မဲခေါင်၊ ဇူလိုင် ၂၇
ရှမ်းပြည်နယ် တောင်ပိုင်း၊ မိုးဗြဲဒေသနဲ့ ကရင်နီပြည်နယ်၊ လွိုင်ကော်မြို့နယ် အရှေ့ခြမ်း ဒေသတွေကို စစ်ကောင်စီက စစ်ကြောင်း အများအပြားနဲ့ စစ်ကြောင်း ထိုးနေတာကြောင့် အခုရက်ပိုင်း တိုက်ပွဲတွေ ပြင်းထန် နေတယ်လို့ မိုးဗြဲ PDF နဲ့ နီးစပ်သူ တစ်ဦးက မဲခေါင်သတင်းဌာနကို ဒီကနေ့ ပြောပါတယ်။
လွိုင်ကော်ဒေသ ကုန်းသာကျေးရွာနဲ့ ကယန်းသာယာကျေးရွာ လမ်းဆုံဘက်ခြမ်းတွေကို စစ်ကောင်စီက စစ်ရေးအရ နယ်မြေ စိုးမိုးနိုင်ဖို့ နွားလ၀ိုးနဲ့ ဆော်ခီးဒေါကျေးရွာဘက်ကနေ စစ်ကြောင်း အများအပြားခွဲပြီး စစ်ကြောင်းထိုး တိုက်ခိုက်နေတယ်လို့ ဆိုပါတယ်။
ဒါ့အပြင် ဖယ်ခုံ-မိုးဗြဲ လမ်းကနေလည်း စစ်ကောင်စီက စစ်အင်အားတွေ ဆက်တိုက် ပို့ဆောင်နေတာကြောင့် ခန့်မှန်း အင်အား ၃၀၀ ကနေ ၅၀၀ ကြား ရှိနိုင်တယ်လို့ မိုးဗြဲ PDF နဲ့ နီးစပ်သူ တစ်ဦးက ပြောပါတယ်။
“စစ်ကြောင်းတွေကတော့ များတယ်။ ကားနဲ့လည်း မဟုတ်ဘူး။ စစ်ကြောင်းထိုးမဲ့ နေရာကို ကားနဲ့လာတယ်။ ရောက်ခါနီးရင် ခြေလျင်စစ်ကြောင်းကို ဖြန့်ပြီး ခွဲထိုးကြတာ” လို့ သူက စစ်ရေး အခြေအနေကို ရှင်းပြပါတယ်။
ပြီးခဲ့တဲ့ ဇူလိုင်လ ၂၀ ရက်ကတည်းက မိုးဗြဲမြို့အနီး ကုန်းသာကျေးရွာ အုပ်စုထဲမှာ ပါ၀င်တဲ့ ဆောင်ကန်းကျေးရွာနဲ့ လယ်ထွန်ကျေးရွာ အနီးတစ်၀ိုက်မှာ တိုက်ပွဲတွေ ပြင်းထန်နေတာဖြစ်ပြီး လက်ရှိ တစ်ပတ်နီးပါး ကြာမြင့်လာတဲ့ အထိ တိုက်ပွဲတွေ ပြင်းထန်နေတယ်လို့ ဆိုပါတယ်။
အဆိုပါ တိုက်ပွဲတွေ အတွင်း စစ်ကောင်စီတပ်သား ထိခိုက်သေဆုံးမှု များပြားတာကြောင့် သေဆုံး စစ်သား ရုပ်အလောင်းတွေကို စက်မှုဇုံ အနီးက အိမ်တစ်အိမ်ထဲ စုထည့်ကာ နေအိမ်နဲ့အတူ မီးရှို့ပြီး ပြန်ဆုတ်သွားတယ်လို့ ကရင်နီ စစ်ရေး သတင်းရင်းမြစ်က ပြောပါတယ်။
အဲဒီ တိုက်ပွဲမှာ ပြည်သူ့ကာကွယ်ရေး ပူးပေါင်းတပ်ဖွဲ့တွေဘက်က ထိခိုက်သူ အနည်းငယ်ရှိပြီး ကျဆုံးမှု မရှိဘူးလို့ ဆိုပါတယ်။
စစ်ကောင်စီရဲ့ စစ်ရေးလှုပ်ရှားမှုအရ ပင်လောင်း-ဖယ်ခုံ ဘက်ကို ပြီးခဲ့တဲ့ တစ်ပတ် အတွင်း စစ်ကားအစီးရေ ၁၀၀ ၀န်းကျင်ခန့် ၀င်ရောက်လာတာ၊ ကယန်းသာယာ လမ်းဆုံနဲ့ ကုန်းသာကျေးရွာအုပ်စုကို ထိန်းချုပ်နိုင်ဖို့ ကြိုးစား နေတာတွေကြောင့် စစ်ကောင်စီက မိုးဗြဲမြို့ကို ၂ ဖက် ပိတ်ဆို့ ထိုးစစ်ဆင်လာနိုင်တယ်လို့ စစ်ရေး သတင်းရင်းမြစ်က သုံးသပ် ပြောဆိုပါတယ်။
မိုးဗြဲမြို့ဟာ ဖယ်ခုံမြို့နဲ့ ကယန်းသာယာလမ်းဆုံကို ဆက်သွယ်ထားတဲ့ လမ်းပေါ်မှာ တည်ရှိတဲ့ မြို့ဖြစ်ပြီး လက်ရှိ မြို့တွင်း တိုက်ပွဲတွေ ဖြစ်ပွားနေတာ လပိုင်းခန့် ကြာမြင့်နေပြီ ဖြစ်ပါတယ်။
ပြီးခဲ့တဲ့ တစ်ပတ်အတွင်း စစ်ကောင်စီတပ် အင်အား ၁,၅၀၀ ခန့်နဲ့ စစ်လက်နက်ခဲယမ်း အများအပြား သယ်ဆောင် လာတဲ့ စစ်ကား အစီးရေ ၁၀၀ ၀န်းကျင်ခန့်ဟာ ပင်လောင်း-ဖယ်ခုံလမ်းက တစ်ဆင့် ကရင်နီပြည်နယ်ထဲ ၀င်လာတယ်လို့ ကရင်နီ အမျိုးသားများ ကာကွယ်ရေးတပ်ဖွဲ့-KNDF ပြန်ကြားရေးက ပြောပါတယ်။
ဒီလို အင်အား ထပ်ဖြည့်လာတာကြောင့် ကရင်ပြည်နယ်ထဲမှာ စုစုပေါင်း စစ်အင်အား ၃,၅၀၀ ၀န်းကျင်အထိ ရှိလာပြီး စစ်ကောင်စီဘက်က အကြီးအကျယ် ထိုးစစ်ဆင်ဖို့ ပြင်ဆင်လာပြီလို့ ဖားဆောင်း PDF ပြောရေးဆိုခွင့် ရှိသူက သုံးသပ်ပါတယ်။
MK-007
#Mekongnews
#မိုးဗြဲ
#လွိုင်ကော်
#KNDF
#ဖားဆောင်း_PDF
