မဲခေါင်၊ ဖေဖော်ဝါရီ ၂၀
ဖေဖော်ဝါရီ ၁၉ ရက်နေ့ဟာ ဒုတိယကမ္ဘာစစ်အတွင်းက မြန်မာနိုင်ငံ ရမ်းဗြဲကျွန်းမှာ ဂျပန်စစ်သား ၅၀၀ ကျော် မိချောင်းတွေရဲ့ အရှင်လတ်လတ် ကိုက်ဖြတ်စားသောက်ခံရတဲ့ ၇၉ နှစ်မြောက် နှစ်ပတ်လည်နေ့ဖြစ်ကြောင်းနဲ့ ဒီဖြစ်စဉ်ဟာ ကမ္ဘာမှာ တောရိုင်းတိရစ္ဆာန်ရန်စွယ်ကြောင့် လူသားတွေ သေဆုံးမှုအများဆုံးဖြစ်ရပ်အဖြစ် ဂင်းနစ်စံချိန်အဖွဲ့ကပါ အသိအမှတ်ပြုထားတယ်လို့ သဘာ၀ပညာရှင် ဘရုစ်စတန်လေရိုက်ရဲ့ ပြောကြားချက်အရ သိရှိရပါတယ်။
ရမ်းဗြဲကျွန်းဟာ ရခိုင်မှာသမက မြန်မာကမ်းရိုးတန်းဒေသတစ်ခုလုံးမှာပါ အကြီးမားဆုံး ကျွန်းဖြစ်ပြီး ရေငံမိချောင်းတွေ အများအပြားရှိရာ ဒီရေတောတွေနဲ့ ကမ္ဘာ့ကြောက်စရာအကောင်းဆုံး ကျွန်းတစ်ကျွန်းဖြစ်ခဲ့ ကြောင်း ၁၉၄၅ ခုနှစ်ဖေဖော်ဝါရီလမှာ ဗြိတိသျှရဲ့ အိန္ဒိယတပ်မ ၁၅ ဟာ စစ်ပြေးလို့ ရမ်းဗြဲကျွန်းရောက်လာတဲ့ ဂျပန်စစ်သား ၁၀၀၀ ဝန်းကျင်ကို သင်္ဘောနဲ့လာရောက်ပြီး မောင်းထုတ်မှုဖြစ်စဉ်မှာ ဒီရေကျချိန် ရွှံ့စပ်တဲ့ ဒီရေတောရေပြင်ထဲ ဖြတ်ကူးတဲ့ ဂျပန်စစ်သားတွေထဲအသက်ရှင်လျှက် ကျန်ခဲ့တာအယောက် ၂၀ လောက်သာရှိပါတယ်။
ဒဏ်ရာရနေသူတွေလည်းပါတာကြောင့် သွေးနံ့ရတဲ့ ရေငံမိချောင်း ၁၀၀ ကျော်လောက်ဟာ ဖြတ်ကူးလာတဲ့ ဂျပန်စစ်သည်တွေ ၅၀၀ လောက်ကိုအရှင်လိုက် ကိုက်ဖြတ်စားသောက်ခဲ့ရာမှာ ငရဲကျသလို ဖြစ်ခဲ့ရတာဖြစ်တယ်လို့ တင်ပြမှုတစ်ခု ပြုလုပ်သွားပါတယ်။
ဒါဟာ တောရိုင်းတိရစ္ဆာန်တွေကြောင့် လူသေဆုံးမှုအများဆုံးအဖြစ် ဂင်းနစ်စံချိန်အဖွဲ့က အသိအမှတ်ပြုထားတယ်လို့ ဘရုစ်စတန်လေရိုက်က တင်ပြခဲ့ပေမယ့် သတ္တဗေဒနဲ့ မော်ဒန်စစ်ရေးသမိုင်းပညာရှင်တွေကတော့ စစ်သား အယောက် ၅၀၀ လောက်ကို မိချောင်းစားတယ်ဆိုတာ မဖြစ်နိုင်ဘူးလို့ သုံးသပ်ကြပါတယ်။
၂၀၁၆ ခုနှစ်တုန်းက ဒီဖြစ်ရပ်နဲ့ပတ်သက်လို့ သမိုင်းပညာရှင် ဆမ်ဝစ်လစ်က အထောက်အထားမှတ်တမ်းတွေ ရရှိခဲ့ပြီး ဖြစ်စဉ်အမှန်က ဂျပန်စစ်သားအများစုဟာ ရေနစ်သေဆုံးတာဖြစ်ပြီး တချို့က ဗြိတိသျှတပ်ရဲ့ ရေထဲပစ်သတ်ခံရ မှုကို မိချောင်းတွေက ကိုက်စားကြတာသာဖြစ်တယ်လို့ ဆိုပါတယ်။
၂၀၀၀ ပြည့်နှစ်က ရမ်းဗြဲကျွန်းကို ကိုယ်တိုင် သွားရောက်လေ့လာခဲ့တဲ့ ကုန်းနေရေနေသတ္တဝါနဲ့ တွားသွားသတ္တဝါအထူးလေ့လာသူ စတီဗင်ပလတ်ကလည်း ဒေသခံတွေကို ဒီဖြစ်စဉ်သမိုင်းကြောင်း မေးမြန်းစုံစမ်းတော့ ဘရုစ်စတန်လေရိုက်တင်ပြသလောက် အယောက် ၅၀၀ အထိ မိချောင်းစားခံရတာမဟုတ်ဘဲ ၁၀ ယောက်၊ ၁၅ ယောက်လောက်သာ မိချောင်းစား ခံရတာဖြစ်နိုင်ကြောင်း ထုတ်ပြန်ပြောဆိုသွားပါတယ်။
Ref:Thesun
MKF-001
