မဲခေါင်၊ ဩဂုတ် ၁၄

ရှမ်းပြည်နယ်က ပြည်သူတွေ အနေနဲ့ ခေတ်ကာလ တိုးတက်လာတဲ့ နည်းတူ ဆိုရှယ်မီဒီယာကို တွင်တွင်ကျယ်ကျယ် အသုံးပြုလာတဲ့ အတွက် ဆိုရှယ်မီဒီယာကို အကျိုးရှိရှိ အသုံးပြုကြဖို့ ရှမ်းပြည် ပြန်လည်ထူထောင်ရေး ကောင်စီ-RCSS ပြန်ကြားရေးက ဒီကနေ့ ထုတ်ပြန် လိုက်ပါတယ်။

ရှမ်းပြည်နယ် အတွင်းမှာ ရှိတဲ့ ရှမ်းလက်နက်ကိုင် အဖွဲ့အစည်း ခေါင်းဆောင်တွေကို မသရော်ဖို့၊ အကြီးအကဲ ပုံတွေကို ပြုပြင်ပြီး မလျော်မသင့်မြတ်တဲ့ နေရာတွေမှာ အသုံးပြုတာတွေ ဆိုရှယ် မီဒီယာ ပလက်ဖောင်းတွေ ဖြစ်တဲ့ Facebook၊ Tiktok စတဲ့ နေရာတွေမှာ တွေ့မြင်လာရတာနဲ့ ပတ်သက်ပြီး အခုလို ထုတ်ပြန်လိုက်တာလို့ ဆိုပါတယ်။

ဒါ့အပြင် ဆိုရှယ်မီဒီယာပေါ်မှာ ရှမ်းပြည်နယ်နဲ့ ပတ်သက်တဲ့ သတင်းမှားတွေ၊ အဖွဲ့အစည်းအပေါ် စွပ်စွဲတဲ့ မကောင်းသတင်းတွေ၊ ပုဂ္ဂိုလ်ရေးအရ နာမည်ဖျက်တဲ့ အကြောင်းအရာတွေကို သုံးသပ်ပြောဆို ရေးသား နေတာဟာ ရှမ်းလက်နက်ကိုင် အဖွဲ့အစည်း အချင်းချင်း နားလည်မှု လွဲစေကာ ၂ ဖက် ထိခိုက်နစ်နာမှုတွေ ရှိတယ်လို့ ဆိုပါတယ်။

အခုလို ရှမ်းလက်နက်ကိုင် အဖွဲ့အစည်းတွေကို ‌‌ဝေဖန် အပြစ်တင်နေမဲ့အစား ဗဟုသုတ၊ ပညာရေးနဲ့ ယဥ်ကျေးမှု ဆိုင်ရာ ကိစ္စတွေကိုသာ ဆိုရှယ်မီဒီယာတွေပေါ် တင်ခြင်းဖြင့် အမျိုးသားရေး သင့်မြတ်ပြီး နိုင်ငံရေး အဖွဲ့အစည်း တွေနဲ့ စစ်ရေး အဖွဲ့အစည်းတွေကြား ပိုမိုသင့်မြတ်လာမယ်လို့ RCSS ရဲ့ ထုတ်ပြန်ချက်မှာ‌ ဖော်ပြထားပါတယ်။

MK-007

#MeKongNews

#ဆိုရှယ်မီဒီယာ

#RCSS

#Tiktok

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)