မဲခေါင်၊ ဖေဖော်ဝါရီ ၂၂
ရန်ကုန်တိုင်း၊ လှိုင်သာယာမြို့နယ် မီးခွက်စျေးတွင် စျေးရောင်းချနေတဲ့ စျေးသည်အချို့နဲ့ စည်ပင်ဝန်ထမ်းတွေ ဒီကနေ့မနက်ပိုင်းက ရန်ဖြစ်လို့ စစ်ကောင်စီတပ်ဖွဲ့ ဝင်တွေရောက်ရှိလာပြီး စျေးသည်အချို့ကို ဖမ်းဆီးသွားပြီး အင်းစိန်ထောင်ကို တန်းပို့လိုက်တယ်လို့ ဒေသခံတွေက မဲခေါင်သတင်းဌာန ကိုပြောပါတယ်။
ဒီကနေ့မနက်ပိုင်းက မီးခွက်စျေးရှေ့တွင် ရောင်းချနေတဲ့ စျေးသည်အချို့နဲ့ စည်ပင်ဝန်ထမ်းတွေစကားများရန်ဖြစ်ကြပြီး စည်ပင်ဝန်ထမ်းတွေက စစ်ကောင်စီတပ်ကို လှမ်းခေါ်ခဲ့ပြီးနောက် စစ်သားနဲ့ ရဲတွေရောက်ရှိလာပြီး စျေးသည်အချို့ကို ဖမ်းဆီးသွားတာဖြစ်တယ်လို့ ဒေသခံတစ်ဦးကပြောပါတယ်။
“ စျေးရှေ့မှာကျူးပြီးရောင်းတဲ့စျေးသည်တွေနဲ့ဖြစ်ကြတာ။ အရင်ကလည်းအဲ့လိုခဏခဏဖြစ်တယ်။ လင်မယားတွေလိုပေါ့ကွာ။ ဒီနေ့ကတော့စျေးသည်တစ်ယောက် ကိုက်လိုက်တာကစပြီးဖြစ်ကြတာလို့မြင်တဲ့သူကပြောတယ်။ ပြီးတော့ခွေးနဲ့ကိုင်တုတ်လို့စည်ပင်ကောင်တွေကမကျေနပ်ပဲစစ်ကောင်စီဖုန်းဆက်ပြီးလှမ်းခေါ်တာ။ စျေးသည်ဘယ်နှယောက်အဖမ်းခံရလဲတော့သေချာမသိရသေးဘူး။ အဖမ်းခံရတဲ့သူတွေရဲ့မိသားစုဝင်တွေဆက်သွယ်ကြတော့သူတို့ကိုအင်းစိန်ထောင်မှာဖမ်းထားတယ်လို့ပြောတယ်။ ကျန်တာတော့ဘာမှထပ်ပြီးမကြားသေးဘူး” လို့ သူကပြောပါတယ်။
ဖေဖော်ဝါရီ ၂၂ ရက် ဒီကနေ့မနက် ၉ နာရီကျော်ဝန်းကျင်က မီးခွက်စျေးရှေ့ဘိုးရာဇာလမ်ူမပေါ်တွင်ဖွင့်လှစ်ရောင်းချနေတဲ့ စျေးသည်အချို့နဲ့ စည်ပင်ဝန်ထမ်းတွေ ရန်ဖြစ်ခဲ့ပြီးနောက် အခြားစျေးသည်များလည်း ဆိုင်များပိတ်သိမ်းခဲ့ကြပြီး ဒီကနေ့ညနေပိုင်းမှာလည်း ပြန်ရောင်းချသူတွေမရှိဘူးလို့ ဒေသခံတွေကပြောပါတယ်။
အဆိုပါမီးခွက်စျေးရှေ့တွင် စည်ပင်ဝန်ထမ်းများနဲ့ စျေးသည်များ မကြာခဏ စကားများရန်ဖြစ်ကြပေမယ့် ယခုကဲ့သို့ ချက်ခြင်းလာရောက်ဖမ်းဆီးမှုတွေ မရှိခဲ့ဘူးလို့ ဒေသခံတွေကပြောပါတယ်။
ပုံ-မီးခွက်စျေး ပုံဟောင်း
MK-005