မဲခေါင်၊ ဧပြီ ၂၄
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသအခြေစိုက် အင်းလေးအမျိုးသမီးသမ္မဂအဖွဲ့ (IWU) က လင်လမ်တောင် ကျေးရွာအုပ်စု၊ ညောင်လေးပင်ကျေးရွာမှာ တိုက်ပွဲ၀င်နေတဲ့ တော်လှန်ရေးအင်အားစုတွေအတွက် ဘလာချောင်ကြော် သွားရောက်လှူဒါန်းခဲ့တယ်လို့ အဖွဲ့တာ၀န်ရှိသူတွေဆီက သိရပါတယ်။
IWU အနေနဲ့ မနေ့ (ဧပြီ ၂၃) ရက်မှာ ပျားစစ်ကြောင်း ကို သွားရောက်လှူဒါန်းခဲ့တာ ဖြစ်ပြီး ဧပြီ တစ်လအတွင်း ၃ ကြိမ်တိတိ လှူဒါန်းနိုင်ခဲ့ပြီလို့ ဆိုပါတယ်။
IWU အတွင်းရေးမှူး မကြိုးကြာ က“အရင်ကလည်း ကျွန်မတို့ လှူခဲ့တာတွေ ရှိတယ်ပေါ့နော်၊ ၁၀၀၃ တို့တွေရောပေါ့၊ အဲ့ဒါကတော့ နည်းနည်း ကြာသွားပြီပေါ့၊ လောလောဆယ် ကျွန်မတို့လှူပေးခဲ့တာကတော့ ၁၀၀၆ ရယ်၊ ၁၀၀၉ ရယ်၊ ဗျူဟာ ၂ ရယ်၊ ပျားစစ်ကြောင်း တို့ဖြစ်တယ်ပေါ့နော်၊ ဒီရှမ်းတောင်မှာရှိတဲ့ အဖွဲ့တွေပေါ့၊ တခြားအဖွဲ့တွေလည်း လှူဖို့ ကျန်နေသေးတာပေါ့နော်၊ အဲ့ဒါတွေလည်း လှူနိုင်ဖို့ ကျွန်မတို့ ကြိုးစားနေတယ်ပေါ့နော်” လို့ ပြောပါတယ်။
ပြည်သူတချို့က ထည့်၀င်ပေးလာတဲ့ ငါးခြောက်၊ ကြက်သွန်၊ မြေပဲ၊ ငရုတ်သီး တို့နဲ့အတူ IWU အနေနဲ့ လိုအပ်တာတွေ စိုက်ထုတ်ပြီး IWU အဖွဲ့၀င်တွေက ကြော်လှော်ထုပ်ပိုးကာ သက်ဆိုင်ရာတပ်ရင်းတွေဆီကို လှူဒါန်းခဲ့တာပဲ ဖြစ်ပါတယ်။
အခုလို ရာသီဥတု ပူပြင်းတဲ့ ကာလမျိုးမှာ ရှေ့တန်းထွက်နေရတဲ့ တော်လှန်ရေး တပ်သားတွေအတွက် ရေနဲ့အဆာ ပြေမုန့်တွေ လိုအပ်နေပြီး IWU အနေနဲ့ နောက်ထပ် လှူဒါန်းနိုင်ဖို့လည်း ကြိုးစားနေတယ်လို့ တာဝန်ရှိသူတွေဆီက သိရပါတယ်။
“အရင်ကတော့ ကျမတို့အဖွဲ့ထဲက သူ့ချိတ်အဆက်နဲ့သူထည့်ဝင်လှူဒါန်းတာပေါ့၊ အခုလိုမျိုး လိုင်းပေါ်မှာတော့ အလှူမခံဖူးဘူး ဒါပေမဲ့ ပါဝင်ချင်တယ်ဆိုရင် ကျမတို့အင်းလေးအမျိုးသမီးသမဂ္ဂ page ကိုဆက်သွယ်လှူဒါန်း နိုင်ဖို့တော့ လုပ်ထားပါတယ်ရှင့်၊ အဲဆိုရင်တော့ကျမတို့အနေနဲ့ certificate ထုတ်ပေးမှာဖြစ်ပါတယ်ရှင့် ” လို့ မကြိုးကြာက ဆက်ပြောပြပါတယ်။
အခု ဧပြီလ တစ်လတာအတွင်း ၅ ရက် ၊ ၈ ရက် နဲ့ ၂၃ ရက် တို့မှာ ပျားစစ်ကြောင်းနဲ့ အမျိုးသား ညီညွတ်ရေး အစိုးရ (NUG) လက်အောက်ခံ အလယ်ပိုင်းတိုင်း စစ်ဆင်ရေး ၁၀၀၉၊ ၁၀၀၆ စတဲ့ တပ်ရင်းတွေအပြင် ဖေဖော်၀ါရီလ ၂၁ ရက်နေ့ကလည်း ဗျူဟာ ၂ ကို လှူဒါန်းခဲ့သေးတယ်လို့ ဆိုပါတယ်။
အင်းလေးဒေသအတွင်း နိုင်ငံရေးတက်ကြွလှုပ်ရှားတဲ့ အမျိုးသမီး အဖွဲ့အစည်းအနေနဲ့ ၂ ဖွဲ့ရှိပြီး အဲ့ဒီအဖွဲ့တွေက တော့ IWU နဲ့ Justice Movement For Community – Innlay (JMC) ဖြစ်တယ်လို့ ဒေသခံတွေဆီက သိရပါတယ်။
MK_015
