မဲခေါင်၊ ဇန်နဝါရီ ၃၁
အမေရိကန် – ထိုင်း ဦးဆောင်တဲ့ အာဆီယံ ကာကွယ်ရေးဝန်ကြီးများအစည်းအဝေး(ADMM-Plus) တက်ရောက်ဖို့ မြန်မာစစ်တပ်ကို ဖိတ်ကြားမှုက အာဆီယံနိုင်ငံတွေရဲ့ ဆုံးဖြတ်ချက်ကြောင့်ဖြစ်တယ်လို့ အမေရိကန်စစ်ဌာနချုပ်ပြောရေးဆိုခွင့်ရှိသူက ရှင်းလင်းပြောကြားခဲ့ပါတယ်။
အာဆီယံ ကာကွယ်ရေးဝန်ကြီးများအစည်းအဝေး(ADMM-Plus) ကို ထိုင်းနိုင်ငံ ဘန်ကောက်မှာ ဖေဖော်ဝါရီ ၂၀ ရက်နေ့ကနေစပြီး ၅ ရက်တာကျင်းပသွားမှာဖြစ်ပါတယ်။ဒီအစည်းအဝေးတက်ရောက်ဖို့ မြန်မာစစ်ကောင်စီခန့် ကာကွယ်ရေးဝန်ကြီး မြထွန်းဦးကို ဖိတ်ကြားခဲ့တာဖြစ်တယ်လို့ သိရပါတယ်။
အာဆီယံ ကာကွယ်ရေး ဝန်ကြီးများအစည်းအဝေးဟာ ဒေသတွင်းရေကြောင်းလုံခြုံရေး အစီအစဉ်တွေအတွက် အမေရိကန်အပြင် ဆွေးနွေးမှု မိတ်ဖက်တွေအဖြစ် ဩစတြေးလျ၊ တရုတ်၊ အိန္ဒိယ၊ ဂျပန်၊ နယူးဇီလန်၊ ရုရှား၊ တောင်ကိုရီးယားနိုင်ငံတွေက ကိုယ်စားလှယ်တွေလည်း ပါဝင်တက်ရောက်ကြမှာဖြစ်ပါတယ်။
နိုင်ငံတကာ လူ့အခွင့်အရေးအဖွဲ့အစည်းတွေကတော့ အနည်းဆုံးရိုဟင်ဂျာ ၇၃၀၀၀၀ ကို နေအိမ်စွန့်ခွာထွက်ပြေးရအောင် ၂၀၁၇ ခုနှစ်က အစုလိုက်အပြုံလိုက်သတ်ဖြတ်နှိပ်ကွပ်ခဲ့သလို အာဏာသိမ်းပြီး ပြည်သူတွေကို နိုင်ငံအနှံ့ ဗုံးကျဲ၊ တိုက်ခိုက်သတ်ဖြတ်လုပ်နေတဲ့ စစ်ကောင်စီကို ဖိတ်ကြားမှုအတွက် ပြင်းပြင်းထန်ထန် ဝေဖန်နေကြပါတယ်။
မနှစ်ကပဲ အမေရိကန်သမ္မတ ဂျိုးဘိုင်ဒန်က မြန်မာစစ်တပ်ဟာ ရိုဟင်ဂျာတွေကိုလူမျိုးတုန်းသတ်ဖြတ်တယ်လို့ ဆုံးဖြတ်ကြောင်း ထုတ်ပြန်ခဲ့ပြီး အခု သူတို့ဦးဆောင်တဲ့ စစ်ရေး၊ မူးယစ်ကာကွယ်မှု၊ လက်နက်မှောင်ခိုမှု စတဲ့အရေးတွေအတွက် ပူးပေါင်းဆွေးနွေးပွဲမှာ စစ်ကောင်စီကိုဖိတ်ကြားခဲ့လို့ ပိုပြီး ဝေဖန်မှုတွေရှိနေပါတယ်။
အမေရိကန်စစ်ဌာနချုပ် ပြောရေးဆိုခွင့်ရှိသူ ဒုဗိုလ်မှူးကြီး မာတင်မိုင်နာက အာဆီယံဖိုရမ်ပရိုတိုကောအတိုင်း ဖိတ်ကြားခဲ့တာသာဖြစ်တယ်လို့ ရှင်းလင်းပြောကြားထားပါတယ်။
အခုတစ်ကြိမ်ပြုလုပ်တဲ့ ADMM-Plus အစည်းအဝေးမှာ စစ်ကောင်စီကို ပထမဆုံးအကြိမ် ဖိတ်ကြားတာမဟုတ်ဘဲ ၂၀၁၇ ခုနှစ်က ပင်တဂွန်ကိုယ်တိုင်က ကုလသမဂ္ဂနဲ့ထိုင်းဦးဆောင်စီစဉ်တဲ့ နိုင်ငံပေါင်းစုံ စစ်ရေးလေ့ကျင့်မှုအစီအစဉ်အတွက် လေ့လာသူအဖြစ် မြန်မာကို ဖိတ်ခဲ့ပါသေးတယ်။
အဲဒီအချိန်တုန်းကတော့ ဒေါ်အောင်ဆန်းစုကြည် ဦးဆောင်တဲ့ ဒီမိုကရေစီအစိုးရလက်ထက်ဖြစ်လို့ ဝေဖန်သံသိပ်မထွက်ခဲ့ပေမယ့် မနှစ်က စစ်ကောင်စီ ကာကွယ်ရေးဝန်ကြီးဟာ ဗီဒီယိုအစည်းအဝေးကနေ ဒီပွဲကို တက်ရောက်ခွင့်ရခဲ့လို့ ဝေဖန်မှုတွေလည်း ရှိခဲ့ပါတယ်။
MKF-001
#အာဆီယံကာကွယ်ရေးဝန်ကြီးများအစည်းအဝေး #ပင်တဂွန် #Military Coup
#Mekongnews
Ref:aljazeera
