မဲခေါင်၊ မတ် ၄
စစ်ကိုင်းတိုင်း၊ စစ်ကိုင်း-မုံရွာလမ်းပိုင်းမှာ စစ်ကောင်စီ ယာဉ်တန်းကို ကာကွယ်ရေးတပ်တွေ မနေ့က ဆက်တိုက် မိုင်းဆွဲ တိုက်ခိုက်ရာ စစ်သား ၅ ဦး သေဆုံးခဲ့တယ်လို့ People’s Army To Fight Dictatorship-PAFD က ထုတ်ပြန်လိုက်ပါတယ်။
စစ်ကိုင်းကနေ မုံရွာဘက် သွားနေတဲ့ စစ်ကား ၁၃ စီးပါ ယာဉ်တန်းကို မနေ့ မွန်းလွဲပိုင်းက မြင်းမူမြို့နဲ့ ဝမ်းပြည့်ကျေးရွာ ကြားမှာ မိုင်းဆွဲ တိုက်ခိုက်ခဲ့ရာ စစ်ကား တစ်စီးကို တိတိကျကျ ထိမှန်လို့ စစ်သား ၂ ဦး သေဆုံးခဲ့တယ်လို့ ဆိုပါတယ်။
အဆိုပါ စစ်ယာဉ်တန်းကို ဝမ်းပြည့်ရွာနဲ့ အလ္လကပ္ပရွာကြားမှာ ၂ ကြိမ် ထပ်မံ မိုင်းဆွဲ တိုက်ခိုက်ခဲ့ရာ စစ်သား ၃ ဦး ပွဲချင်းပြီး သေကာ အများအပြား ဒဏ်ရာရနိုင်တယ်လို့ PAFD ကပြောပါတယ်။
ဒီစစ်ဆင်ရေးကို People’s Army To Fight Dictatorship-PAFD-တပ်ခွဲ DK PDF(MMU)၊ People’s Knight Defense Force Myinmu(PKDF.MMU)၊ မြင်းမူမြို့တိုက်နယ် အနောက်ခြမ်း ပ က ဖ နဲ့ D.B.B.F.MMU မဟာမိတ် အဖွဲ့တွေ ပူးပေါင်း လုပ်ဆောင်ခဲ့တယ်လို့ သိရပါတယ်။
စစ်ကောင်စီတပ်တွေဟာ စစ်ကိုင်း-မုံရွာ လမ်းပိုင်းကို အသုံးပြုကာ စစ်ကိုင်းမြို့နယ်နဲ့ မုံရွာမြို့နယ်မှာ စစ်အင်အား တိုးချဲ့တာတွေ၊ ကျေးရွာတွေကို စစ်ကြောင်းထိုး မီးရှို့ဖျက်ဆီးတာတွေကြောင့် ဒေသခံ ကာကွယ်ရေးတပ်တွေက စစ်ယာဉ်တန်းတွေကို မကြာခဏ ကြားဖြတ် တိုက်ခိုက်နေတာပါ။
MK-007
