မဲခေါင်၊ စက်တင်ဘာ ၉
ပြီးခဲ့တဲ့ စက်တင်ဘာ ၆ ရက် သောကြာနေ့က တရုတ်နိုင်ငံ တောင်ပိုင်း ဟိုင်နန်ပြည်နယ်ကို နှစ်ကြိမ်တိုင် ဝင်ရောက်တိုက်ခတ်ခဲ့ပြီးနောက် စက်တင်ဘာ ၇ ရက်နဲ့ ၈ ရက်မှာ ဗီယက်နမ်နိုင်ငံ မြောက်ပိုင်းကို ဝင်ရောက် တိုက်ခတ်သွားတဲ့ ဟာဂီ စူပါတိုင်ဖွန်း အပူပိုင်းမုန်တိုင်းကြောင့် သေဆုံးသူ အနည်းဆုံး အယောက် ၃၀ ကျော် ရှိခဲ့ပါတယ်။
ယာဂီမုန်တိုင်းဟာ ၁၉၄၉ ခုနှစ် နောက်ပိုင်း တရုတ်နိုင်ငံမှာ တိုက်ခတ်တဲ့ အပြင်းထန်ဆုံး ဆောင်းဦးပေါက် မုန်တိုင်းဖြစ်ခဲ့ပြီး ဟိုင်နန်ပြည်နယ်မှာ နေထိုင်သူ ၁ သန်းနီးပါးကို နီးစပ်ရာ ဂွန်ဒေါင်း ပြည်နယ်အထိ ရွှေ့ပြောင်း စေခဲ့ရပါတယ်။
ဟိုင်နန်ကိုတိုက်ခတ်တဲ့ ဟာဂီအဆင့်ဟာ ဟာရီကိန်း အဆင့် (၄) အမျိုးအစားအထိ ပြင်းထန်ခဲ့ တာကြောင့် အနည်းဆုံး ၄ ယောက်သေဆုံးပြီး စက်တင်ဘာ ၈ ရက်မှာ မုန်တိုင်းအရှိန်လျော့ကျသွားပေမယ့် မိုးသည်းထန်လွန်းစွာ ဆက်လက်ရွာသွန်းနေဆဲဖြစ်လို့ ဟွမ်ဇီနဲ့ ယူနန်ပြည်နယ်တွေမှာပါ စိုးရိမ်ရတဲ့အဆင့် ရှိသေး ကြောင်း တရုတ် မိုးလေဝသဌာနက ကြေညာသွားပါတယ်။
ဟိုင်နန်မှာ ဟာဂီမုန်တိုင်းကြောင့် အထူးသဖြင့် စိုက်ပျိုးရေးကဏ္ဍနဲ့ ငါးဖမ်းလုပ်ငန်းပိုင်းမှာ ပျက်ဆီးဆုံးရှုံးမှု အများဆုံးကြုံရပြီး ယွမ် ၁၁ . ၉ ဘီလီယံ (ဒေါ်လာ ၁ .၆၇ ဘီလီယံ) ဖိုး ပျက်စီးဆုံးရှုံးခဲ့ရပါတယ်။
ဗီယက်နမ် မြောက်ပိုင်းကို ဆက်လက်ဝင်ရောက်ခဲ့တဲ့ ဟာဂီမုန်တိုင်းကြောင့် ရေကြီးရေလျှံဖြစ်ခဲ့မှုမှာ ဆန်စပါးနဲ့တခြား စိုက်ပျိုးမြေ ဟက်တာ ၁၂၀၀၀၀ နစ်မြုပ်ပျက်စီးပြီး ထိုင်ဘင်းပြည်နယ်မှာ သီးပင်စားပင်ပေါင်း ၅၀၀၀ ကျော် လဲပြိုခဲ့ပါတယ်။
ဆိပ်ကမ်းမြို့ဖြစ်တဲ့ ဟိုင်ဖုန်းမှာ မုန်တိုင်းဒဏ်ကို အခံရဆုံးဖြစ်ပြီး ငါးဖမ်းလုပ်ငန်းနဲ့ စက်လှေ၊ သင်္ဘောများစွာ တိမ်းမှောက်ပျက်ဆီးတာကြောင့် ဗီယက်နမ်မှာ သေဆုံး သို့မဟုတ် ပျောက်ဆုံး ၂၆ ယောက်အထိ ရှိခဲ့ပြီး ဗီယက်နမ်ဒေါင် ၂ ထရီလီယံ (ဒေါ်လာ ၈၁ သန်း)ဖိုးပျက်ဆီးဆုံးရှုံးခဲ့ကြောင်း Lao Dong သတင်းဝက်ဘ်ဆိုက်က ဖော်ပြခဲ့ပါတယ်။
Ref: gulfnews
MKF-001
