မဲခေါင်၊ ဧပြီ ၁၈
ရှမ်းပြည်တောင်ပိုင်း၊ အင်းလေးဒေသတွင် အင်းလေးအမျိုးသမီးသမဂ္ဂအဖွဲ့က ဧပြီ ၁၇ ရက် နေ့မှာ လူထုတိုက်ပွဲ၊ စက္ကူလေယာဉ်သပိတ် ပြုလုပ်ခဲ့တယ်လို့ သိရပါတယ်။
စက္ကူလေယာဉ်သပိတ်ပြုလုပ်ခဲ့သလို နှစ်သစ်ကို ကြိုတဲ့အနေနဲ့ ဘုန်းတော်ကြီးကျောင်းတက် ဥပုတ်သည်တွေကိုလည်း ကျန်းမာရေးပြုစုစောင့်ရှောက်ပြုခဲ့တယ်လို့ ဆိုပါတယ်။
စက္ကူလေယာဉ်တွေအပေါ်မှာ စစ်အာဏာရှင်ကို ဆန့်ကျင်တဲ့စာသားတွေ၊ ဆုတောင်းလိုတဲ့ စာသားတွေရေးသားပြီး ပြုလုပ်ခဲ့ကြတာလို့ သိရပါတယ်။
“ပဇီကြီး၊ ဖားကန့်စတာတွေအပြင် မိုးမိတ်၊ ဆီဆိုင်ကအစ တနိုင်ငံလုံး လေယာဉ်တွေနဲ့ ကလေးသူငယ်တွေကအစ ပြည်သူတွေကို ဗုံးကြဲသတ်ဖြတ်နေတဲ့စစ်ကောင်စီကို တော်လှန်သပိတ် တခုအနေနဲ့ တိုက်ခိုက်တာပါ” လို့ အင်းလေးအမျိုးသမီးသမဂ္ဂက တာဝန်ရှိသူတစ်ဦးက မဲခေါင်ကို ပြောပါတယ်။
အဓိကတော့ စစ်ကောင်စီက မြေပြင်ပေါ်က ပြည်သူတွေကို ယုတ်မာရက်စက်စွာ ဗုံးကြဲသတ်ဖြတ်ခဲ့တာတွေကို ရပ်တန်းကရပ်ဖို့၊ မြန်မာနိုင်ငံကို လေယာဉ်ဆီတင်သွင်းနေမှုတွေကို ပိတ်ပင်တားမြစ်ဖို့၊ နိုင်ငံတကာမှာ မြန်မာနိုင်ငံပြည်သူတွေရဲ့ သွေးစွန်းနေတဲ့ငွေတွေ စီးဆင်းနေမှုတွေ ရပ်ဆိုင်းသွားဖို့ ရည်ရွယ်ပြုလုပ်တာလို့ သိရပါတယ်။
စက္ကူလေယာဉ်တွေပေါ်မှာ “ဆုံးရှုံးခဲ့ရတဲ့ ကြယ်ပွင့်လေးတွေအတွက် ကမ္ဘာမကြေဘူး၊ မြောက်အင်းပြန်လာပြီ ဇတ်ကား မကြာမီလာမည်-မျှော်၊ စက္ကူလေယာဉ် ဒုံးလို့ထင် မအလကြီး ပြေးဖို့ပြင်၊ ခေါင်းဆောင်ကောင်းဆိုတာ ပြည်သူတွေကို ဒုက္ခရောက်အောင် မလုပ်ဘူး၊ PDF များအားလုံးဘေးကင်းကြပါစေ၊ မအလ စစ်ခွေး အမြန်ကျဆုံးပါစေ” စသည့် စာသားများရေးသားကာ လေထဲပစ်လွှတ်ဖြန့်ဝေတဲ့ သပိတ်ပြုလုပ်ခဲ့တာလို့ သိရပါတယ်။
အင်းလေး ၁၀၀၉ IPDF နဲ့ အင်းလေးဒေသ အဝေးရောက်ထိုးဖောက်ရေးတပ်ဖွဲ့(ဓားမကူး)တပ်တွေက စစ်အာဏာရှင်ကျဆုံးရေး မြေပြင်မှာလက်နက်စွဲကိုင်တိုက်ပွဲဝင်နေသလို အင်းလေးအမျိုးသမီးသမဂ္ဂ ကလည်း နိုင်ငံရေးအရ စစ်အာဏာရှင်ကို ရရာနည်းလမ်းတွေနဲ့ တော်လှန်တိုက်ပွဲနေတာမှ ယခုလို စက္ကူလေယာဉ်တွေပေါ် စစ်အုပ်စုဆန့်ကျင်ရေးစာသားတွေ ရေးသားပြီး နှစ်သစ်ကူး အထိမ်းအမှတ်အနေနဲ့ သပိတ်ပြုလုပ်ခဲ့တာပါ။
MK-012