မဲခေါင်၊ ဖေဖော်ဝါရီ ၁၈
တောင်ကြီးမြို့၊ အနောက်မြို့ပတ်လမ်းမှာရှိတဲ့ ဆက်သွယ်ရေးတပ်ပိုင်မြေမှာ ဆောက်လုပ်ထားတဲ့ ရှမ်းရိုးမတိုက်တန်းတွေကို စစ်တပ်က ဒီနေ့မနက်ပိုင်းကစပြီး ဘူဒိုဇာနဲ့ထိုးကာ အပြီးသတ်ဖျက်နေပြီလို့ ဒေသခံတွေထံကနေ သိရပါတယ်။
စစ်ကောင်စီတပ်နဲ့ ရဲတွေဟာ အနောက်မြို့ပတ်လမ်း ရွိုင်ရယ်စတားဟိုတယ်နားကနေစပြီး ရှမ်းရိုးမတိုက်တန်းအဆုံးအထိ လမ်းပိတ်ကာ “တပ်ပိုင်မြေမကျူးကျော်ရ” စာတန်းပါ ဆိုင်းဘုတ်တွေစိုက်ပြီး ဆိုင်ခန်းတွေကို ဖျက်ဆီးနေတာလို့ ဒေသခံတစ်ဦးက မဲခေါင်ကို ပြောပါတယ်။
“လုံခြုံရေးတွေ အပြည့်ချထားတယ်။ မီးကြိုးတွေဖျက်တယ်။ တခန်းချင်းစီ ချိတ်ပိတ်ပြီးဖျက်တော့တာပဲ”လို့ သူက ပြောပါတယ်။
၂၁၂ ဆက်သွယ်ရေးတပ် မြေနေရာပေါ်မှာဆောက်ထားတဲ့ အဲဒီဆိုင်ခန်းတွေဟာ ၂၀၀၃ ခုနှစ်က ကန်ထရိုက်ဦးစံလင်းဆိုသူထံကနေ နှစ် ၃၀ နေထိုင်ခွင့်နဲ့ စာချုပ်ချုပ်ဆို ဝယ်ယူထားတာဖြစ်တာကြောင့် နေထိုင်ခွင့် ၁၀နှစ်ကျော်ကျန်သေးတယ်လို့ ဆိုင်ခန်းပိုင်ရှင်တစ်ဦးက မဲခေါင်သတင်းဌာနကို ပြောပါတယ်။
အခုလို အဓမ္မပြောင်းရွှေ့ခိုင်းပြီး ဖျက်ဆီးပစ်တာကြောင့် တိုက်ခန်းနေပြည်သူအများစု ဒုက္ခရောက်ကြရတယ်လို့ သူက ဆိုပါတယ်။
ရှမ်းရိုးမတိုက်တန်းတွေကို မနေ့ ဖေဖော်ဝါရီလ ၁၇ရက်ကတည်းက တပိုင်းတစဖျက်သိမ်းနေတာဖြစ်ပြီး လက်ကျန်ပစ္စည်းဝင်သိမ်းတဲ့ အသက် ၂၀အရွယ်လူငယ်တစ်ဦး အုတ်တံတိုင်းပိပြီးသေဆုံးသွားတယ်လို့ ခမ်းသားငေါဝ်း သတင်းဌာနက ဖော်ပြပါတယ်။
CJ – 001
#MeKongNews
#တောင်ကြီး
#ရှမ်းရိုးမတိုက်တန်း