မဲခေါင်၊ ဇူလိုင် ၁၇
မြန်မာနိုင်ငံရဲ့ အရှေ့မြောက် ကုန်သွယ်ရာလမ်းကြောင်း တစ်ခုဖြစ်တဲ့ ရှမ်းပြည်နယ်မြောက်ပိုင်း၊ မူဆယ် – ကွတ်ခိုင် ပြည်ထောင်စု လမ်းမ အနီးတကြော ၃ နေရာမှာ ယမန်နေ့ ဇူလိုင်လ ၁၆ ရက်နေ့က KIA ဘက်က စစ်ကောင်စီကို သွားရောက်တိုက်ခိုက်ရာက တိုက်ပွဲ ဖြစ်ပွားခဲ့ကြောင်း ဒေသခံတွေနဲ့ KIA နဲ့ နီးစပ်တဲ့သူတွေ ဆီက သိရပါတယ်။
ယမန်နေ့ မွန်းလွဲ ၂ နာရီခန့်ကနေ ၂ နာရီ ၂၀ မိနစ်ခန့်အထိ နမ့်ဖတ်ကာနဲ့ ကွတ်ခိုင်ကြား နမ့်ဖလွန် အနီးရှိ ဖာခေတ်ကုန်းရှိ စစ်ကောင်စီတပ်ကို KIA တပ်ရင်း ၉ နဲ့ အထူးစစ်ဆင်ရေးအဖွဲ့တို့ သွားရောက်တိုက်ခိုက်ခဲ့တဲ့အပြင် မုံးကိုးဘက်ကနေ ဆင်းလာတဲ့ စစ်ကောင်စီကားတန်းကို ကွတ်ခိုင်အနီး ရှုခင်းသာမှာ စောင့်ကြိုတိုက်ခိုက်ရာက တိုက်ပွဲ ဖြစ်ပွားခဲ့တာလို့ ဆိုပါတယ်။
“ဖာခေတ်မှာ စုနေတဲ့ စစ်ကောင်စီတွေကို KIA ဘက်က လာပစ်တာရှိတယ်” လို့ ဒေသခံ အမျိုးသား ၁ ဦး ကပြောပါတယ်။
ဒါ့အပြင် ညနေ ၆ နာရီကျော်က နမ့်ဖတ်ကာ အရှေ့ဘက်ရှိ ခိုးမုန်းရွာအပေါ်ဘက်က ကောင်ရာတောင်မှာ စခန်းထိုင်တဲ့ စစ်ကောင်စီ ခလရ ၁၂၃ ကို KIA တပ်ရင်း ၉ က လာရောက် တိုက်ခိုက် ဖျက်ဆီးလိုက်ပြီး ၆ နာရီ ၄၀ မိနစ် ဝန်းကျင်မှာတော့ KIA ဘက်က ပြန်ထွက်သွားကြတယ်လို့ KIA နဲ့ နီးစပ်သူ ၁ ဦး က ပြောပါတယ်။
“ခါတိုင်း အဲဒီ ကောင်ရာ နေရာမှာ စစ်ကောင်စီတွေ လာလာနေတဲ့ နေရာမှာ ဒီညနေတော့ KIA တွေ သွားနေနေတာ။ အဲဒီမှာ စစ်ကောင်စီတွေက သူတို့ တာဝန်ကနေ အဲဒီဘက်ဝင်လာချိန် ဒဲ့တိုး ထိပ်တိုက်ဖြစ်သွားပြီးတော့ အဲမှာ တော်တော်ကြာ တိုက်ပွဲပြင်းသွားတယ်” လို့ သူက ပြောပါတယ်။
စစ်ကောင်စီဘက်က အချို့ ရွာတွေဘက် ထွက်ပြေးသွားပြီး လက်နက်ကြီးတွေနဲ့ တန်ပြန်ပစ်ခတ်တာရှိသလို နမ့်ဖတ်ကာ အခြေစိုက် စစ်ကောင်စီ ခလရ ၁၂၃ တပ်မှ လက်နက်ကြီးတွေနဲ့ ရမ်းသမ်းပစ်ကူ နေတာကြောင့် ခါဆန်ရွာက လီဆူဘုရားကျောင်းအနီး လက်နက်ကြီးတွေ ကျကွဲလို့ ရွာခံတွေလည်း တိမ်းရှောင်နေရပါတယ်။
ဒေသခံ အမျိုးသမီး ၁ ဦးကလည်း “ကျွန်မတို့ နမ့်အွမ်ကနေ ပစ်ခတ်သံတွေ ကြားနေရတယ်။ ဘယ်ကနေ ဘယ်ကို ပစ်နေတာလဲမသိဘူး” လို့ ပြောပါတယ်။
အဲဒီအနီးနားရွာဖြစ်တဲ့ ခါဖောက်ရွာမှာလည်း လက်နက်ကြီး ကျရောက်ပေါက်ကွဲကာ ပြည်သူ ၁ ဦးရဲ့ နွားတင်းကုပ်မှာ ထိမှန်ပြီး နွား ၄ ကောင် သေဆုံးသွားတယ်လို့ ဒေသခံတွေက ပြောပါတယ်။
ဇူလိုင် ၁၅ ရက်နေ့ ညနေပိုင်း ၄ နာရီကျော်ခန့်ကလည်း ကွတ်ခိုင်မြို့နယ်၊ နမ့်ဖလွန်ရွာအနီးရှိ ဖာခေတ်ကုန်းက စစ်ကောင်စီ တပ်စခန်းကို KIA ဘက်က လာရောက်တိုက်ခိုက်ခဲ့ကြောင်း KIA နဲ့ နီးစပ်သူတွေက ပြောပြပါတယ်။
လတ်တလော မူဆယ်နဲ့ လားရှိုး လမ်းကြော အနီးနား တလျှောက် စစ်ကောင်စီနဲ့ KIA တို့အကြား ခပ်စိပ်စိပ် ထိတွေ့တိုက်ပွဲတွေ ဖြစ်နေပါတယ်။
အဲဒီနေရာတွေမှာတော့ စစ်ကောင်စီအဖွဲ့၊ ပြည်သူ့စစ်အဖွဲ့များ၊ KIA တပ်မဟာ ၄ နဲ့ ၆၊ TNLA၊ ကိုးကန့် MNDAA၊ PDF တို့ အဓိက လှုပ်ရှားသွားလာတဲ့ နေရာတွေဖြစ်ပြီး လက်ရှိ စစ်ကောင်စီဘက်က KIA တွေ လှုပ်ရှားသွားလာနေတဲ့ ရှမ်းပြည်နယ်မြောက်ပိုင်းနဲ့ KIO/KIA ဌာနချုပ် အနီးဝန်းကျင် ထိုးစစ်ဆင် တိုက်ခိုက်နေတာဖြစ်ပါတယ်။
CJ-008
#MeKongNews
#စစ်ကောင်စီ
#KIA
#မူဆယ်
#ကွတ်ခိုင်
