မဲခေါင်၊ ဩဂုတ် ၂၅
စစ်ကိုင်းတိုင်း၊ ခင်ဦးမြို့နယ်တွင်းက ဒေသခံပြည်သူတွေဟာ မိုးစပါးစိုက်ပျိုးချိန်မှာ စစ်ကောင်စီတပ်က စစ်ကြောင်းထိုးလာတာကြောင့် ကောက်စိုက်၊ ပျိုးနုတ်အလုပ်တွေကိုထားခဲ့ပြီး ထွက်ပြေးနေကြရတယ်လို့ ဒေသခံတွေထံက သိရပါတယ်။
ဩဂုတ်လ ၂၃ ရက်နေ့မှာ ကျေးရွာတွေကို စတင်ဝင်ရောက်ခဲ့တဲ့ စစ်ကောင်စီစစ်ကြောင်းအပါအဝင် ဒီနေ့ ဩဂုတ် ၂၅ ရက်မနက်ပိုင်းမှာ စစ်ကြောင်းနှစ်ခုခွဲပြီး လက်နက်ကြီး/ငယ်တွေနဲ့ ပစ်ခတ် ဝင်ရောက်နေတာကြောင့် ဒေသခံ ၈,၀၀၀ ကျော်ဟာ နေရပ်စွန့်ခွာထွက်ပြေးတိမ်းရှောင်နေကြရတာဖြစ်ပါတယ်။
မနေ့ညက ခင်ဦးမြို့ပေါ်ကနေထွက်လာတဲ့ ခမရ (၃၆၁) စစ်ကြောင်းဟာ ဒီနေ့မနက်ပိုင်းမှာ ပင်တင်းရွာအနီးကို စစ်ကြောင်းထိုး ဝင်ရောက်လာတာကြောင့် ပင်တင်းရွာဒေသခံတွေအပါအဝင် အနီးဝန်းကျင်က ဒေသခံ (၃,၀၀၀) ကျော်ဟာ ဘေးလွတ်ရာကို ထွက်ပြေးနေကြရတယ်လို့ ဒေသခံတွေထံက သိရပါတယ်။
ဒါ့အပြင် ရွှေဘိုနယ် သရက်ပင်ဝန်းကျေးရွာကနေ ခင်ဦးနယ်အနောက်တောင်ခြမ်းက ကျေးရွာတွေဆီကို လက်နက်ကြီး၊ လက်နက်ငယ်တွေပစ်ခတ်ဝင်ရောက်လာတဲ့ အင်အား (၁၀၀) ကျော်ပါ စစ်ကြောင်းကြောင့်လည်း ရွှေဘို – ခင်ဦး နယ်စပ်ကျေးရွာက ဒေသခံ (၅,၀၀၀) ကျော်ဟာလည်း နေရပ်စွန့်ခွာထွက်ပြေးနေကြရတာဖြစ်ပါတယ်။
“တခါတခါတိမ်းရရင်တော့ ပြည်သူ သောင်းနဲ့ချီပြီးတော့ တိမ်းရတာပေါ့။ ခင်ဦးနယ်မှာရောက်တဲ့စစ်ကြောင်းတွေက ရွာတွေကို ပတ်ချာလှည့်ပြီး ထိုးတဲ့ပုံစံမျိုးတွေဆိုတော့ တခါတခါရှောင်ရရင်တော့များတာပေါ့” လို့ ဒေသခံတစ်ဦးက မဲခေါင်သတင်းကိုပြောပြပါတယ်။
စစ်ကောင်စီတပ်တွေဟာ ခင်ဦးမြို့နယ်တွင်းကကျေးရွာတွေကို ဝင်ရောက်စစ်ကြောင်းထိုးချိန်မှာ လမ်းမှာတွေ့တဲ့ ပြည်သူတွေကို ဖမ်းခေါ်သွားလေ့ရှိပြီး ပစ္စည်းသယ်ခိုင်းတာတွေ လုပ်လေ့ရှိသလို၊ ရွာတွေကိုလှည့်လည် မီးရှို့တာ၊ ပြည်သူပိုင်ပစ္စည်းတွေကို ယူဆောင်တာနဲ့ လူတွေဖမ်းဆီးပြီး နှိပ်စက်သတ်ဖြတ်တာတွေလည်း ရှိတယ်လို့ ဒေသခံတစ်ဦးက ဆိုပါတယ်။
အခုရက်ပိုင်းအတွင်း ခင်ဦးမြို့နယ်တွင်းမှာ မိုးတွေဆက်တိုက်ရွာနေတဲ့အပြင် ဒေသခံတွေပြေးလွှားရာလမ်းတွေကလည်း ရွှံ့ဗွက်တွေထပြီး ပျက်စီးနေတာကြောင့် ပြေးလွှားရင်း ဆိုင်ကယ်လဲတာ၊ လူလဲတာတွေကြောင့် ထိခိုက်ဒဏ်ရာရသူတွေလည်းရှိခဲ့တယ်လို့ သိရပါတယ်။
စစ်ဘေးရှောင်ထွက်ပြေးရသူတွေထဲမှာ သက်ကြီးရွယ်အို၊ ကလေးသူငယ်တွေနဲ့ ကိုယ်ဝန်ဆောင်မိခင်တွေလည်း ပါဝင်တာကြောင့် မိုးရေထဲမှာ အမိုးအကာမရှိဘဲ ဒုက္ခရောက်နေကြသလို အစားအစာ၊ ရေနဲ့ ဆေးဝါးလိုအပ်နေတယ်လို့ ဒေသခံတွေက ပြောပြကြပါတယ်။
အခုလ ၂၃ ရက်မှာ ခင်ဦးမြို့နယ်တွင်းစစ်ကြောင်းထိုးလာတာကြောင့် မရမ်းအင်းကျေးရွာနေ အသက် (၅၇) နှစ်အရွယ် ဦးတင့်ဟာ လက်နက်ကြီး၊ လက်နက်ငယ်သံတွေကြား ပြေးလွှားရင်း အမောဖောက်ကာ နှလုံးရပ်သေဆုံးခဲ့တယ်လို့ ခင်ဦးမြို့နယ် သတင်းမှန်ပြန်ကြားရေးအဖွဲ့က ဆိုထားပါတယ်။
ခင်ဦးနယ် အမှတ် (၂) တိုက်နယ်ဒေသတွင်းက အောင်သာကျေးရွာ ဘုန်းကြီးကျောင်းနဲ့ ကျေးရွာတွင်းက ပြည်သူပိုင်နေအိမ်တွေကို လက်နက်နဲ့ပစ်ခတ်ပြီးဝင်ရောက်နေမှုတွေကြောင့် အောင်သာကျေးရွာအပါအဝင် အင်းပေါက်၊ မရမ်းအင်း၊ ကုန်းသာ၊ သဲကုန်းကြီး၊ ဒါန်းကုန်း၊ မှန်တော၊ သိမ်တော်၊ ကျွန်းဆွယ်၊ ကျွန်းလယ်နဲ့ ကြာပင်အိုင် ကျေးရွာဒေသခံတွေ ထွက်ပြေးတိမ်းရှောင်ခဲ့ကြရပါသေးတယ်။
MK – 009
#MeKongNews
#ခင်ဦး
#စစ်ကောင်စီ
#စစ်ကြောင်း
#မိုးစပါး
