မဲခေါင်၊ ဖေဖော်ဝါရီ ၃
အမျိုးသား ညီညွတ်ရေး အစိုးရ၊ ယာယီ သမ္မတဒူဝါလရှီးလ ရဲ့ လူမှုကွန်ရက်-Facebook စာမျက်နှာ တိုက်ခိုက်ခံခဲ့ရတယ်လို့ သမ္မတရုံးက ထုတ်ပြန်ပါတယ်။
ပြီးခဲ့တဲ့ ဖေဖော်ဝါရီ ၁ ရက်နေ့က စစ်အုပ်စုကို ဆန့်ကျင်တဲ့ အနေနဲ့ မြန်မာတစ်နိုင်ငံလုံး အသံတိတ်သပိတ် အောင်ပွဲခံနေစဉ် ည ၇ နာရီဝန်းကျင်မှာ တိုက်ခိုက် ခံခဲ့ရတာပါ။
တိုက်ခိုက်ခံရတဲ့ အတွက် NUG ယာယီ သမ္မတရဲ့ လူမှုကွန်ရက်ပေါ်မှာ တင်ထားတဲ့ သတင်းစကားတွေနဲ့ ပိုစ့်တွေအားလုံး ပျောက်သွားခဲ့တယ်လို့ သိရပါတယ်။
ဒါပေမယ့် အမျိုးသား ညီညွတ်ရေး အစိုးရ နည်းပညာအဖွဲ့ရဲ့ ကြိုးပမ်းမှုကြောင့် ဖေဖော်ဝါရီ ၂ ရက်မှာတော့ ပြန်လည်ရရှိခဲ့ပြီး Facebook စာမျက်နှာ လုံခြုံရေးကို အောင်မြင်စွာ လုပ်ဆောင်နိုင်ခဲ့ပြီ ဖြစ်တယ်လို့ ယာယီ သမ္မတရုံးက အသိပေးထားပါတယ်။
စစ်ကောင်စီဘက်က အွန်လိုင်း တိုက်ခိုက်မှုတွေကို အရင်ကထက် အားထုတ် လုပ်ဆောင်လာတဲ့ အတွက် ဆိုရှယ်မီဒီယာ အသုံးပြုနေတဲ့ တော်လှန်ရေး ရဲဘော်ရဲဘက်တွေနဲ့ မိသားစုဝင်တွေ အားလုံး သတိထားကြဖို့ NUG ယာယီ သမ္မတရုံး Facebook စာမျက်နှာမှာ သတိပေး ထားပါတယ်။
ဒါ့အပြင် နည်းပညာပိုင်း ဆိုင်ရာ အကြံဉာဏ်တွေကို သက်ဆိုင်ရာ ဌာနတွေမှာ ရယူပြီး ကြိုတင်ကာကွယ်မှုတွေ ဆောင်ရွက်ကြဖို့လည်း တိုက်တွန်းထားပါတယ်။
MK-003
