မဲခေါင်၊ မေ ၁၄
ရှမ်းပြည်တောင်ပိုင်းနဲ့ မြောက်ပိုင်းတွေမှာ SSPP ကို မိုင်းထောင်၊ မိုင်းခွဲတာတွေနဲ့ လုပ်ကြံတာတွေ ပြုလုပ်ဖို့ ရှမ်းပြည်ပြန်လည်ထူထောင်ရေးကောင်စီ – RCSS က အထူးတပ်ဖွဲ့ဝင်တွေ စေလွှတ်ပြီး စေခိုင်းထားတယ်လို့ ရှမ်းပြည်တိုးတက်ရေးပါတီ SSPP ကပြောပါတယ်။
RCSS က လွှတ်လိုက်တဲ့ အထူးတပ်ဖွဲ့ဝင်တွေဟာ လက်ရှိမှာ လဲချား၊ ကာလိ၊ ကျောက်မဲ၊ နောင်ချို၊ ကျေးသီး စတဲ့မြို့နယ်တွေအတွင်း ရောက်နေပြီလို့ SSPP ပြောရေးဆိုခွင့်ရှိသူ ဗိုလ်ကြီးသီဟရာဇာက ပြောပါတယ်။
“အခုလည်းပဲ သတင်းရတာကတော့ မိုင်းထောင်ဖို့ ခွဲဖို့ နဲ့ လုပ်ကြံတာတွေပြုလုပ်ဖို့ သူတို့ Special Force(အထူးတပ်ဖွဲ့ဝင်)ကို လွယ်တိုင်းလျံကနေ ရွေးပြီး လွှတ်လာတယ်။ ကျေးသီး၊ ဒီမြောက်ပိုင်းမှာက ကျောက်မဲ နောင်ချို တစ်လျှောက်လူတွေလွတ်လာတယ်လို့ ကျွန်တော်တို့ သတင်းရထားတယ်” လို့ သူကပြောပါတယ်။
အဲ့ဒီ လုပ်ကြံရေးသမားတွေပါဝင်တဲ့ အထူးတပ်ဖွဲ့ဝင်တွေကို RCSS က မေလ ၆ ရက်နေ့မှာ စေလွှတ်ခဲ့တာဖြစ်ပြီး တစ်ချို့အဖွဲ့ဟာ လဲချားမြို့ထဲမှာ ခိုအောင်းနေတယ်လို့လည်း SSPP ကပြောပါတယ်။
“၆ ရက်နေ့က စနိုက်ပါ သမားတွေ လုပ်ကြံရေးလူသတ်သမားတွေကို လွှတ်လာတယ်။ နှစ်ယောက်က လဲချားမှာရောက်နေတယ်။ အိမ်နံပါတ်တော့ မပြောတော့ဘူး။ နောက်ပြီးတော့ ကျောက်မဲဖက်မှာလည်း ပို့ထားတယ်။ နောက်တစ်ယောက်က နာမည်နဲ့ရတယ်။ သူတို့အဖွဲ့က ၃ ယောက်။ ရှမ်းပြည်မြောက်ပိုင်းကို တက်သွားပြီးတော့ မိုင်းထောင်ဖို့ တက်သွားတယ်လို့ သတင်းရတယ်။ တစ်ချို့က လဲချား ကာလိဖက်မှာရောက်နေပြီ” လို့ ဗိုလ်ကြီးသီဟရာဇာ က ပြောပါတယ်။
စစ်သားအချင်းချင်း စစ်တိုက်တာ ကိစ္စမရှိပေမယ့် ချုံခိုတိုက်ခိုက်တာ၊ မိုင်းခွဲတာ၊ မိုင်းထောင်တာတွေဟာ ပြည်သူလူထုကို အဓိက အထိနာစေတဲ့အပြင် အဲ့ဒီလို လုပ်တာဟာ အခြေအနေရှုပ်ထွေးရုံသာရှိပြီး တိုက်ပွဲအောင်နိုင်တဲ့အကြောင်း မဟုတ်ဘူးလို့ သူကပြောပါတယ်။
SSPP ပြောဆိုချက်နဲ့ ပတ်သက်ပြီး မဲခေါင် သတင်းဌာနအနေနဲ့ သီးခြားအတည်မပြုနိုင်သေးပါဘူး။
အထူးတပ်ဖွဲ့တွေ စေလွှတ်ပြီး လုပ်ကြံရေးတွေပြုလုပ်ဖို့ RCSS က ပြုလုပ်နေတယ်ဆိုတဲ့ SSPP ပြောဆိုချက်အပေါ် မဲခေါင်သတင်းဌာနက RCSS ပြောရေးဆိုခွင့်ရှိသူဖြစ်တဲ့ ဒု-ဗိုလ်မှူးကြီး စိုင်းအွမ်ခေး နဲ့ ဗိုလ်မှူး ခမ်းစံ တို့ကို အကြိမ်ကြိမ်ဆက်သွယ်ပေမယ့် ဖုန်းလက်ခံဖြေဆိုခြင်းမရှိပါဘူး။
မေလ ၁၄ ရက် ဒီနေ့မှာ RCSS ပြောခွင့်ရပုဂ္ဂိုလ်တွေထံ မဲခေါင်သတင်းဌာနက အကြိမ် ၂၀ ခန့် ကြိုးစားဆက်သွယ်ခဲ့တာဖြစ်ပါတယ်။
SSPP နဲ့ RCSS တို့ဟာ မိုင်းနောင်- လဲချားဖက်မှာ ဒီရက်ပိုင်းထိတွေ့တိုက်ပွဲတွေ ဆက်တိုက်ပြန်ဖြစ်လာတာကြောင့် တိုက်ပွဲတွေ ပိုကျယ်ပြန့်လာမှာကို ဒေသခံတွေက စိုးရိမ်နေပါတယ်။
“ရှမ်းတပ်အချင်းချင်း မဖြစ်စေချင်ဘူး။ တိုက်ပွဲဖြစ်ရင် ကျွန်တော်တို့ပြည်သူက နှစ်ဖက်လုံးကို ကြောက်ရတယ်။ ပြီးရင် ဒီအချိန်က စိုက်ပျိုးရာသီချိန်ဖြစ်တယ်။ ဒီလိုအချိန်မှာ ပြည်သူတွေ ထွက်ပြေးနေရရင် ဒုက္ခပိုကြီးမယ်။ ပြည်သူကို သနားငဲ့ညှာဖို့ပြောချင်တယ်ဗျ။” လို့ နမ့်စန်မြို့နယ်မှ ရှမ်းလူငယ်တစ်ဦးကပြောပါတယ်။
ရှမ်းပြည်နယ်တောင်ပိုင်း နမ့်စန်၊ မိုင်းနောင်၊ ခိုလမ်တွေကြားမှာ RCSS က အင်အားဖြည့်တင်းတာတွေ ဆက်တိုက်ပြုလုပ်လာတာတွေကို တွေ့ရလို့ ရှမ်းတပ်ဖွဲ့ နှစ်ဖွဲ့ကြား တိုက်ပွဲပြင်းထန်လာမယ့်အခြေအနေဖြစ်တယ်လို့ ခိုလမ်ဒေသခံတစ်ဦးကလည်းပြောပါတယ်။
RCSS အနေနဲ့ မိုင်းထောင်တာ ချောင်းမြောင်းပစ်ခတ်တာတွေ မလုပ်ရင် တိုက်ပွဲဖြစ်စရာအကြောင်းမရှိပေမယ့် ချောင်းမြောင်းပစ်ခတ်တာတွေ SSPP ရဲ့ လမ်းခရီးကို မိုင်းခွဲတာတွေ ဆက်လုပ်ရင်တော့ စစ်ကြောင်းလုံခြုံရေးအတွက် စစ်ရေးနဲ့ကာကွယ်သွားမယ်လို့ SSPP ဘက်က ထုတ်ပြန်ထားပါတယ်။
လက်ရှိ ရှမ်းပြည်နယ်မှာ ရှမ်းတပ် နှစ်တပ်ဖြစ်တဲ့ RCSS နဲ့ SSPP ဟာ တိုက်ပွဲတွေဖြစ်နေပြီး တိုက်ပွဲတွေမှာ SSPP ဝတ်စုံ ဝတ်ထားတဲ့ ‘ဝ’ တပ်သားတွေ ပါဝင်တယ်လို့ ဒေသခံတွေက ပြောဆိုပေမယ့် SSPP တပ်ဖွဲ့မှာ တာဝန်ထမ်းဆောင်နေတဲ့ ‘ဝ’ လူမျိုးတွေ အများအပြားရှိတယ်လို့ SSPP က တုန့်ပြန်ထားပါတယ်။
ဒါ့အပြင် SSPP နဲ့ ‘ဝ’ တပ်ဖွဲ့ UWSA ဟာ မဟာမိတ်တွေ ဖြစ်တာကြောင့် လိုအပ်တဲ့ အကူအညီတွေ ယူတယ်လို့ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်က မဲခေါင်သတင်းဌာနနဲ့ အင်တာဗျူး တစ်ခုမှာ ပြောဆိုထားပါတယ်။
CJ – 002
#MeKongNews
#SSPP
#RCSS
#ရှမ်းတောင်
#ရှမ်းမြောက်
