မဲခေါင်၊ ဇူလိုင် ၁၁
ရှမ်းပြည်နယ် မြောက်ပိုင်း၊ ကွတ်ခိုင်မြို့အနီး၊ နောင်ဆွေရွာနားမှာ ဇူလိုင်လ ၁၀ ရက်နေ့၊ မွန်းတည့် ၁၂ နာရီ ဝန်းကျင်က စစ်ကောင်စီနဲ့ KIA တို့ တိုက်ပွဲ ဖြစ်ပွားခဲ့တယ်လို့ ဒေသခံတွေက ပြောပါတယ်။
နောင်ဆွေရွာအနီး၊ မန်ဘန်ရွာ လမ်းဆုံ အမှိုက်ပုံကုန်းမှာ သိန္နီဘက်က စစ်ကြောင်းထိုးလာတဲ့ စစ်ကောင်စီတပ် ခလရ (၂၄၁)၊ (၂၄၂) ပူးပေါင်း အင်အား ၁၀၀ ခန့်နဲ့ KIA တပ်မဟာ (၄)၊ တပ်ရင်း (၃၉) တို့ တိုက်ပွဲ ဖြစ်ပွားခဲ့တာလို့ ဆိုပါတယ်။
“ ကွတ်ခိုင် စစ်တပ်ကနေ ပစ်ထုတ်လိုက်တာ။ လက်နက်ကြီး ရန်းပစ်တာ” လို့ ဒေသခံ အမျိုးသား တစ်ဦး ကပြောပါတယ်။
မန်ဘန်ရွာ အမှိုက်ပုံ အနီးမှာ စစ်တပ်က ပစ်ခတ်မှုကြောင့် ပြည်သူ တစ်ဦး ခြေထောက်ထိသွားတယ်လို့ သတင်းတွေ ထွက်နေပေမယ့် အတိအကျ မသိရသေးဘူးလို့ သူက ပြောပါတယ်။
“ တနေ့ကလည်း တိုက်ပွဲ ဖြစ်တယ်ပြောတာ အရမ်းကြီး ပြင်းပြင်းထန်ထန် အသံတော့ မကြားဘူး။ သူတို့ လှုပ်ရှား သွားလာနေကြတယ်” လို့ ကွတ်ခိုင်မြို့ခံ တစ်ဦးက ပြောပါတယ်။
စစ်ကောင်စီတပ် လှုပ်ရှားနေတဲ့ ကွတ်ခိုင်နဲ့ နမ့်ဖတ်ကာ ဘက်မှာ လက်နက်ကြီး ရန်းသမ်း ပစ်ခတ်တာတွေ ရှိနေတယ်လို့ သူက ပြောပါတယ်။
စစ်ကောင်စီ စစ်ကြောင်းထိုး လှုပ်ရှားသွားလာစဉ် နမ့်ဖတ်ကာ စစ်ကောင်စီတပ်ကနေ လမ်းကြောရှင်းလင်း ပေးတဲ့ပုံစံနဲ့ လက်နက်ကြီး ပစ်ခတ်ပေးတာ မကြာခဏ ကြားရတယ်လို့ နမ့်ဖတ်ကာ ဒေသခံ အမျိုးသမီး တစ်ဦးက ပြောပါတယ်။
ဇူလိုင် ၉ ရက်နေ့၊ မနက်ပိုင်း ၁၀ ဝန်းကျင်က ကွတ်ခိုင်၊ လွယ်ဆမ်ဆစ်တောင်ခြေ၊ နမ့်ပါချီးရွာနဲ့ ၃၈ မိုင် မန်ပြိန်းရွာကြား၊ ပြည်ထောင်စုလမ်းမပေါ်က တာဝါတိုင်အနီးရှိ စစ်ကောင်စီတပ်ဖွဲ့ကို လက်နက်ကိုင် အဖွဲ့ တစ်ခုက ပစ်ခတ်တိုက်ခိုက်ခဲ့ပြီး ညနေပိုင်း ၆ နာရီခန့်မှာ လားရှိုးဘက်မှ ကွတ်ခိုင်ဘက်ကို လာတဲ့ စစ်ကောင်စီ ကားတန်း မိုင်းဆွဲ တိုက်ခိုက်ခံခဲ့ရတယ်လို့ ဒေသခံတွေက ပြောပါတယ်။
ဒါ့အပြင် ဇူလိုင်လ ၈ ရက်နေ့၊ မနက် ၁၀ နာရီ ခန့်ကလည်း လားရှိုးကနေ ကွတ်ခိုင်ဘက် စစ်ကြောင်းချီ တက်တာတဲ့ စစ်ကောင်စီကားတွေကို လုံခြုံရေး ယူပေးနေတဲ့ စစ်ကောင်စီတပ်ဖွဲ့နဲ့ KIA တပ်မဟာ (၄) တို့ နမ့်ပါချီးအနီး ပါဂျိုရွာ နဲ့ မန်ပြိန်းရွာကြား တိုက်ပွဲ ဖြစ်ပွားခဲ့ပါသေးတယ်။
ကွတ်ခိုင်မြို့အနီး နမ့်ပါချီးရွာ နဲ့ ပါဂျိုရွာ အနီးဝန်းကျင်မှာ မကြာခဏ တိုက်ပွဲ ဖြစ်ပွားလေ့ရှိပြီး တိုင်ရင်းသား လက်နက်ကိုင်အဖွဲ့တွေဖြစ်တဲ့ ကိုးကန့် MNDAA ၊ KIA ၊ TNLA ၊ PDF နဲ့ စစ်ကောင်စီတပ်၊ ပြည်သူ့စစ်တို့ လှုပ်ရှားရာ နယ်မြေ ဖြစ်ပါတယ်။
Photo-Crd
CJ-008
#MekongNews
#ကွက်ခိုင်မြို့နယ်
#KIA
#မန်ဘန်ရွာ
