မဲခေါင်၊ ဇွန် ၈
ရန်ကုန်တိုင်း၊ ကမာရွတ်မြို့နယ်၊ အမှတ် (၈) ရပ်ကွက်၊ မာလာလမ်း၊ ရွှေမြိတ်သူ စားသောက်ဆိုင် တိုက်အောက်ကို ဇွန်လ ၇ ရက်နေ့၊ ည ၉ နာရီ ၂၅ မိနစ် ဝန်းကျင်က စစ်ကား Dc ၃ စီး၊ စစ်သား ၁၀ ယောက်ဝန်းကျင် အပါအဝင် အရပ်ဝတ်များနဲ့ လမ်းပိတ်ပြီး ရှောင်တခင် ဧည့်စာရင်း စစ်ဆေးခဲ့တယ်လို့ ရပ်ကွက်နေ ပြည်သူတွေက မဲခေါင်သတင်းဌာနကို ပြောပါတယ်။
စာရွက်များ ကိုင်ဆောင်ပြီး အဆိုပါ လမ်းအတွင်းရှိ အဆောင် အချို့ကို ဝင်ရောက်ရှာဖွေ စစ်ဆေးခဲ့ပြီး ည ၁၀ နာရီ ၁၀ မိနစ် ဝန်းကျင်မှာ လှည်းတန်းလမ်းမဘက်သို့ ပြန်လည် ထွက်ခွာသွားရာ ဖမ်းဆီးခံရသူ မရှိခဲ့ဘူးလို့ ရပ်ကွက်နေ ပြည်သူ တစ်ဦးက ပြောပါတယ်။
“ပြီးခဲ့တဲ့နေ့ကလည်း ည ၁၀ နာရီခွဲ အချိန်လောက်က (၃) ရပ်ကွက်၊ ပတ္တမြားလမ်း အလယ်ရှိတဲ့ အဆောင်တိုက်ကို ၇ ကောင် ဝင်ရှာသေးတယ်။ စစ်သားနဲ့ အရပ်ဝတ်တွေနဲ့ Dc တစ်စီး၊ ပြီးတော့ အိမ်စီးကား တစ်စီးပါတယ်။ သတင်းရလို့နေမယ်၊ သူတို့မှာ စာရွက်နဲ့ နာမည်တွေ ပါတယ်။ မနက်ပိုင်းလည်း လှည်းတန်းထိပ်မှာ လူငယ်တွေကို အဓိကထားပြီး စစ်နေတာ” လို့ သူကပြောပါတယ်။
စစ်ကောင်စီ အားပေး မဘသ လီလီနိုင်ကျော် ကို ပစ်သတ်ခဲ့တယ်လို့ စစ်ကောင်စီက စွပ်စွဲ ဖမ်းဆီးထားတဲ့ ကိုကောင်းဇာနည်းဟိန်း (ခ) လပြည့်နဲ့ ကိုကျော်သူရ (ခ) အီးတီ တို့ဟာ ကမာရွတ်မြို့နယ်ရှိ အမျိုးသား အဆောင်တစ်ခုမှာ လနဲ့ချီ နေထိုင်နေသူတွေ ဖြစ်တယ်လို့ ထုတ်ပြန်ထားပြီးနောက် ညစဉ် ရပ်ကွက် အဆောင်တွေကို လိုက်လံ စစ်ဆေးနေတာ ဖြစ်တယ်လို့ သိရပါတယ်။
ဒါ့အပြင် NUG က ရန်ကုန်တိုင်း စစ်ဒေသခွဲဌာနချုပ် ဖွဲ့စည်း လေ့ကျင့်နေကြောင်း ကြေညာပြီးနောက် ရန်ကုန်မြို့မှာ စစ်တပ်က တင်းတင်းကျပ်ကျပ် စစ်ဆေးမှုတွေ လုပ်လာတာ ဖြစ်ပါတယ်။
အခုရက်ပိုင်း ရန်ကုန်မြို့ထဲမှာ ဆန္ဒပြမှု၊ ပေါက်ကွဲမှု ပြန်လည်များလာပြီး မဘသနဲ့ စစ်ကောင်စီ ထောက်ခံသူ ခေါင်းဆောင် တစ်ချို့ ပစ်ခတ်ခံရတဲ့ ဖြစ်စဉ်တွေကြောင့် စစ်ဆေး ဖမ်းဆီးမှုတွေ ပိုလုပ်နေတာ ဖြစ်တယ်လို့ မြို့နေ ပြည်သူတွေက ပြောပါတယ်။
ဒါ့အပြင် ရပ်ကွက်များမှာ PDF များကို လက်မခံရန်၊ အိမ်မငှားရန်၊ မသင်္ကာစရာတွေ့ပါက အကြောင်းကြားရန် စတာတွေကို ရွှေပြည်သာ၊ မှော်ဘီ၊ မင်္ဂလာဒုံနဲ့ ဗဟန်းမြို့နယ်တွေမှာ ဟိုက်ဂျက်ကားများနဲ့ လိုက်အော်နေတယ်လို့ ရပ်ကွက်နေ ပြည်သူတွေက ပြောပါတယ်။
“ရပ်ကွက်ထဲမှာ အဲ့လို မအော်တာ အတော်ကြာပြီ။ ဒီနှစ်မှ ပြန်ပြီးအော်နေတာတော့ ထူးတယ် ပြောလို့ရတယ်။ NUG ရန်ကုန်တိုင်း စစ်ဒေသခွဲ ဌာနချုပ် ဖွဲ့စည်းလိုက်တယ် ကြေငြာလိုက်ထဲက ဒီကောင်တွေ အလုပ်ရှုပ်နေတာ။ ပေါက်ကွဲမှုတွေလည်း ဒီရက်ပိုင်း ဆက်တိုင်ဖြစ်နေတော့ ဒီကောင်တွေ ကြောက်နေတာ။ တော်လှန်ရေး လုပ်နေတဲ့ ကလေးတွေကိုတော့ ဂရုစိုက်ပြီး လုပ်ကြပါလို့ ပြောချင်ပါတယ်” လို့ ရန်ကုန် ဒေသခံ တစ်ဦးက ပြောပါတယ်။
အခုလို ရပ်ကွက်အလိုက် သတိပေးတာတွေ ရပ်နားထားတာ ကြာမြင့်နေပြီဖြစ်ပြီ ယခု ရက်ပိုင်းမှ ပြန်လည် လုပ်ဆောင်လာတာ ဖြစ်သလို ရပ်ကွက်အုပ်ချုပ်ရေး အစီအစဉ်နဲ့ ညဦးပိုင်းများမှာ လိုက်အော်နေတာ ဖြစ်တယ် လို့ သိရပါတယ်။
MK-005
#MekongNews
#ကမာရွတ်မြို့နယ်
#အဆောင်
#NUG
