မဲခေါင်၊ ဇန်နဝါရီ ၁

၂၀၂၂ ခုနှစ်အတွင်း တရုတ်ကို ရခိုင်ရွှေကမ်းလွန်သဘာဝဓာတ်ငွေ့ လုပ်ကွက်မှ သဘာ၀ဓာတ်ငွေ့ ရောင်းချမှုကနေ စစ်ကောင်စီက ဒေါ်လာ ၁ . ၄၃ ဘီလီယံ ရရှိခဲ့တယ်လို့ သိရပါတယ်။

အာဏာသိမ်းပြီးနောက် စစ်ကောင်စီဟာ လေကြောင်းတိုက်ခိုက်မှုပေါင်း ၆၀၀ ကျော် လုပ်ဆောင်ခဲ့ပြီး နိုင်ငံတကာရဲ့ ပိတ်ဆို့အရေးယူမှုတွေကြောင့် နိုင်ငံခြားငွေကြေးအခက်အခဲရှိခဲ့ပေမယ့် ရခိုင်ပြည်နယ် ကျောက်ဖြူကနေ တရုတ်နိုင်ငံယူနန်ကို သွယ်တန်းထားတဲ့ ဓာတ်ငွေ့ပိုက်လိုင်းက သဘာ၀ဓာတ်ငွေ့ပေးပို့မှုတစ်ခုထဲကတင် ၂၀၂၂ ခုနှစ်မှာ ဒေါ်လာ ၁.၄၃ ဘီလီယံအထိ ရရှိခဲ့တယ်လို့ တရုတ်အကောက်ခွန်ဝန်ကြီးဌာန စာရင်းအချက်အလက်တွေအရ သိရှိရကြောင်း BNI က ရေးသားဖော်ပြခဲ့ပါတယ်။

ရခိုင်ကမ်းလွန်သဘာ၀ဓာတ်ငွေ့လုပ်ကွက်ကနေ မကွေး၊ မန္တလေး၊ ရှမ်းပြည်နယ်တွေကိုဖြတ်ပြီး ယူနန်ကို ပေးပို့တဲ့ သဘာ၀ဓာတ်ငွေ့ပိုက်လိုင်းအပြင် ကျောက်ဖြူကနေ ယူနန်ကို ရေနံစိမ်းပေးပို့တဲ့ ၇၇၁ ကီလိုမီတာရှည်တဲ့ ပိုက်လိုင်းကနေ တစ်နှစ်တစ်နှစ် စစ်ကောင်စီဟာ ဒေါ်လာဘီလျံချီရရှိနေတာဖြစ်ပါတယ်။

သဘာ၀ဓာတ်ငွေ့ပိုက်လိုင်းဟာ ဒေါ်လာ ၁ ဘီလီယံ ကုန်ကျခံ တည်ဆောက်ခဲ့တာဖြစ်သလို ကျောက်ဖြူ-ယူနန် ရေနံစိမ်းပိုက်လိုင်း အတွက် ဒေါ်လာ ၁.၅ ဘီလီယံကုန်ကျခံ တည်ဆောက်ခဲ့တာဖြစ်ပါတယ်။ ဒီရေနံပိုက်လိုင်းကနေ တစ်နှစ်အတွင်း တရုတ်ကို ရေနံစိမ်း တန်ချိန် ၂၂ သန်း ပေးပို့ခဲ့ပါတယ်။

မြန်မာ့ရေနံနဲ့ သဘာ၀ဓာတ်ငွေ့ အင်တာပရိုက်စ် (MOGE ) က သဘာ၀ဓာတ်ငွေ့ပိုက်လိုင်း စီမံကိန်းမှာ ရှယ်ယာ ၇.၃၆ ရာခိုင်နှုန်းသာ ပိုင်ဆိုင်ပြီး ရေနံစိမ်းပိုက်လိုင်းမှာတော့ ရှယ်ယာ ၄၉ .၁ ရာခိုင်နှုန်း ပိုင်ဆိုင်ထားလို့ ၂၀၂၂ ခုနှစ် အတွင်း တရုတ်ဆီက ဒေါ်လာ ၁.၄ ဘီလီယံ ရရှိနိုင်ခဲ့တာ ဖြစ်ပါတယ်။

ရခိုင်ဒေသကတော့ ရေနံနဲ့သဘာ၀ဓာတ်ငွေတွေ ထွက်ရှိပေမယ့် မြန်မာနိုင်ငံမှာ ဒုတိယအဆင်းရဲဆုံးပြည်နယ်၊ အလုပ်အကိုင် အရှားပါးဆုံးပြည်နယ်တစ်ခုအဖြစ် နိမ့်ကျစွာတည်ရှိနေပါတယ်။

မြန်မာနိုင်ငံဟာ ရုရှားနဲ့ တက်ခ်မင်နင်စတန် တို့ပြီးရင် တရုတ်ကို သဘာ၀ဓာတ်ငွေပေးပို့မှု တတိယအများဆုံး နိုင်ငံအဖြစ် ရပ်တည်နေပါတယ်။

အမေရိကန်အခြေစိုက် မြန်မာ့စွမ်းအင် ပေါ်လစီလေ့လာစောင့်ကြည့်ရေးအဖွဲ့ EarthRights International ရဲ့ အကြံပေး ဘန်ဟက်ဒ်မန်းက စစ်ကောင်စီရဲ့ လက်နက်ဝယ်ယူမှု၊ လေယာဉ်ဆီဝယ်ယူမှု၊ ပြည်တွင်းစစ်မှာ နှိပ်ကွပ်ရေးအတွက် လိုအပ်တာတွေဝယ်ဖို့ နိုင်ငံခြားငွေလိုအပ်ချက်ကို ရေနံနဲ့ သဘာ၀ဓာတ်ငွေ့ ရောင်းချခြင်းကနေ ရရှိနေကြောင်း၊ စစ်ကောင်စီရဲ့ အဓိကဝင်ငွေထောက်တိုင်က MOGE ဖြစ်ကြောင်း သုံးသပ်ပြောဆိုသွားပါတယ်။

MKF-001

#ရခိုင်ဓာတ်ငွေ့ပိုက်လိုင်း #မြန်မာ့ရေနံနှင့်သဘာဝဓာတ်ငွေ့ #တရုတ်

#Mekongnews

Ref:BNI

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)