ထိုင်းမှာ သူဌေးငှားပြီး စီးပွားရေးလုပ်ငန်းထူထောင်သူ တစ်ထောင်ကျော်ကို ဖမ်းဆီး
မဲခေါင်၊ ဒီဇင်ဘာ ၅
ပြီးခဲ့တဲ့ ရက်သတ္တပတ်က ထိုင်းရဲတပ်ဖွဲ့နဲ့ ကူးသန်းရောင်းဝယ်ရေး ဝန်ကြီးဌာန တာဝန်ရှိသူတွေ ပူးပေါင်းပြီး ထိုင်းနိုင်ငံထဲမှာ ထိုင်းနိုင်ငံသား သူဌေး အငှားပြ၊ အယောင်ဆောင် စီးပွားရေးလုပ်ငန်း ထူထောင်ထားသူတွေကို စီမံချက်နဲ့ ရှာဖွေ ဖမ်းဆီးခဲ့ရာမှာ စုစုပေါင်း လူ ၁၀၀၀ ကျော် ဖမ်းဆီးရမိခဲ့ပါတယ်။
ဗဟိုထောက်လှမ်းရေးဗျူရိုအကြီးက ဒီစုံစမ်းဖော်ထုတ်မှုဟာ နိုင်ငံတစ်ဝန်း ၄၆ နေရာက ကုမ္ပဏီပေါင်း ၄၄၂ ခုကို ပစ်မှတ်ထားဖမ်းဆီးခဲ့တာဖြစ်ပြီး ဒီကုမ္ပဏီတွေရဲ့ လည်ပတ်ငွေပမာဏဟာ ဘတ် ၃ . ၆ ဘီလီယံ ရှိကာ ကုမ္ပဏီအခြေစိုက်ရုံးတွေ တန်ကြေးက ဘတ် ၂၅၄ သန်းရှိတယ်လို့ ရှင်းလင်း ပြောကြားသွားပါတယ်။
စုစုပေါင်း ဖမ်းဆီးရမိသူ ၁၀၁၄ ယောက်မှာ ထိုင်းနိုင်ငံသား ၇၁၄ ယောက်၊ တရုတ်နိုင်ငံသား ၂၅၈ ယောက်၊ မလေးရှားသား ၂၁ ယောက်၊ ကမ္ဘောဒီးယားသား ၄ ယောက်၊ ဗီယက်နမ် ၄ ယောက်၊ ဗြိတိန်သား ၃ ယောက်၊ ဂျာမန်သား ၃ ယောက်၊ ဂျပန် ၂ ယောက်၊ မြန်မာ ၂ ယောက်၊ အမေရိကန်၊ စင်ကာပူနဲ့ ကာဇက်စတန်သား တစ်ယောက်စီ ပါဝင်ခဲ့ပါတယ်။
လုပ်ငန်းအများစုဟာ တကယ်တမ်း ထိုင်းနိုင်ငံသားတွေက ပိုင်ရှင်သူဌေးအဖြစ် နာမည်သာခံထားပြီး တကယ်တမ်းက ပြည်ပသားတွေ စီးပွားရေးလုပ်ကိုင်နိုင်မှုကို နာမည်ခံပေးရုံသက်သက်သာဖြစ်တယ်လို့ ဆိုပါတယ်။
လုပ်ငန်းတွေပြပြီး သိုလှောင်ထားတဲ့ သွင်းကုန်တွေကလည်း ပြည်ပသားတွေကို တားဆီးပိတ်ပင်ထား တဲ့ ကုန်စည်တွေများကြောင်း၊ အများစုက ဘာစီးပွားရေးမှ မလုပ်ဘဲ ငွေကြေးခဝါချနိုင်ရေးအတွက် ငွေလွှဲလုပ်ငန်းတွေကို ထူထောင်ထားတာဖြစ်ပြီး ဒီလိုလုပ်ရပ်တွေဟာ ထိုင်းအမျိုးသားအကျိုးစီးပွားနဲ့ လုံခြုံရေးကို ထိခိုက်စေကြောင်း ရှင်းလင်းပြောကြားသွားပါတယ်။
ဒီစီမံကိန်းကို နိုဝင်ဘာလဆန်းပိုင်းကတည်းက ထိုင်းရဲတပ်ဖွဲ့နဲ့ ကူးသန်းရောင်းဝယ်ရေးဝန်ကြီးဌာနတို့ ပူးပေါင်း ပြီး ထိုင်းလူမျိုး အငှားသူဌေးနဲ့ ကျားဖြန့်၊ မူးယစ်မှောင်ခိုသမားတွေ ငွေကြေးခဝါချနေမှု တိုက်ဖျက်ဖို့ ချမှတ် လုပ်ဆောင်ခဲ့တာဖြစ်ပါတယ်။
Ref:bangkokpost
MKF-001
#MeKongNews
#ထိုင်းသူဌေး
#သူဌေးအငှား
#စုံစမ်းရေးဗျူရို
#စီမံချက်ဖမ်းဆီး
#ထောက်လှမ်းရေး
