မဲခေါင်၊ စက်တင်ဘာ ၁

စစ်တပ်အာဏာသိမ်းထားတဲ့ ၂ နှစ်ကျော် ကာလအတွင်း ကရင်နီပြည်နယ်မှာ အရပ်သား ၅၀၀ ကျော် အသက်ဆုံးရှုံးခဲ့ရတယ်လို့ တိုးတက်သော ကရင်နီ ပြည်သူ့အင်အားစု-PKPF က ဒီကနေ့ စက်တင်ဘာ ၁ ရက်နေ့ မနက်ပိုင်းမှာ ထုတ်ပြန်ပါတယ်။

အာဏာသိမ်းပြီးနောက် ကရင်နီပြည်နယ်မှာ လက်နက်ကိုင် ပဋိပက္ခတွေ နေရာအနှံ့ ဖြစ်ပွားနေပြီး အဲ့ဒီ ပဋိပက္ခတွေကြားမှာ သတ်ဖြတ်ခံထားရတဲ့ အရပ်သား ၃၈၀ ဦးရှိကာ စစ်ဘေးရှောင်ရင်း သေဆုံးသူ ၁၂၄ ဦး ရှိတယ်လို့ PKPF က ထုတ်ပြန်ထားတာပါ။

ကရင်နီမှာ အရပ်သားတွေကို စစ်ကောင်စီတပ်က ဖမ်းဆီးနှိပ်စက် သတ်ဖြတ်တာ၊ ပြည်သူတွေရှိတဲ့ နေရာကို လက်နက်ကြီးနဲ့ ပစ်ခတ်တာ၊ လေယာဉ်နဲ့ ဗုံးကြဲတာနဲ့ စစ်ကြောင်းထိုးတိုင်း မြို့ရွာတွေကို ပစ်ခတ် ဝင်ရောက်တာတွေကြောင့် အများဆုံး သတ်ဖြတ်ခံခဲ့ရတာလို့ အခုနှစ် ဩဂုတ်လ ၅ ရက်နေ့မှာ KNDF ဥက္ကဌ ခွန်ဘီထူးက ပြောခဲ့ပါတယ်။

ဒါ့အပြင် စစ်ရှောင်စခန်းကို စစ်ကောင်စီတပ်ရဲ့ လက်နက်ကြီး ကျရောက် ပေါက်ကွဲတာ၊ စစ်ဘေးတိမ်းရှောင်ရင်း ကျန်းမာရေးကြောင့် သေဆုံးသူတွေနဲ့ မိမိကိုယ်ကိုယ် အဆုံးစီရင်သူတွေ ပါဝင်တယ်လို့ PKPF က ဆိုပါတယ်။

အာဏာသိမ်း ကာလအတွင်းမှာ ကရင်နီပြည်နယ်ထဲက ပြည်သူ ၁၉၂ ဦးဟာလည်း စစ်တပ်ရဲ့ မတရား ဖမ်းဆီးထားခြင်း ခံထားရတယ်လို့ PKPF ရဲ့ ထုတ်ပြန်ချက်မှာ ထည့်သွင်း ဖော်ပြထားပါတယ်။

၂ နှစ်ကျော်အတွင်း စစ်ကောင်စီတပ်ရဲ့ လေကြောင်းတိုက်ခိုက်မှု ၆၁၉ ကြိမ်ရှိခဲ့ပြီး လက်နက်ကြီး ပစ်ခတ်မှု၊ လေကြောင်း တိုက်ခိုက်မှုနဲ့ မီးရှို့ဖျက်ဆီးမှုတွေကြောင့် ဘာသာရေး အဆောက်အအုံ ၄၂ လုံး၊ ပြည်သူနေအိမ် ၁,၇၀၀ လုံး ပျက်စီးခဲ့ရတယ်လို့ သိရပါတယ်။

ကရင်နီပြည်နယ်တွင်းမှာ အာဏာသိမ်း ၂ နှစ်ကျော်ကာလမှာ စစ်ကောင်စီရဲ့ စစ်ကြောင်းထိုးမှုကြောင့် ဒေသတွင်း တော်လှန်ရေး အင်အားစုတွေနဲ့ တိုက်ပွဲ အကြိမ်ရေ ၈၀၀ ကျော် ဖြစ်ပွားခဲ့ပြီး လက်ရှိအချိန်မှာလည်း စစ်ရေးအခြေအနေ တင်းမာနေတယ်လို့ ဒေသတွင်း စစ်ရေး သတင်းရင်းမြစ်တွေက ဆိုပါတယ်။

စစ်ကောင်စီတပ်နဲ့ တော်လှန်ရေးပူးပေါင်းတပ်တွေကြား တိုက်ပွဲတွေကြောင့် စစ်တပ်ဘက်က ၂,၃၃၆ ဦး သေဆုံးကာ စစ်ကောင်စီဘက်က မော်တော်ယာဉ် ၆၅ စီး ပျက်စီးခဲ့ပြီး တော်လှန်ရေး ပူးပေါင်းတပ်တွေဘက်က ကျဆုံးသူ ၃၂၂ ဦးရှိခဲ့တယ်လို့ သိရပါတယ်။

MK-009

#MeKongNews

#ကရင်နီပြည်

#PKPF

#စစ်ဘေးရှောင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)