေရာ ဆက်ခံမယ်လို့ သတင်းပြေးနေတဲ့ ဘန်နီဂရန့်ဇ်က “တကယ်လို့ ရာမာဒန်ဥပုသ်လက မတ်လ ၁၀ ရက်နေ့စမယ်ဆိုရင် ဒီနေ့မှာ ဟားမက်စ်တွေ ဖမ်းသွားတဲ့ ဓားစာခံအားလုံး လွတ်မလာသေးရင် ရာဖာမြို့မှာ တိုက်ပွဲတွေ ဆက်ဖြစ်သွားပါလိမ့်မယ်” လို့ ရက်စွဲပါ သတ်မှတ်ပြီး ရာဇသံ ပေးခဲ့တာပဲဖြစ်ပါတယ်။
ဟားမက်စ်တွေဟာ အောက်တိုဘာ ၇ ရက်နေ့က အစ္စရေးနိုင်ငံထဲ ဖြတ်ကျော်ဝင်ရောက်ပြီး လူပေါင်း ၁၂၀၀ ကျော်ကို သတ်ဖြတ်သွားသလို အယောက် ၂၅၀ ကို ပြန်ပေးဆွဲသွားခဲ့ပြီး အယောက် ၁၀၀ ကျော်ကိုတော့ အပစ် အခတ်ရပ်စဲခဲ့တဲ့ တစ်ပတ်အတွင်းမှာ ပြန်လွှတ်ပေးခဲ့ပြီးဖြစ်ပါတယ်။
ဒါကြောင့် ဓားစာခံ အယောက် ၁၃၀ လောက် ဟာ အစ္စရေးဘက်က အသေလိုချင်နေတဲ့ ဟားမက်စ်ခေါင်းဆောင်း ဂါဇာဘင်လာဒင်ခေါ် ယာဟွဆင်ဝါနဲ့အတူ ရာဖာမြို့မှာ အရပ်သားဟန်ဆောင်ပြီး ရှိနေလိမ့်မယ်လို့ ဘန်နီဂရန့်ဇ်က ယုံကြည်ထားပါတယ်။
အစ္စရေးရဲ့ ထိုးစစ်ကြောင့် ပါလက်စတိုင်းပြည်သူတွေဟာ ဂါဇာရဲ့ နောက်ဆုံးခံတပ်မြို့လည်းဖြစ် အီဂျစ်နိုင်ငံနဲ့ လည်း နယ်ခြားချင်းဆက်နေတဲ့ ရာဖာမြို့ကို စုပြုံရောက်ရှိနေတာဟာ ၂ . ၃ သန်းသော ပြည်သူ တစ်ဝက်ကျော် ရှိနေပါတယ်။
ဒါကြောင့် အစ္စရေးရဲ့ အဆုံးသတ်တိုက်ပွဲဆင်နွှဲရင် အရပ်သားပြည်သူပေါင်းများစွာ သွေးချောင်းစီး သေဆုံးရနိုင်လို့ မဟာမိတ်ဖြစ်တဲ့ အမေရိကန်ကတောင် အစ္စရေးအပေါ် ဟန့်တားမှုတွေ လုပ်နေခဲ့ပါတယ်။
Ref:Thesun
MKF-001