မဲခေါင်၊ သြဂုတ် ၂၈

ရှမ်းပြည်နယ်ရဲ့ မြို့တော် တောင်ကြီးမြို့မှာ လျှပ်စစ်မီတာ မဆောင်တဲ့ နေအိမ်တွေကို မြို့နယ်လျှပ်စစ်ရုံး-EPC နဲ့ မီတာ ကောက်ခံခွင့် ရထားတဲ့ ကန်ထရိုက် လင်းသီဟကုမ္ပဏီက မီတာ ဖြုတ်သိမ်း တရားစွဲဖို့ ပြင်ဆင်နေတယ်လို့ သတင်းအရင်းအမြစ်တွေဆီက သိရပါတယ်။

ဩဂုတ်လ အစပိုင်းကပြီး မြို့မ၊ စိန်ပန်း၊ ရွှေတောင်၊ ရေအေးကွင်း၊ ဘုရားဖြူ၊ ကျောင်းကြီးစု၊ ကံကြီး စတဲ့ ရပ်ကွက်တွေမှာ မီတာဆောင်ဖို့ အခုလို ဖိအားပေးနေတာလို့ ဆိုပါတယ်။

မြို့မရပ်ကွက်မှာ နေထိုင်တဲ့ လျှပ်စစ်မီတာ ဖြုတ်ခံရသူ တစ်ဦးက “မီတာ မဆောင်တာ ၂ နှစ်ကျော် ကြာသွားလို့ အကုန် လာဖြုတ်သွားတာ။ မီတာဘောက်က ၃ လုံး။ ၂ လုံးအတွက် ရုံးမှာ သွားဆောင်တော့ လက်မခံဘူး။ ကြွေးကျန်လို့ တရားစွဲဖို့ တရားရုံး တင်ထားတယ်တဲ့။ တောင်ကြီးက လူတွေက သိတဲ့အတိုင်း တရားစွဲတာတို့၊ တရားရုံးတို့ဆို သေအောင်ကြောက်တာ။ ပုဒ်မလည်း မသိကြဘူးလေ။ အဲတာနဲ့ EPC လူကြီးကို တောင်းပန်ပြီး ငွေသွင်းခဲ့ရတယ်” လို့ ပြောပါတယ်။

အရင်က မီတာကြွေးကျန်ပါက မြို့နယ် EPC ကို ရက်လွန်ကြေး စုစုပေါင်း ၃,၀၀၀ ကျပ်သာ ပေးဆောင်ရပေမယ့် လက်ရှိ တစ်လချင်းကို ၃,၀၀၀ ကျပ် ပေးဆောင်နေရတာကြောင့် နစ်နာမှုတွေ ရှိတယ်လို့ ကျောင်းကြီးစု ရပ်ကွက်နေ မီတာကြွေးကျန်သူ တစ်ဦးက ပြောပါတယ်။

“အရင်ကဆို တစ်လကျန်လည်း ၃,၀၀၀ (ကျပ်) ၆ လ ကျန်လည်း ၃,၀၀၀ ။ အခုက တစ်ရွက် ၃,၀၀၀ ဆိုတော့ ဆောင်ရတဲ့ မီတာကြေးထက် ဒဏ်ကြေးက ပိုများနေတယ်။ အိမ်မှာက တစ်လကို ၂,၅၀၀ ပဲ ကျတာလေ။ ဒဏ်ကြေးက ၃,၀၀၀ ဆိုတော့ စဉ်းစားကြည့်လေ။ တစ်နှစ်စာပဲ ၃၆,၀၀၀ ကျနေပြီ” လို့ပြောပါတယ်။

အရင်နှစ်ကလည်း လျှပ်စစ်မီတာ ဖြတ်တောက်ခံရတဲ့ နေအိမ်တွေ မီတာကြေး ပေးဆောင်ပြီးနောက် ပြန်လည် တပ်ဆင်လိုပါက ၂၀,၀၀၀ ကျပ်ဝန်းကျင်သာ ပေးဆောင်ရပေမယ့် လတ်တလောမှာတော့ မြို့နယ် EPC နဲ့ လင်းသီဟကုမ္ပဏီက တောင်းသလောက် ပေးနေရတယ်လို့ သူက ဆက်ပြောပါတယ်။

တောင်ကြီးမြို့မှာ စစ်အာဏာသိမ်းပြီးနောက်ပိုင်း တစ်မြို့လုံးနီးပါး မီတာ မဆောင်ခဲ့ပေမယ့် ၂၀၂၂ ခုနှစ် နှစ်ဦးပိုင်းကစပြီး မဆောင်တဲ့ အိမ်တွေကို လျှပ်စစ်မီး ဖြတ်တောက်လာတာကြောင့် မီတာပြန်ဆောင်သူ များလာပြီး မြို့နယ် EPC နဲ့ လင်းသီဟကုမ္ပဏီက အခုလို ခြိမ်းခြောက် ကောက်ခံနေတာလို့ သိရပါတယ်။

CJ-007

#MeKongNews

#တောင်ကြီးမြို့

#EPC

#လင်းသီဟကုမ္ပဏီ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)