မဲခေါင် ၊ မေ ၇
ရှမ်းပြည်နယ်တောင်ပိုင်း၊ ဆီဆိုင်မြို့မြောက်ဘက် ၁၁ မိုင်အကွာမှာ စစ်ကောင်စီက တိုက်ပွဲအတုဖန်တီးပြီး PDF တွေက စစ်တပ်ယာဉ်တန်းကို စောင့်ကြိုပစ်ခတ်မှုကြောင့် တိုက်ပွဲဖြစ်ပွားခဲ့သလိုမျိုး လုပ်ဆောင်နေတယ်လို့ စုံစမ်းသိရှိရပါတယ်။
ဒီကနေ့(မေ ၇ ရက်) မနက်မှာ စစ်ကောင်စီယာဉ်တန်းဟာ ဆီဆိုင်မြို့မြောက်ဘက် ၁၁ မိုင်အကွာ နန်းဩရွာမြောက်ဘက်မှာရှိတဲ့ သရက်ပင်ကြီးအကွေ့နားမှာ တိုက်ပွဲဖြစ်ပွားသယောင် သေနတ်အချက်ရေပေါင်းများစွ ာပစ်ခတ်ပြီး တိုက်ပွဲအတု ဖန်တီးခဲ့တာဖြစ်ပါတယ်။
တိုက်ပွဲအတုဖန်တီးပြီးနောက် PDF က သူတို့ စစ်ယာဉ်တန်းကို စောင့်ကြိုပစ်ခတ်တာလို့ စစ်ကောင်စီက လူထုတွေကြား သတင်းအမှားတွေ ဖြန့်နေတယ်လို့ သတင်းအရင်းအမြစ်တွေဆီကနေ စုံစမ်းသိရှိရပါတယ်။
“ဒီမနက် ၉ နာရီလောက်မှာ သေနတ်သံတော့ ကြားရတယ်ဗျ။ နန်းဩ ရွာရဲ့ မြောက်ဘက် သရက်ပင်ကြီးရှိတဲ့ အကွေ့မှာပစ်ကြတာလို့ပြောတယ်။ ပထမ လက်နက်ငယ် ၅ ချက် ၆ ချက်လောက်ကြားတယ်။ ပြီးမှ လက်နက်ငယ်သံတွေ ဆက်တိုက် ကြားရတယ်။ ၁၀ မိနစ်လောက်ကြားပြီး ပြန်ငြိမ်သွားတယ်” လို့ ဆီဆိုင်မြို့နယ် ဒေသခံတစ်ဦးကပြောပါတယ်။
တောင်ကြီး – လွိုင်ကော်ကားလမ်းမကြီးအတိုင်း ဦးတည်နေတဲ့ ကား ၁၀ စီးလောက်ပါဝင်တဲ့ စစ်ကောင်စီ ယာဉ်တန်းဟာ အဲ့ဒီနေရာအရောက်မှာ ပစ်ခတ်မှုတွေ ဖြစ်ပေါ်ခဲ့ပြီးနောက် နောက်ကြောင်းပြန်လှည့်သွားခဲ့တယ်လို့ စုံစမ်းသိရှိရပါတယ်။
“ဆိုက်ခေါင်ကျေးရွာကို ဖြတ်သွားတာ မကြာဘူး တစ်နာရီလောက်ကြာတော့ ပြန်လှည့်လာတာကိုတွေ့ရတယ်။ တောင်ကြီးဘက်ကို ပြန်တက်သွားတယ်။ ဆီဆိုင်မရောက်ခင်မှာ ပစ်ခတ်မှုတွေဖြစ်လို့ ပြန်လှည့်လာတာလို့ ပြောကြတယ်ဗျ” လို့ နောက်ထပ်ဒေသခံတစ်ဦးကပြောပါတယ်။
ပစ်ခတ်မှုဖြစ်ပွားတဲ့နေရာမှာ ဘယ်လက်နက်ကိုင်တပ်ဖွဲ့မှ မရှိသလို တောအုပ်တွေလည်းမရှိလို့ ဘယ်အဖွဲ့မှ ချုံခိုတိုက်ခိုက်တာ မဟုတ်ပဲ စစ်ကောင်စီက တိုက်ပွဲတု ဖန်တီးသာမျိုးသာဖြစ်တယ်လို့ ပအိုဝ်းဒေသ နယ်မြေကျွမ်းကျင်သူတစ်ဦးက သုံးသပ်ပြောဆိုပါတယ်။
“ကျွန်တော်ထင်တာတော့ ကရင်နီဖက်ကို မဆင်းချင်လို့ တိုက်ပွဲတု ဖန်တီးတာဖြစ်မယ်ထင်တယ်။ ဒါမှမဟုတ် သူတို့ကို PDF တွေက ဆီဆိုင်အထိ လာရောက်ပစ်ခတ်နေပြီဆိုပြီး ပအိုဝ်းလူထုအကြား သတင်းအမှားတွေ ဖြန့်ချင်တာလည်း ဖြစ်နိုင်တယ်။ ဒါပေမယ့် အဲ့နေရာက PDF တွေလာဖို့မလွယ်ပါဘူး။ စစ်တပ်ဂိတ်ကော ပြည်သူ့စစ်ဂိတ်ကော အဆင့်ဆင့်ရှိနေသေးတဲ့အပြင် ဆီဆိုင်မြို့ထဲမှာလည်း တပ်ရင်း ၂ ရင်းရှိသေးတယ်လေ။ PDF က လုပ်ရင် ဆီဆိုင်မြို့နယ်တောင်ဘက်မှာပဲ လုပ်မှာပေါ့” လို့ ပအိုဝ်းဒေသ နယ်မြေကျွမ်းကျင်သူတစ်ဦးက သုံးသပ်ပါတယ်။
ဒါ့အပြင် အဲ့ဒီနေရာဟာ စောင့်ကြိုပစ်ခတ်မှု ပြုလုပ်လို့ကောင်းတဲ့ နေရာမဟုတ်သလို PDF တွေက စောင့်ကြိုပစ်ခတ်မှုပြုလုပ်ရင်လည်း လက်နက်ငယ်တွေနဲ့ အနည်းငယ်ပစ်ခတ်တာမျိုးထက် အင်အားအသားစီးနဲ့ အပိုင်စောင့်ပြီး ပစ်ခတ်တာမျိုးကသာ ပိုလုပ်နိုင်ခြေရှိတယ်လို့ သူကသုံးသပ်ပါတယ်။
“တစ်ကယ်လို့ PDF ကပစ်ရင် အင်အားအသားစီးနဲ့ ပစ်တာမျိုး၊ လက်နက်ကြီး လက်နက်ငယ်နဲ့ပစ်တာမျိုး ပိုဖြစ်နိုင်တာပေါ့။ အခုက လက်နက်ငယ်ပစ်ခတ်သံပဲကြားရတာဆိုတော့ အတုဖန်တီးတာက ပိုဖြစ်နိုင်ခြေများတာပေါ့။ နောက်တစ်ခုက PNO ကလည်း လူထုတွေကို ကျည်ဆံဖိုး တစ်အိမ်ငါးသောင်း အနည်းဆုံးကောက်ထားတော့ နယ်မြေမတည်ငြိမ်ကြောင်း ဖောရှိုးလုပ်ပြတာလားပေါ့။ PDF အနေနဲ့က အဲ့ဒီအထိ လာပစ်ရင် ကရင်နီဘက်ကို ပြန်ဆုတ်ဖို့က မလွယ်ပါဘူး။ ဆီဆိုင်မှာက တပ်ရင်း ၂ ရင်းထိုင်ထားတာလေနော်။ ဒါကြောင့် စစ်ကောင်စီက တိုက်ပွဲတုဖန်တီးတာပဲဖြစ်တယ်လို့ ကောက်ချက်ချနိုင်ပါတယ်”လို့ ပအိုဝ်းဒေသ နယ်မြေကျွမ်းကျင်သူက ပြောပါတယ်။
အဲ့ဒီ စစ်ကောင်စီယာဉ်တန်း ပစ်ခတ်ခံရတယ်ဆိုတဲ့ နန်းဩကျေးရွာမြောက်ဘက် သရက်ပင်ကြီးရှိတဲ့ အကွေ့ နေရာဟာ ကရင်နီပြည်နယ်စပ်နဲ့ ၅၈ မိုင်အထိ အကွာအဝေးရှိပါတယ်။
ဒါ့အပြင် အဲ့ဒီနေရာဟာ စစ်ကောင်စီ နဲ့ PNO ပြည်သူ့စစ်တို့ရဲ့ တပ်စခန်းနှစ်ခုကြားက အလယ်တည့်တည့်မှာရှိပါတယ်။ အဲ့ဒီပစ်ခတ်မှုဖြစ်ပွားတဲ့ နေရာဟာ ဆီဆိုင်မြို့မှာရှိတဲ့ စစ်ကောင်စီရဲ့၄၂၃၊ ၄၂၄ တပ်ရင်းကနေ ၁၁ မိုင်ကျော်ကွာဝေးပြီး ဆိုက်ခေါင်မှာရှိတဲ့ PNO ပြည်သူ့စစ်ရဲ့ အောင်ဆုဗွေစခန်းနဲ့လည်း ၁၁ မိုင်ကွာဝေးပါတယ်။
CJ – 002
#MeKongNews
#ဆီဆိုင်မြို့
#တိုက်ပွဲတုဖန်တီး
