မဲခေါင်၊ မေ ၂၃
၁၀၂၇ စစ်ဆင်ရေးကာလအတွင်း တိုက်ခိုက်ရေးဘက် ဦးစားပေးနေရတာကြောင့် တရားစီရင်ရေးအပိုင်းမှာ အမြန် စစ်ဆေး၊ အမြန်စီရင်ချက်ချလုပ်ဆောင်ခဲ့ရမှုတွေသာ လုပ်နိုင်ခဲ့လို့ ခုချိန်ကစပြီး စနစ်တကျ တရားစီရင်ရေးလုပ်ဆောင်မယ့်အကြောင်း ကိုးကန့်တပ် MNDAA က မေ ၂၂ ရက်မှာ ထုတ်ပြန်အသိပေးပါတယ်။
ဒေသတွင်း လူမှောင်ခိုကူးခြင်း၊ အဓမ္မဖမ်းဆီး ငွေညှစ်ခြင်း၊ သတ်ဖြတ်ခြင်း၊ မုဒိမ်းကျင့် ပြန်ပေးဆွဲခြင်းစတဲ့ ဒုစရိုက်လုပ်ငန်းတွေ များပြားပြီး လက်နက်ကိုင်ထားသူတွေလည်းများလို့ စစ်ဆင်ရေးကာလမှာ အမြန်ဆုံး စီရင်ချက်တွေချခဲ့ရပေမယ့် အခုကစပြီး စနစ်တကျ တရားစီရင်ရေး စနစ်ချမှတ်ဖို့ ပြစ်မှုနဲ့ ပြစ်ဒဏ်တွေကို အခုလိုသတ်မှတ်ကြောင်း ထုတ်ပြန်သွားတာဖြစ်ပါတယ်။
(၁) ရည်ရွယ်ချက်ရှိရှိလူသတ်မှုကျူးလွန်သူအတွက် ဒဏ်ရာရစေဖို့ ရည်ရွယ်ကျူးလွန်သူကို ထောင်ဒဏ် ၅ နှစ်ထက် မပိုတဲ့ ပြစ်ဒဏ်၊ ရက်စက်ကြမ်းကြုတ်တဲ့နည်းလမ်းနဲ့ ဒဏ်ရာပြင်းထန်ရရှိစေသူကို ထောင်ဒဏ် ၅ နှစ်နဲ့ ထောင်ဒဏ် ၁၀ နှစ်ထက်မပိုတဲ့ ပြစ်ဒဏ်၊ တစ်သက်တာမသန်စွမ်းဖြစ်စေတဲ့ ဒဏ်ရာရတာမျိုးဆိုရင် ၁၀ နှစ် အထက်ကနေ ပြစ်မှု အပေါ်မူတည်ပြီး တစ်သက်တစ်ကျွန်း၊ သေဒဏ်တွေအထိ ချမှတ်ရန်
(၂) ပြန်ပေးဆွဲ ငွေညှစ်မှုဆိုရင် အနည်းဆုံးထောင်ဒဏ် ၇ နှစ်ကနေ တစ်သက်တစ်ကျွန်းအထိကျခံရန်နဲ့ ပိုင်ဆိုင် ပစ္စည်းဥစ္စာတွေ သိမ်းဆည်းရန်၊ ပြန်ပေးဆွဲခံရသူ သေဆုံးစေခဲ့တယ်ဆိုရင် တစ်သက်တစ်ကျွန်း ကနေ သေဒဏ် အထိ ချမှတ်ရန်
(၃) အရပ်ဘက်၊ အစိုးရဘက်ပိုင်းဓားပြတိုက်မှုအတွက် ၅ နှစ်ထက် မနည်း၊ ၁၀ နှစ်ထက် မကျော်တဲ့ ပြစ်ဒဏ် ကျခံရန်၊ နေအိမ်အကြမ်းဖက်ဓားပြတိုက်မှု၊ လမ်းပေါ်ဓားပြတိုက်မှု၊ အကြိမ်များစွာ ငွေများစွာ ဓားပြတိုက်ခဲ့မှု၊ ဓားပြတိုက်ရာမှာ ပြင်းထန်တဲ့ဒဏ်ရာရစေမှု၊ သေစေမှု၊ စစ်တပ်နဲ့ ရဲဆီက ဓားပြတိုက်မှု၊ သေနတ်နဲ့ ဓားပြတိုက် မှု၊ ဘဏ်နဲ့အစိုးရငွေကြေးဆိုင်ရာအဆောက်အအုံတွေကို ဓားပြတိုက်မှု၊ စစ်တပ် ထောက်ပို့လုပ်ငန်းစဉ်နဲ့ သဘာ၀ ကပ်ဘေးကူညီကယ်ဆယ်ထောက်ပံ့မှုတွေကို ဓားပြတိုက်မှုတွေအတွက်ဆိုရင် တစ်သက်တစ်ကျွန်းနဲ့ သေဒဏ် တွေချမှတ်ရန်
(၄) တယ်လီကွန်မြူနီကေးရှင်းလိမ်လည်မှု (ကျားဖြန့်)ပြစ်ဒဏ်ကျူးလွန်သူတွေအတွက် ယွမ် ၁၀၀၀၀ နဲ့ ၁၀၀၀၀၀ ကြား လိမ်သူကို ၃ နှစ်ထက်မပိုတဲ့ ထောင်ဒဏ်နဲ့ ဒဏ်ငွေအပြင် ပိုင်ဆိုင်မှုသိမ်းဆည်းရန်၊ ယွမ် ၁ သိန်းကျော်ပြီး ၁ သန်းမကျော်တဲ့ လိမ်လည်မှုအတွက် အနည်းဆုံး ၃ နှစ်ကနေ ၁၀ နှစ်ထက်မပိုတဲ့ ပြစ်ဒဏ်နဲ့ ဒဏ်ငွေ၊ ပိုင်ဆိုင်မှုသိမ်းဆည်းရန်၊ ယွမ် ၁ သန်းအထက် လိမ်ခဲ့ရင် အနည်းဆုံး ၁၀ နှစ်ကနေ အများဆုံး တစ်သက် တစ်ကျွန်းနဲ့ ဒဏ်ငွေ၊ ပိုင်ဆိုင်မှု သိမ်းဆည်းရန်။
(၅) လူမှောင်ခိုကူးခြင်းမှာ ၅ နှစ်ထက် မလျော့၊ ၁၀ နှစ်ထက် မပိုတဲ့ ထောင်ဒဏ်နဲ့ ငွေဒဏ်၊ သာမန်ထက်ဆိုးတဲ့ လူမှောင်ခိုမှုကျူးလွန်ရင် အနည်းဆုံး ထောင်ဒဏ် ၁၀ နှစ်ကနေ တစ်သက်တစ်ကျွန်း၊ သေဒဏ်၊ ပိုင်ဆိုင်မှု သိမ်း ဆည်းပြစ်ဒဏ်ချမှတ်ရန်။ အမျိုးသမီးနဲ့ ကလေးငယ်တွေကို လူမှောင်ခိုကူးတဲ့ ဂိုဏ်းခေါင်းဆောင်၊ လူကုန်ကူးခံ အမျိုးသမီးတွေကို မုဒိမ်းကျင့်မှု၊ အမျိုးသမီးနဲ့ကလေးငယ်တွေ လူကုန်ကူးရာမှာ ပြင်းထန်စွာနာကျင်စေမှုနဲ့ သေဆုံးစေမှု၊ အမျိုးသားတွေကို လူမှောင်ခိုကူးရာမှာ ပြင်းထန်ဒဏ်ရာရစေမှုနဲ့ သေဆုံးစေမှု၊ မသန်မစွမ်းဖြစ်စေ မှုတွေကျူးလွန်သူတွေအတွက် ပြစ်မှုအနည်းဆုံးက အနည်းဆုံး ထောင်ဒဏ် ၃ နှစ်ကနေ အများဆုံး ၁၀ နှစ်၊ သေဆုံးစေခဲ့ရင် အနည်းဆုံး ထောင်ဒဏ် ၁၀ နှစ်ကနေ ၁၀ နှစ်၊ ရည်ရွယ်ချက်ရှိရှိ နာကျင်စေအောင်၊ မသန်စွမ်း ဖြစ်စေအောင်၊ သေဆုံးစေအောင် အကြမ်းဖက်အနိုင်ကျင့်ပါက တစ်သက်တစ်ကျွန်းနဲ့ သေဒဏ် ပေးရန်။
(၆) အမျိုးပိုင်းနဲ့ ပုဂ္ဂလိကပိုင် တွေခိုးယူမှုအတွက် ယွမ် ၅၀၀၀ ကနေ ယွမ် ၃၀၀၀၀ တန်ကြေးကြားဆို ၃ နှစ်ထက် မပိုတဲ့ပြစ်ဒဏ်နဲ့ ငွေဒဏ်၊ ယွမ် ၃၀၀၀၀ နဲ့ ယွမ် ၁၀၀၀၀၀ တန်ကြေးကြးခိုးရင် အနည်းဆုံး ၃ နှစ်ကနေ ၁၀ နှစ်၊ ယွမ် ၁၀၀၀၀၀ ကျော်ရင် အနည်းဆုံး ထောင်ဒဏ် ၁၀ နှစ်ကနေ တစ်သက်တစ်ကျွန်းနဲ့ ပိုင်ဆိုင်မှုတွေ သိမ်းဆည်းရန်ဖြစ်ကြောင်းနဲ့ ထုတ်ပြန်တဲ့ ရက်ကစပြီး ဥပဒေအကြုံးဝင်တယ်လို့ ထုတ်ပြန်သွားပါတယ်။
MKF-001
ပုံစာ-ကိုးကန့် MNDAA သိမ်းပိုက်ထားတဲ့ လောက်ကိုင်မြို့မှာ ကျူးလွန်သူဆိုသူတွေကို လူထုရှေ့ သေဒဏ်ပေးခဲ့တဲ့ မှတ်တမ်းရုပ်သံကို MNDAA က ထုတ်ပြန်ခဲ့တာပါ။
