မဲခေါင်၊ စက်တင်ဘာ ၁၅
ကရင်ပြည်နယ်၊ ကရင်အမျိုးသားအစည်းအရုံးအုပ်ချုပ်နယ်မြေ၊ တပ်မဟာ (၆)၊ ဒူးပလာယာခရိုင်၊ ကော့ကရိတ်မြို့နယ်မှာရှိတဲ့ စစ်ကောင်စီတပ်စခန်းကို KNLA နဲ့ တော်လှန်ရေးပူးပေါင်းတပ်ဖွဲ့တွေ တိုက်ခိုက်သိမ်းပိုက်ပြီး လက်နက်ခဲယမ်းတွေကို သိမ်းဆည်းရမိခဲ့တယ်လို့ ဒီနေ့ စက်တင်ဘာ ၁၅ ရက် ညနေပိုင်းမှာ KNU ဗဟိုက ထုတ်ပြန်လာပါတယ်။
စစ်တပ်အထိုင် ရေတလျောက်စခန်းကို ဒီကနေ့ မနက် ၇ နာရီ ၅၅ မိနစ်ကစတင်ပြီး KNLA တပ်ရင်း (၁၈) နဲ့ တော်လှန်ရေးပူးပေါင်းတပ်တွေ ဝင်ရောက်စီးနင်းခဲ့ရာ မနက် ၈ နာရီခွဲဝန်းကျင်မှာ စခန်းတစ်ခုလုံးကို အပြီးသတ်သိမ်းပိုက်နိုင်ခဲ့ပြီး လက်နက်ခဲယမ်းတွေ သိမ်းဆည်းနိုင်ခဲ့တယ်လို့ KNU က ဆိုထားပါတယ်။
အဆိုပါ စခန်းသိမ်းတိုက်ပွဲမှာ စစ်ကောင်စီဘက်က (၉) ဦးသေဆုံးပြီး စခန်းမှာရှိတဲ့ အခြားတပ်သားတွေက ထွက်ပြေးလွတ်မြောက်သွားခဲ့တယ်လို့ KNU ထုတ်ပြန်ချက်အရ သိရပါတယ်။
နှစ်ဖက်အပြန်အလှန်ပစ်ခတ်ကြချိန်အတွင်း KNLA တော်လှန်ရေးပူးပေါင်းတပ်ဖွဲ့က (၁) ဦး ကျဆုံးခဲ့ပြီး (၃) ဦး ဒဏ်ရာရခဲ့တယ်လို့ သိရပါတယ်။
ရေတလျောက်စခန်းသိမ်းတိုက်ပွဲအတွင်း စစ်တပ်ပိုင် MA-1 (၁) လက်၊ MA-2 (၂) လက်၊ MA-3 (၁) လက်၊ MA-4 ပူးတွဲ (၂) လက်၊ RPG-7 (၁) လက်၊ 60mm ပြောင်းတို (၂) လက်၊ ပစ္စတို (၂) လက် နှင့် ငါးကြင်းမြိး စက်လက် (၁) လက် တို့ဖြစ်ပြီး ခဲယမ်း ကျည်ဆံနှင့် အခြားပစ္စည်းများမှာ RPG-7 ကျည် (၇၀) လုံး၊ 81mm ကျည် (၄၀) လုံး၊ 60mm ကျည် (၁၁၀) လုံး၊ M-79 ကျည် (၄၀) လုံး၊ 5.56 ကျည် (၂၈၀၀) တောင့်၊ 7.62 ကျည် (၈၀၀) တောင့်၊ တိုက်မိုင်း (၂၀) လုံး၊ နင်းမိုင်း (၂၃) လုံး၊ ရှေ့ထွက်မိုင်း (၃) လုံး၊ ဆက်သွယ်ရေးစက်ကြီး (၁) လုံး၊ မြေပုံ (၁) ရွက်၊ လက်ပစ်ဗုံး (၂၀) လုံး နှင့် Compass (၂) လုံးတို့ကို သိမ်းနိုင်ခဲ့တယ်လို့ KNU က ဓာတ်ပုံတွေနဲ့တကွ ထုတ်ပြန်ထားပါတယ်။
KNU အုပ်ချုပ်နယ်မြေ၊ တပ်မဟာ (၆) အတွင်းမှာရှိနေတဲ့ စစ်တပ်စခန်းတွေကို KNLA တော်လှန်ရေး ပူးပေါင်းတပ်တွေ စီနင်းတိုက်ခိုက်တာ၊ ပြောက်ကျားပစ်ခတ်တာတွေနဲ့ နယ်မြေကျူးကျော်စစ်ကြောင်းထိုးလာတဲ့ စစ်တပ်ကို KNLA ပူးပေါင်းတပ်တွေကြားဖြတ်တိုက်ခိုက်နေတာတွေ နေ့စဉ်နဲ့အမျှရှိနေတာဖြစ်ပါတယ်။
အဲ့ဒီလို တိုက်ခိုက်မှုတွေကြောင့် စစ်တပ်ဘက်က သေဆုံး၊ ဒဏ်ရာရသူတွေများလာပြီး စခန်းတွင်းမှာရှိတဲ့ စစ်ကောင်စီတပ်ဖွဲ့ဝင်တွေနဲ့ သူတို့ရဲ့ မိသားစုတွေလည်း စိတ်ဓာတ်ပိုင်းအရ ကျဆင်းနေတာကြောင့် တပ်ကိုစွန့်ခွာထွက်ပြေးပြီး KNU နဲ့ တော်လှန်ရေးပူးပေါင်းတပ်ဖွဲ့တွေဘက်ကို လာရောက်ပူးပေါင်းတာတွေရှိခဲ့တယ်လို့လည်း KNU က ဒီနေ့ ထုတ်ပြန်ချက်မှာ ပြောထားပါတယ်။
MK – 009
#MeKongNews
#ရေတလျှောက်
#ထိုင်းနယ်စပ်
#စစ်ကောင်စီ
#KNU
#လက်နက်
#သိမ်းမိ
