မဲခေါင်၊ အောက်တိုဘာ ၄
မိုးဗြဲ PDF အတွက် ပွိုင့်ဖိုက် သေနတ် တစ်လက် ဝယ်ယူဖြည့်တင်းဖို့ ပြုလုပ်နေတဲ့ “မိုးဗြဲအတွက် ပွိုင့်ဖိုက် တစ်လက်” ကမ်းပိန်းမှာ ပါဝင်ကူညီပေးကြဖို့ ကရင်နီ အမျိုးသား ကာကွယ်ရေးတပ်-KNDF ဗျူဟာ (၁) ရဲ့ ဗျူဟာမှူး ဟန်းကော က မေတ္တာရပ်ခံ တိုက်တွန်း လိုက်ပါတယ်။
လက်ရှိ ရှမ်းတောင် အခြေစိုက် မိုးဗြဲ PDF တပ်ရင်း (၁) နဲ့ တပ်ရင်း (၂) ပူးပေါင်းပြီး ပွိုင့်ဖိုက် တစ်လက် ရရှိဖို့ ပြုလုပ်နေတဲ့ ကမ်ပိန်းဟာ အလှူငွေ ရရှိမှု နည်းပါးနေလို့ ဝိုင်းဝန်း ကူညီဖို့ သူကပြောပါတယ်။
“ကျွန်တော်တို့ “မိုးဗြဲ အတွက် ပွိုင့်ဖိုက် တစ်လက်” ဆိုတဲ့ ကမ်ပိန်းမှာ မိုးဗြဲ ဆိုတာ ရဲစခန်းသိမ်း တိုက်ပွဲကနေ ပြီးတော့ မြန်မာပြည်မှာ ပထမဆုံး စစ်ကောင်စီကို ရဲရဲဝံ့ဝံ့ တော်လှန်တဲ့ မြို့ငယ်လေး ဖြစ်ပါတယ်။ ဒီမြို့ငယ်လေးဟာ အခုတိုက်ပွဲတွေ စဉ်ဆက်မပြတ် ဖော်ဆောင်နေတဲ့ မြို့ငယ်လေး ဖြစ်ပါတယ်။ ဒီမြို့ငယ်ကို ကျွန်တော်တို့ တခါပြန်ပြီးတော့ အားပေးအားမြှောက်ပြုရင်းနဲ့ ဒီပွိုင့်ဖိုက် ကမ်ပိန်းကို အားလုံး ပါဝင်ပေးကြဖို့ တိုက်တွန်း တောင်းဆိုပါတယ်” လို့ ဗျူဟာမှူးဟန်းကော ကပြောပါတယ်။
လက်ရှိ ကရင်နီပြည်နယ်မှာ အင်အား အလုံးအရင်းနဲ့ ထိုးစစ်ဆင်နေတဲ့ စစ်ကောင်စီကို PDF၊ KNDF နဲ့ တခြား အဖွဲ့တွေက ခွဲခြားမှု မရှိဘဲ နည်းလမ်းပေါင်းစုံနဲ့ စည်းစည်းလုံးလုံး ခုခံ တော်လှန်နေတယ် ဆိုတာ ပြည်သူတွေ သိတယ်လို့ သူကပြောပါတယ်။
“ကျွန်တော်တို့ တော်လှန်ရေး ပြီးဆုံးတဲ့အထိ သွားနိုင်အောင် ဒီလိုသော ကမ်ပိန်းတွေ တစ်ခုပြီး တစ်ခု တောင်းဆိုတဲ့ ဟာတွေကိုတော့ လူထုအနေနဲ့ အတတ်နိုင်ဆုံး ဖြည့်ဆည်းပေးပြီးတော့ ပါဝင်ပေးကြဖို့လည်း မေတ္တာရပ်ခံပါတယ်။ ဒီ ၂ နှစ်ကျော်သော လှုပ်ရှားမှုမှာ PDF တွေနဲ့အတူ ကျွန်တော်တို့ အမြဲတမ်း ချိတ်ဆက် ဆောင်ရွက်မှုတွေ စစ်ရေးအရဖြစ်စေ နိုင်ငံရေးအရ ဖြစ်စေ ကျွန်တော်တို့ အမြဲတမ်း လက်တွဲ ဆောင်ရွက်နေပါတယ်” လို့ သူကပြောပါတယ်။
“မိုးဗြဲအတွက် ပွိုင့်ဖိုက် တစ်လက်” ကမ်ပိန်းကနေ ကျပ်သိန်း ၅ ထောင် ရရှိဖို့ ရည်မှန်းထားပေမယ့် ၂၇ ရက် ကာလအတွင်း ၁၀ ရာခိုင်နှုန်း နီးပါးသာ ရရှိသေးတဲ့အတွက် ဝိုင်းဝန်း ကူညီပေးကြဖို့ ကမ်ပိန်း တာဝန်ရှိသူတွေက တိုက်တွန်းထားပါတယ်။
ဒီကမ်ပိန်းကို အောက်တိုဘာလ ၂၀ ရက်နေ့ အထိ ပြုလုပ်မှာဖြစ်ပြီး ကူညီလှူဒါန်းလိုသူတွေ အနေနဲ့ “မိုးဗြဲအတွက် ပွိုင့်ဖိုက်တစ်လက်” ဆိုတဲ့ လူမှုကွန်ရက် စာမျက်နှာကို ဆက်သွယ် ကူညီ လှူဒါန်းနိုင်ပါတယ်။
KNDF နဲ့ မိုးဗြဲ PDF ဟာ ပင်လောင်း၊ ဖယ်ခုံ ကနေ တစ်ဆင့် ကရင်နီပြည်ထဲ ဝင်ရောက်ဖို့ ထိုးစစ်ဆင်နေတဲ့ စစ်ကောင်စီတပ်တွေကို မြေပြင်မှာ လက်တွဲ တွန်းလှန် တိုက်ခိုက်နေတဲ့ တပ်ဖွဲ့တွေ ဖြစ်ပါတယ်။
CJ-002
#MeKongNews
#မိုးဗြဲအတွက်_ပွိုင့်ဖိုက်တစ်လက်
#KNDF
#ဗျူဟာမှူး