မဲခေါင်၊ စက်တင်ဘာ ၁၂

ရှမ်းပြည်နယ် တောင်ပိုင်း မိုးဗြဲနဲ့ ဖယ်ခုံ ဒေသ အခြေစိုက် အမျိုးသား ညီညွတ်ရေး အစိုးရရဲ့ အမှတ် P3-1009 တပ်ရင်းဖြစ်တဲ့ အင်းလေး ပြည်သူ့ကာကွယ်ရေးတပ်ဖွဲ့-IPDF ရဲ့ သင်တန်းဆင်းပွဲနဲ့ တပ်ဖွဲ့ တည်ထောင်မှု တစ်နှစ်ပြည့် အခမ်းအနားကို စက်တင်ဘာလ ၁၁ ရက်နေ့က ကျင်းပခဲ့တယ်လို့ IPDF တာဝန်ရှိသူ တစ်ဦးက ပြောပါတယ်။

သင်တန်းဆင်းပွဲမှာ ရဲဘော်တွေရဲ့ ကြိုးစားမှု အလိုက် သင်တန်း တစ်လျှောက် အကောင်းဆုံးဆု၊ အမိန့်နာခံမှုဆု၊ ဇွဲဆုအပြင် ဒိုက်ထိုး၊ ပလန့်ထောက်၊ ရေကူး၊ ၄၅ ဒီဂရီထောင်၊ ကြက်ဖခွပ်ဆု၊ အားကစား ပြိုင်ပွဲဆုတွေ ပေးအပ်ခဲ့တယ်လို့ ဆိုပါတယ်။

“ကျွန်တော်တို့ IPDF သည် အင်းလေးဒေသ တပ်ရင်း တပ်ဖွဲ့ ဖြစ်တဲ့အတွက် အင်းသားတွေ တော်လှန်ရေးမှာ ပါဝင်နေတာကို ပြည်သူကို သိစေလိုပါတယ်။ နောက်ပြီး ပိုပြီး ကြိုးစားနေပါတယ်။ တိုက်ပွဲလည်း လက်ရှိဝင်နေပြီး ရှေ့ဆက်ပြီးလည်း ပိုတိုက်ပွဲဝင်သွားပါမယ်” လို့ သူက ပြောပါတယ်။

တပ်ဖွဲ့ တည်ထောင်မှု တစ်နှစ်ပြည့် အခမ်းအနားမှာ ကာကွယ်ရေးဝန်ကြီးဌာနက ပေးပို့တဲ့ သဝဏ်လွှာ ဖတ်ကြားတာ၊ 1009 တပ်ရင်း ဖြစ်ပေါ်လာပုံ သမိုင်းအကျဥ်းကို ပြောကြားတာ၊ တိုက်ပွဲ အတွေ့အကြုံ ဝေမျှတာတွေ ပြုလုပ်ခဲ့တယ်လို့ သိရပါတယ်။

ဒါ့အပြင် ညီနောင်မဟာမိတ်တပ်ဖွဲ့တွေရဲ့ တာဝန်ရှိသူတွေက အားပေးစကား ပြောကြားကာ အလယ်ပိုင်းတိုင်း စစ်ဒေသ တာဝန်ရှိသူက ခုခံတွန်းလှန်စစ်နဲ့အတူ ရှေ့ဆက်လျှောက်ရမယ့်လမ်း အတွက် အားပေး စကား ပြောကြားပြီး ရဲဘော်နဲ့ ရဲမေတွေကို ဆုတံဆိပ်တွေ ချီးမြှင့်ခဲ့တယ်လို့ သိရပါတယ်။

အဆိုပါ အခမ်းအနားကို ညီနောင်မဟာမိတ် အဖွဲ့ဝင် လူ ၁၀၀ ကျော် တက်ရောက်ခဲ့ပြီး နေ့လည်စာနဲ့ ဧည့်ခံ ကျွေးမွေးကာ ဆုတံဆိပ်ချီးမြှင့် အားပေးစကား ပြောကြားတာတွေ ပြုလုပ်ခဲ့တယ်လို့ သိရပါတယ်။

CJ-004

#MeKongNews

#IPDF

#NUG

#P3_1009

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)