မဲခေါင်၊ ဧပြီ ၂၈
စစ်တပ် လက်ပါးစေ ပြည်သူ့စစ် အဖွဲ့ အများအပြားရှိနေတဲ့ ရှမ်းပြည်နယ် မြောက်ပိုင်းက မူဆယ်မြို့မှာ နေ့စဉ် ဓားပြမှု၊ လုယက်မှုတွေ ဖြစ်နေလို့ ပြည်သူတွေ စိုးရိမ်ထိတ်လန့် နေကြတယ်လို့ ဒေသခံတွေက မဲခေါင်သတင်းကို ပြောပါတယ်။
လက်နက်ကိုင် ပြည်သူ့စစ်အဖွဲ့တွေ စုံလင်များပြားတဲ့ မူဆယ်မှာ ငွေကြေးချမ်းသာတဲ့ အိမ်တွေ၊ ဆိုင်တွေသာမက သာမန်ပြည်သူတွေရဲ့ အိမ်တွေကိုပါ ဓားပြတိုက် လုယက်တာတွေ ဖြစ်နေလို့ ပြည်သူတွေ မလုံမခြုံ ခံစားနေရတယ်လို့ ဒေသခံ တစ်ဦးက ပြောပါတယ်။
“လုယက်မှုတွေ ဖြစ်နေတာ နေ့တိုင်းပဲ။ ထုတ်ပြောတဲ့ ကိစ္စလည်းရှိတယ်၊ မပြောတဲ့ ဟာတွေက ပိုများတယ်။ မူဆယ်မှာက သိတဲ့ အတိုင်း ပြည်သူ့စစ် တပုံတစ်ခေါင်းနဲ့ လက်နက်ကိုင် လူမိုက် လုပ်နေကြတာ။ သူတို့ တိုက်တာလည်း ဖြစ်ရင်ဖြစ်မှာပေါ့။ ဘာလို့ဆို ဓားပြတိုက်ခံရတိုင်း တစ်ခါမှ ပြန်မမိဘူး။ ဒီတိုင်း ပြီးသွားတာပဲ” လို့ သူကပြောပါတယ်။
ဓားပြတိုက်မှုတွေ ဖြစ်တိုင်း စစ်ကောင်စီတပ်ဖွဲ့တွေ လက်အောက်ခံ ရဲတပ်ဖွဲ့တွေ ရောက်လာပြီး လိုက်လံ စစ်ဆေးပေမဲ့ တစ်ခါမှ တရားခံ ဖမ်းမိတာမျိုးတော့ မရှိဘူးလို့ ဒေသခံ တစ်ဦးက ပြောပါတယ်။
မနေ့ ဧပြီလ ၂၇ ရက်ကလည်း မူဆယ်မြို့ ကမ္ဘောဇဝမ်း ခေါက်ဆွဲဆိုင် ပိုင်ရှင်ရဲ့ နေအိမ် ဓားပြတိုက်ခံရပြီး သိန်းထောင်ကျော် တန်ဖိုးရှိတဲ့ လက်ဝတ်လက်စားတွေ၊ တရုတ်ငွေနဲ့ မြန်မာငွေတချို့ ပါသွားတယ်လို့ သိရပါတယ်။
MK-007
#MeKongNews
#မူဆယ်မြို့
#ပြည်သူ့စစ်
#ကမ္ဘောဇဝမ်းခေါက်ဆွဲဆိုင်
