မဲခေါင်၊ မေ ၈
ရှမ်း-ကရင်နီ နယ်စပ်၊ လွိုင်လင်လေးမြို့၊ ထီးစဲခါးဂိတ်မှာ ပါးရိုက်တဲ့ စစ်ကောင်စီ တပ်ရင်းမှူးကို တပ်သားက ပြန်ပစ်သတ်မှု ဖြစ်ပွားခဲ့တယ်လို့ ဒေသခံ သတင်းရင်းမြစ်တွေက ပြောပါတယ်။
ကရင်နီပြည်၊ လွိုင်လင်လေးမြို့ အခြေစိုက် ခမရ (၅၃၀) တပ်ရင်းမှူးကို တပ်သား တစ်ဦးက ပြီးခဲ့တဲ့ မေလ ၄ ရက်နေ့က ပြန်ပစ်သတ်ခဲ့တာလို့ သတင်းရင်းမြစ်က ပြောပါတယ်။
“အရက်သောက်တာကို တပ်ရင်းမှူးက ပါးရိုက်လို့ ပြန်ပစ်သတ်လိုက်တာတဲ့။ ပစ်တဲ့ တပ်သားလည်း သူ့ကိုယ်သူ ပြန်ပစ်သတ်သွားတယ်။ ၂ ယောက်စလုံး သေသွားတယ်။ ဖြစ်ခါစက တပ်ထဲက အကြီးဆုံး တစ်ယောက် ပြန်အပစ်ခံရတယ်လို့ပဲ သိထားတာ။ နောက်ထပ် စုံစမ်းမှ အပစ်ခံရတာ တပ်ရင်းမှူး ဖြစ်နေတယ်” လို့ အဲ့ဒီ သတင်းရင်းမြစ်က ပြောပါတယ်။
အဲ့ဒီတပ်သားဟာ တပ်ရင်းမှူးက ပါးရိုက် ကန်ကျောက်တာကို မကျေနပ်လို့ ကိုင်ထားတဲ့ သေနတ်နဲ့ တပ်ရင်းမှူး နောက်ကျောကို ပြန်ပစ်သတ်ခဲ့တာလို့ သူကပြောပါတယ်။
“အဲ့ဒီဂိတ်က ကားတစ်စီးကို ၅ ထောင် တစ်သောင်း အဲ့လိုတွေ တောင်းတဲ့ ဂိတ်ပဲ။ ဝင်ငွေကောင်းတဲ့ ဂိတ်လို့ပဲ ပြောရမှာပေါ့။ အခု ဖြစ်သွားတာလည်း အဲ့နေရာမှာပဲ။ အချင်းချင်း မကျေနပ်လို့ ပြန်ပစ်သတ်တာ။ ပစ်တဲ့လူလည်း ကိုယ့်ကိုယ်ကိုယ် ပြန်ပစ်တော့ ၂ ယောက်လုံး သေတာပဲ။ ဂိတ်တွေဖွင့်ပြီး လူထု ပိုက်ဆံကို မတရား တောင်းစားလို့ ဝဋ်လည်တာလို့ပဲ ပြောရမှာပေါ့” လို့ ဒေသခံ တစ်ဦးက မှတ်ချက်ပြု ပြောပါတယ်။
ကရင်နီပြည်တိုးတက်ရေးပါတီ ပြန်ကြားရေး စာမျက်နှာဖြစ်တဲ့ KnIC မှာတော့ စစ်ကောင်စီတပ်သားက တပ်ရင်းမှူးကို ပြန်ပစ်သတ်တဲ့ ကိစ္စဟာ အခု အပတ်ထဲမှာ ဖြစ်ပွားခဲ့တာဖြစ်ပြီး အသေးစိတ်ကို ဆက်လက် စုံစမ်းနေတယ်လို့ ထုတ်ပြန်ထားပါတယ်။
သေဆုံးသွားတဲ့ စစ်ကောင်စီ အလောင်း ၂ လောင်းကိုတော့ စစ်ကောင်စီတပ်ဖွဲ့ဝင်တွေက လွိုင်ကော်မြို့ရှိ စစ်ဆေးရုံကို သယ်ဆောင်သွားတယ်လို့ သိရပါတယ်။
လွိုင်လင်လေးမြို့ဟာ ရှမ်း-ကရင်နီ နယ်စပ် အနီး တည်ရှိပြီး ထီးစဲခါး ဂိတ်ကတော့ တံတား တောင်ဘက်ခြမ်းမှာ တည်ရှိကာ ရှမ်းပြည်နယ်ထဲ ပါဝင်နေတဲ့ တံတား မြောက်ဘက်ခြမ်းကိုတော့ စစ်ကောင်စီ လက်အောက်ခံ PNO ပြည်သူ့စစ်က ဂိတ်ဖွင့်ငွေတောင်းနေတာ ဖြစ်ပါတယ်။
CJ – 002
#MeKongNews
#ထီးစဲခါးဂိတ်
#တပ်ရင်းမှူး
#လွိုင်လင်လေးမြို့
