မဲခေါင်၊ ဩဂုတ် ၁၅

ရှမ်းပြည်နယ် မြောက်ပိုင်း၊ တရုတ် – မြန်မာနယ်စပ် မူဆယ်မြို့မှာ ဒီကနေ့ ဩဂုတ်လ ၁၅ ရက်နေ့ မွန်းလွဲပိုင်းက တရုတ်ငွေဈေး ထပ်တက်လာပြီး တရုတ်ယွမ်ငွေ အရောင်း ပိတ်ထားတယ်လို့ ငွေလဲလှယ်ရေး လုပ်ငန်း လုပ်ကိုင်သူတွေက ပြောပါတယ်။

ဒီကနေ့ ညနေပိုင်း တရုတ်ငွေ ၁၀၀ ယွမ်ကို မြန်မာငွေ ၅၀,၀၅၀ ကျပ် ဈေးပေါက်ပြီးနောက် အခုလို အရောင်းပိတ်လိုက်တာလို့ ဆိုပါတယ်။

“တရုတ်ငွေက လဲယူလို့ မရဘူး။ အခုလောလောဆယ် အရောင်းပိတ်ထားတယ်” လို့ ညနေ ၃ နာရီခန့်က ငွေလဲလှယ် လုပ်ငန်း လုပ်ကိုင်နေသူ အမျိုးသမီး တစ်ဦးက ပြောပါတယ်။

မြန်မာငွေ လိုချင်သူတွေကိုသာ လဲလှယ်ပေးပြီး တရုတ်ငွေ လိုရင်တော့ မရောင်းပေးဘူးလို့ သူက ပြောပါတယ်။

ယမန်နေ့ ဩဂုတ်လ ၁၄ ရက်၊ ညနေ ၆ နာရီ ဝန်းကျင်မှာတော့ တရုတ်ငွေ ၁၀၀ ယွမ်ကို မြန်မာငွေ ၄၉,၀၆၀ ကျပ် ဈေးပေါက်ခဲ့တာ ဖြစ်ပါတယ်။

လက်ရှိမှာတော့ ကုန်ဈေးနှုန်းတွေ တရိပ်ရိပ် တက်လာနေသလို တရုတ်ဘက်ကနေ မြန်မာဘက် ကုန်တင်သွင်းမယ့် ကုန်သည် လုပ်ငန်းရှင်တွေ တရုတ်ငွေ ဝယ်ယူဖို့ ခက်ခဲနေတာကြောင့် အခက်ကြုံနေရတယ်လို့ နယ်စပ် ကုန်သည် လုပ်ငန်းရှင်တွေက ပြောပါတယ်။

‌ငွေကြေး အများအပြား ရှိသူတွေက တန်ဖိုးကျနေတဲ့ မြန်မာငွေကို လက်ထဲမှာ မထားချင်တာကြောင့် တရုတ်ငွေကို ဝယ်ပြီး ကိုင်ထားကြတာလို့ ဆိုပါတယ်။

Photo: 008

CJ-008

#MekongNews

#မူဆယ်မြို့

#ယွမ်ငွေ

#တရုတ်_မြန်မာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)