မဲခေါင် ၊ မေ ၇
ရှမ်းပြည်တောင်ပိုင်း၊ ညောင်ရွှေမြို့နယ် နန်းပန်လမ်းခွဲမှာ စစ်ကောင်စီ လက်အောက်ခံ PNO ပြည်သူ့စစ်နဲ့ အင်းလေးပျူစောထီးအဖွဲ့က ဂိတ်ဖွင့်ပြီး ကားသမားတွေဆီက မတရားငွေတောင်းစားနေတယ်လို့ ဒေသခံတွေကပြောပါတယ်။
PNO ပြည်သူ့စစ်နဲ့ အင်းလေးပျူစောထီးတွေဟာ အင်းလေးအရှေ့ဘက်ကမ်း၊ ကန်ပတ်လမ်းနဲ့ နန်းပန်ဆေးရုံ လမ်းလေးခွဆုံတဲ့ နေရာမှာဂိတ်ဆောက်ပြီး တောင်းစားတာဖြစ်တယ်လို့ ဒေသခံတစ်ဦးက မဲခေါင်သတင်းဌာနကို ပြောပါတယ်။
“ဒီဇယ်တို့ ဆန်အိတ်တို့ သယ်တဲ့ကားတွေဆို သူတို့က ပိုတောင်းစားတယ်။ ဒီဇယ်တစ်ပီပါကို တစ်သောင်းတောင်းတယ်။ ဆန်က တစ်အိတ်တစ်ထောင်ကျပ်တောင်းတာလည်းရှိတယ်။ တစ်ခါတစ်လေ ဆန်အိတ်ရေနဲ့မဟုတ်ပဲ တစ်သောင်းခွဲ၊ နှစ်သောင်း အဲ့လိုတောင်းတာလည်းရှိတယ်။ တောင်းချင်သလို တောင်းနေတာပေါ့ဗျာ။ နန်းပန်ဈေးနေ့တုန်းက ကျွန်တော်ကားက ကုန်အစုံတင်တော့ နှစ်သောင်းပေးခဲ့ရတယ်” လို့ ကားသမားတစ်ဦး က ပြောပါတယ်။
ဒါ့အပြင် ဘိလပ်မြေ၊ ထုံး ၊ အုတ် စတဲ့ အိမ်ဆောက်ပစ္စည်းတွေ စားဆီ၊ ငါးခြောက် စတဲ့ စားသောက်ကုန်ပစ္စည်းတွေကို သယ်ရင်လည်း အဲ့ဒီဂိတ်က တောင်းစားတယ်လို့လည်း သူကပြောပြပါတယ်။
“အဲ့ဒီနေရာက တောင်-မြောက်ဆို အင်းလေးကန်ပတ်လမ်း ၊ အရှေ့ဘက်က ကွန်လုံရွာဘက်ကိုသွားတဲ့လမ်း အနောက်ဘက်ဆင်းရင် နန်းပန်မြို့ ဆေးရုံ၊ ဈေးတွေကိုသွားတာဆိုတော့ လူစည်တယ်။ အသွားအလာများတယ်။ လမ်းလေးခွစုံတဲ့နေရာလည်းဖြစ်တော့ ပြည်သူ့စစ်တွေက ဂိတ်ဆောက်ပြီးလုပ်စားလို့ကောင်းတာပေါ့” လို့ အင်းလေးဒေသခံတစ်ဦးက ဆက်ပြောပြပါတယ်။
အဲ့ဒီဂိတ်မှာရှိတဲ့ ပြည်သူ့စစ်တွေဟာ ကုန်ပစ္စည်းသယ်လာတဲ့ ကားတွေကို ကုန်ပစ္စည်းသယ်ယူခွင့် ထောက်ခံချက်မပါလို့ ဒဏ်ငွေပေးရမယ်ဆိုပြီး ကားသမားတွေဆီက မတရားငွေတောင်းစားတာဖြစ်တယ်လို့ သူကပြောပါတယ်။
“သူတို့ပြောတာ ပစ္စည်းသယ်ယူဖို့ထောက်ခံချက်မပါလို့တဲ့။ ထောက်ခံချက်ယူရင် တစ်စောင် နှစ်သောင်းတဲ့။ ပိုက်ဆံအလကားလိုချင်လို့ လက်နက်အားကိုးနဲ့ သက်သက်တောင်းစားနေတာ။ ကျွန်တော်တို့က တရားမဝင်ပစ္စည်းသယ်တာလည်းမဟုတ်ဘူး။ ဈေးမှာရောင်းနေတဲ့ ပစ္စည်း၊ စားနေတဲ့ ဆန်ကိုသယ်တာလေနော်” လို့ ကိုယ်တိုင် နှစ်သောင်းပေးခဲ့ရတဲ့ အင်းလေးဒေသခံတစ်ဦး က ပြောပါတယ်။
အဲ့ဒီနန်းပန်ဂိတ်မှာ ကုန်ပစ္စည်းသယ်တဲ့ကားတွေကို PNO ပြည်သူ့စစ်နဲ့ အင်းလေးပျူစောထီးတွေက တောင်းစားနေတာဟာ ၂ လနီးပါးရှိလို့ သိရပါတယ်။ နန်းပန်မြို့ဟာ ညောင်ရွှေမြို့နယ်ထဲမှာ ပါဝင်ပြီး ညောင်ရွှေမြို့တောင်ဘက် ၁၆ မိုင်အကွာမှာ ရှိပါတယ်။
CJ – 002
#MeKongNews
#နန်းပန်လမ်းဆုံ
#PNOပျူစောထီး