ရှမ်းပြည်နယ်တောင်ပိုင်းဒေသမှာ အောက်တိုဘာလ ၃ ရက်နေ့က စတင်ပြီး ဆန်ဈေး အနည်းငယ် ကျဆင်းလာပေမယ့် ဝယ်လိုအား နည်းပါး နေတယ်လို့ ဆန်ဆိုင်တွေထံ သိရပါတယ်။
မကြာမီ ဆန်အသစ်တွေ ပေါ်တော့မှာ ဖြစ်လို့ ၂၄ ပြည်ပါ ဆန်တစ်အိတ်ကို ၂၀၀၀ ကျပ်ကနေ ၅၀၀၀ ကျပ်ကြား ဈေးကျဆင်းလာပြီး ဆက်လက် ကျဆင်းဖွယ်ရှိတယ်လို့ ဆိုပါတယ်။
“အသစ်တွေ ပေါ်လာပြီဆိုတော့ တစ်အိတ်ကို ဆန်အမျိုးအစားပေါ် မူတည်ပြီး ၂၀၀၀ ကနေ ၅၀၀၀ လောက်အထိ ကျလာတယ်။ ဆက်ကျနိုင်တယ်လို့လည်း ကုန်သည်တွေကတော့ ပြောတယ်။ စောင့်ကြည့်ရအုံးမှာပေါ့” လို့ တောင်ကြီးမှာ ဆန်ဆိုင် ဖွင့်လှစ်ထားသူ တစ်ဦးက ပြောပါတယ်။
ပြီးခဲ့တဲ့ ဩဂုတ်လဝက်ခန့်မှ စတင်ပြီး ကုန်သည်တွေ ဆန်ဝယ်ယူရ ခက်ခဲကာ ဆန်ပြတ်လပ်နိုင်တယ်ဆိုတဲ့ သတင်းတွေကြောင့် ဆန်တွေ အလုအယက် ဝယ်ယူ စုဆောင်းထားကြတဲ့ အတွက် လက်ရှိ ပုံမှန် ရောင်းအားထက် ထက်ဝက်ခန့် ကျဆင်းနေတယ်လို့ သိရပါတယ်။
“ဆန်ပြတ်မယ်ထင်ပြီး ပိုက်ဆံရှိတဲ့ သူတွေက ကြောက်ကြောက်နဲ့ ဝယ်စုထားကြတော့ အခုဆို ဆန်ဆိုင်တွေမှာ ရောင်းအားက တဝက်တောင် မနည်း ရောင်းနေရတယ်။ ပိုက်ဆံရှိတဲ့ လူတချို့နဲ့ အခြေခံ လူတန်းစားတွေ လောက်ပဲ လာဝယ်ကြတော့တာ။ ဝယ်စုထားတဲ့ လူတွေက နောက် သုံးလ လေးလလောက်အထိ ဝယ်စရာ မလိုတော့ဘူးလေ” လို့ အောင်ပန်းမြို့မှာ ဆန်ဆိုင်ဖွင့်လှစ်ထားသူ တစ်ဦးက ပြောပါတယ်။
လက်ရှိ ရှမ်းပြည်နယ်တောင်ပိုင်း ဆန်ဈေးကွက်မှာ စားသုံးမှု အများဆုံးဖြစ်တဲ့ ဧည့်မထ တစ်အိတ် ၄၇၀၀၀ ကျပ်ဝန်းကျင်၊ ဖျာပုံပေါ်ဆန်း ရှယ်တစ်အိတ် ၆၈၀၀၀ ကျပ်ဝန်းကျင်၊ ရွှေဘိုပေါ်ဆန်း တစ်အိတ် ၉၂၀၀၀ ကျပ်ဝန်းကျင် ပေါက်ဈေး ရှိနေတယ်လို့ သိရပါတယ်။
ဒုတိယ စားသုံးမှု အများဆုံး ဆန်တွေဖြစ်တဲ့ ရှမ်းဆန်ဈေးကွက်မှာ နောင်မွန်ခေါက်နမ့်ခမ်း တစ်အိတ် ၈၀၀၀၀ ကျပ်ဝန်းကျင်၊ နောင်မွန် ရွှေရင်အေး တစ်အိတ် ၇၈၀၀၀ ကျပ်ဝန်းကျင်၊ ရွှေအပ်တစ်အိတ်ကို ၆၆၀၀၀ ကျပ်ဝန်း ကျင် ပေါက်ဈေး ရှိနေတယ်လို့ သိရပါတယ်။
ရှမ်းပြည်နယ်တောင်ပိုင်းမှာ စပါးစိုက်ဧက များစွာရှိပေမယ့် ဒေသဆန် ဖူလုံမှု မရှိတဲ့အတွက် ခေတ်အဆက်ဆက် ပြည်မက ထွက်ရှိတဲ့ ဆန်တွေကိုသာ အားထားနေရတယ်လို့ သိရပါတယ်။
