မဲခေါင်၊ ဇူလိုင် ၂၇
ကရင်နီပြည်နယ်၊ မယ်စဲ့မြို့နယ်မှာ တိုက်ပွဲတွေ ပြင်းထန်နေပြီး သံလွင်မြစ် အရှေ့ခြမ်းက ကရင်နီပြည် လူမျိုးပေါင်းစုံ လွတ်မြောက်ရေးတပ်ဦး (ကလလတ/KNPLF) ရဲ့ ခံစစ်ကုန်းစခန်းကို စစ်ကောင်စီက မနေ့ နေ့လယ်ပိုင်းမှာ ဗုံးကြဲ တိုက်ခိုက်ခဲ့တယ်လို့ ကရင်နီ စစ်ရေးသတင်းရင်းမြစ်က မဲခေါင်သတင်းဌာနကို ပြောပါတယ်။
သံလွင်မြစ် အရှေ့ခြမ်း၊ ကျောက်ပန်းညိုကျေးရွာ အနီးက ခုမ်းဟပ်ချောင်း KNPLF ခံစစ်စခန်းကုန်းကို မနေ့က နေ့လယ် ၁၂ နာရီ ၀န်းကျင်ခန့် ဂျက်ဖိုက်တာ လေယာဥ် ၂ စီးနဲ့ လာရောက် တိုက်ခိုက်ခဲ့တယ်လို့ ဆိုပါတယ်။
“တိုက်ပွဲဖြစ်နေလို့ လာကြဲတယ်ပဲ ပြောရမှာပဲ။ ၂၂ ရက်နေ့က ကျောက်ပန်းညိုနဲ့ ၀မ်အောင်း(ရှမ်း)ရွာက ကျွန်တော်တို့ဘက်က ပေးလိုက်ရတယ်လေ။ အဲ့ဒါ သူတို့ဘက်ကလည်း ရှေ့ဆက်တိုးဖို့ ကာကင်းကိုပဲ ၁၀၀ လောက်ထုတ်ပြီး သွေးတိုးစမ်းနေလို့ တိုက်ပွဲတွေကတော့ ဖြစ်နေတယ်။ ဗုံးကြဲခံရတာက ထိခိုက်မှုတော့ မရှိပါဘူး” လို့ သူကရှင်းပြပါတယ်။
ပြည်သူ့ကာကွယ်ရေး ပူးပေါင်းတပ်ဖွဲ့တွေရဲ့ ကာကင်းစခန်းရှိတဲ့ အဆိုပါ ကျေးရွာ ၂ ရွာကို စစ်ကောင်စီက အင်အား ၄၀၀ ၀န်းကျင်ခန့်နဲ့ ထိုးစစ်ဆင်လာတာကြောင့် ဇူလိုင်လ ၂၂ ရက်က လက်လွှတ်ပေးခဲ့ရတာ ဖြစ်ပါတယ်။
အဲဒီနောက် စစ်ကောင်စီတပ်တွေက ကျောက်ပန်းညိုကျေးရွာမှာ တပ်စွဲထားသလို နေအိမ် ၂၀ ခန့်ရှိတဲ့ ၀မ်အောင်း (ရှမ်း)ကျေးရွာကိုတော့ ရွာလုံးကျွတ် မီးရှို့ပြီး တပ်စွဲထားတယ်လို့ ဆိုပါတယ်။
လက်ရှိမှာတော့ တိုက်ပွဲတွေ ပြန်ငြိမ်နေပေမဲ့ စစ်ကောင်စီဘက်က လက်နက်ကြီးနဲ့ ဆက်တိုက် ပစ်ခတ်နေသလို ပြည်သူ့ကာကွယ်ရေးတပ်ဖွဲ့တွေ ဘက်ကလည်း ဒရုန်းနဲ့ ဗုံးချတာတွေ ပြုလုပ်နေတယ်လို့ ဖားဆောင်း PDF ပြောရေးဆိုခွင့်ရှိသူက ပြောပါတယ်။
MK-007
#Mekongnews
#မယ်စဲ့မြို့နယ်
#ဖားဆောင်း_PDF
#ကလလတ/KNPLF
