ယခုရက်ပိုင်းမှာ ပြည်တွင်း စက်သုံးဆီဈေးတွေ ပြန်လည် ကျဆင်းနေတယ် ဆိုပေမယ့် ဖြစ်သင့်ဖြစ်ထိုက်တဲ့ ဈေးတန်းအထိ မကျသေးဘူးလို့ လုပ်ငန်းရှင်တွေက ပြောပါတယ်။
ပြီးခဲ့တဲ့ သြဂုတ်လ နောက်ဆုံး အပတ်က ဒီဇယ် တစ်လီတာ ၃၂၀၀ ကျပ်ဝန်းကျင်နဲ့ 92 တစ်လီတာ ၂၆၃၅ ကျပ်အထိ ဈေးမြင့်တက်ခဲ့ပြီး မနေ့ အောက်တိုဘာလ ၅ ရက်မှာ 92 တစ်လီတာ ၁၈၈၀ ကျပ်၊ 95 တစ်လီတာ ၁၉၅၀ ကျပ်၊ ရိုးရိုးဒီဇယ် ၂၄၈၀ ကျပ်၊ ပရီမီယံဒီဇယ် ၂၅၆၅ ကျပ်အထိ ကျဆင်းခဲ့ပါတယ်။
“စက်သုံးဆီဈေး ကျဆင်းလာတာလို့ ပြောလို့ မရပါဘူး၊ အရင်တုန်းက ဈေးတန်း တစ်ခုနဲ့ယှဉ်ရင်။ နိုင်ငံရေး အခြေနေကြောင့် ဈေးတွေက အဆမတန် မြင့်တက်သွားတာ၊ အရင်ဈေးတန်း နီးပါးတောင် မရောက်သေးတဲ့ အတွက် ဖြစ်သင့်ဖြစ်ထိုက်တဲ့ ဈေးတန်း တစ်ခု မရောက်သေးဘူး။ ဆီဈေး ကျတယ်ဆိုတာ လတ်တလော အရမ်းမြင့်တက်မှု အတွက် ဈေးကျတယ်ပဲ ပြောလို့ရမယ်” လို့ အမည်မဖော်လိုသူ လုပ်ငန်းရှင် တစ်ဉီးက ပြောပါတယ်။
စစ်ကောင်စီက ပြီးခဲ့တဲ့ စက်တင်ဘာလ အတွင်း ဓာတ်ဆီ တန်ချိန် ၈ သောင်းနဲ့ ဒီဇယ်တန်ချိန် ၁ သိန်းခွဲ တင်သွင်းခွင့် ပြုခဲ့ပြီး စက်သုံးဆီ လုံလောက်ဖို့နဲ့ ဈေးနှုန်းကျဆင်းဖို့ လုပ်နေတယ်လို့ ပြောနေပေမယ့် စစ်အာဏာမသိမ်းခင်က ဈေးတန်း ပြန်ရောက်ရန် လိုအပ်နေကြောင်း ၎င်းကဆိုပါတယ်။
“နှစ်ထောင်အောက် ရောက်တယ် ဆိုပေမယ့် သိသာတဲ့ ကျဆင်းမှုတော့ မဟုတ်ဘူး၊ အရင်က တစ်လီတာမှ ၁၃၀၀ ပဲ ရှိတာလေ၊ ဈေးကျတယ်ဆိုပြီး ပြောဖို့ကတော့ စောင့်ကြည့်ရမယ်၊ ပြန်တက်ဖို့ အရှိန်ယူတာလည်း ဖြစ်နိုင်တယ်၊ ပြီးခဲတဲ့ လတွေတုန်းက တစ်ရက်ကို ၂၀၊ ၃၀ လောက် အကျပြပြီး ၁၀၀ လောက် ပြန်တက်ခဲ့တာ၊ စောင့်ကြည့်ရမှာပေါ့၊ အခုလို တဖြည်းဖြည်း ကျသွားရင်တော့ အဆင်ပြေတာပေါ့၊ ကုန်ဈေးနှုန်းတွေကတက် ဆီဈေးကတက်ဆို အဆင်မပြေဘူး” လို့ ရန်ကုန်မြို့က အဌားယာဉ်မောင်း တစ်ဦးက ပြောပါတယ်။
စစ်ကောင်စီက နေ့စဉ်စ က်သုံးဆီ ရည်ညွှန်းဈေးကို စင်္ကာပူ အခြေစိုက် MOPS ရဲ့ ဈေးနှုန်းအပေါ် အခြေခံ တွက်ချက်တာ ဖြစ်ပြီး လက်ရှိ MOPS ဈေး ကျဆင်းမှုနဲ့ ပြင်ပ ဒေါ်လာငွေလဲနှုန်း ကျဆင်းမှုကြောင့် ပြည်တွင်း စက်သုံးဆီ ဈေးနှုန်း ကျဆင်းခဲတာလို့ လုပ်ငန်းရှင်တွေက ဆိုပါတယ်။
