မဲခေါင်၊ ဇူလိုင် ၈
ပဲခူးတိုင်း၊ ဒိုက်ဦးမြို့နယ်၊ ကျိုက်ဇကောအကျဉ်းထောင်မှာ ဖမ်းဆီးချုပ်နှောင်ခံထားရတဲ့ ပဲခူးခရိုင် ဗကသ ဒုတိယဥက္ကဋ္ဌ ကိုခန့်လင်းနိုင်ကို စစ်တပ်က ပစ်သတ်ခဲ့တယ်လို့သတင်းရကြောင်း ဗကသများအဖွဲ့ချုပ်က ဒီနေ့ ဇူလိုင် ၈ ရက်မှာထုတ်ပြန်ပါတယ်။
ဗကသရဲဘော် ကိုခန့်လင်းနိုင်အပါအဝင် နိုင်ငံရေးအကျဉ်းသား ၄ ဦးကို အခုနှစ် မေလ ၂၈ ရက်နေ့မှာ စစ်ကောင်စီလက်အောက်ခံတွေက ခေါ်ထုတ်သွားခဲ့ရာ အဆက်အသွယ်ပြတ်တောက်ခဲ့ပြီး သတင်းပြန်ရချိန်မှာ ကျဆုံးသွားတာကိုသိရတယ်လို့ ထုတ်ပြန်ချက်မှာဖော်ပြထားပါတယ်။
“သူနဲ့နီးစပ်သူတွေကတဆင့် စုံစမ်းသိရတာက ကျိုက်ဇကောထောင်ကနေ သာယာဝတီထောင်ကို ရွှေ့ပြောင်းချိန်မှာ အချုပ်ကားမှောက်တယ်။ အချုပ်ကားမှောက်ချိန်မှာ ထွက်ပြေးမှာစိုးရိမ်တာနဲ့ခြောက်ပစ်ပစ်ရင်းလက်လွန်သွားတယ်လို့ သတင်းကြားရတယ်ပြောတယ်” လို့ ဗကသများအဖွဲ့ချုပ် ဗဟိုအမှုဆောင်တစ်ဦးက မဲခေါင်သတင်းကိုပြောပါတယ်။
အသက် ၂၀ ကျော်အရွယ် ဗကသရဲဘော်ခန့်လင်းနိုင် ကျဆုံးကြောင်းကို ထောင်ကနေ မိသားစုထံစာပို့အကြောင်းကြားတယ်လို့သိရပြီး မိသားစုဝင်တွေအနေနဲ့အလောင်းကိုမတွေ့ရသလို သင်္ဂြိုဟ်ခွင့်လည်းမရခဲ့ဘူးလို့ သူကဆက်ပြောပြပါတယ်။
ပဲခူးခရိုင်ကျောင်းသားများသမဂ္ဂ (ဗကသများအဖွဲ့ချုပ်) ရဲ့ ဒုဥက္ကဋ္ဌဖြစ်သူ ကိုခန့်လင်းနိုင်ဟာ ၂၀၂၁ ခုနှစ်၊ ဒီဇင်ဘာလ ၁၂ ရက်နေ့က အဝေးပြေးကားလမ်းတစ်နေရာမှာ စစ်ကောင်စီတပ်ရဲ့ ကားပေါ်ကနေဆွဲချဖမ်းဆီးတာကိုခံခဲ့ရပြီး ပုဒ်မ ၅၀ (ည)၊ ၅၁ (ဂ) တို့နဲ့ ကျိုက်ဇကောထောင်မှာ ထောင်ဒဏ် ၁၅ နှစ် ချမှတ်ခံခဲ့ရသူ ဖြစ်ပါတယ်။
“ဗကသရဲဘော်တွေအပါအဝင် ပြည်သူလူထုအပေါ် အကြမ်းဖက်ဖမ်းဆီးညှင်းပန်း နှိပ်စက်သတ်ဖြတ်တာတွေဟာ ဖက်ဆစ်တပ်က စစ်ရာဇဝတ်မှုတွေကို ရည်ရွယ်ချက်ရှိရှိကျူးလွန်နေတာဖြစ်တယ်။ ဒီလုပ်ရပ်အတွက် ဖက်ဆစ်တပ်မှာ အပြည့်အဝတာဝန်ရှိတယ်။ တနေ့မှာ ပြည်သူလူထုရဲ့တရားစီရင်မှုကို ဖက်ဆစ်တွေအနေနဲ့ မလွဲမသွေ ခံကြရလိမ့်မယ်” လို့ ဗကသများအဖွဲ့ချုပ် ဗဟိုအမှုဆောင်က ပြောပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ရဲ့ စာရင်းအရ ၂၀၂၁ ခုနှစ် အာဏာသိမ်းပြီးချိန်ကစလို့ စစ်အုပ်စုလက်ချက်ကြောင့် ကျောင်းသား၊ ကျောင်းသူ (၁၂၀၆) ဦးဖမ်းဆီးခံခဲ့ရကာ လက်ရှိအချိန်ထိ (၇၁၆) ဦးထိန်းသိမ်းခံနေရဆဲဖြစ်ပြီး အဲ့ဒီထဲက (၁၃၈) ဦးက ထောင်ဒဏ်ချမှတ်ခံထားရပါတယ်။
ဖမ်းဆီးထောင်ချခံထားရတဲ့ ကျောင်းသား၊ ကျောင်းသူတွေထဲက (၇) ဦးကိုတော့ စစ်ကောင်စီလက်အောက်ခံတွေက သေဒဏ်ချမှတ်ထားတယ်လို့ AAPP က ကောက်ယူထားတဲ့ စာရင်းတွေအရ သိရပါတယ်။
MK – 009
#MeKongNews
#ဗကသ
#ကိုခန့်လင်းနိုင်
#စစ်ကောင်စီ
#ပစ်သတ်
