မဲခေါင်၊ မေ ၃
ကချင်ပြည်နယ်၊ လိုင်ဇာမြို့မှာ ဖွင့်လှစ်ထားတဲ့ Kachin State Comprehensive University (KSCU) ပညာရပ်စုံ တက္ကသိုလ်ရဲ့ NUG ပညာရေးစနစ် အတိုင်း သင်ကြားမယ့် အချိန်ပိုင်း ရက်တို သင်တန်း ပထမ အသုတ်ကို မေလ ၁ ရက်နေ့က စတင် သင်ကြားနေပြီလို့ ကျောင်းတာဝန်ရှိသူတွေက ပြောပါတယ်။
ပညာရပ်စုံ တက္ကသိုလ်မှာ အခုဖွင့်နေတဲ့ အတန်းတွေ အကုန်လုံး ပထမနှစ်ဝက်နဲ့ ဒုတိယ နှစ်ဝက်ပေါင်း ရက်သတ္တပတ် ၃၀ (၈ လနီးပါး) ကြာ သင်ကြားမှာ ဖြစ်ပြီး လာမယ့် အောက်တိုဘာလထဲမှာ စာမေးပွဲ ကျင်းပမယ်လို့ ဆိုပါတယ်။
“NUG စနစ်နဲ့ အထက်တန်း အောင်သွားကြတဲ့ ဘယ်သူမဆို လာတက်လို့ရတယ်။ တစ်နိုင်ငံလုံးပေါ့။ မြေပြန့်ကလည်း လာလို့ရတယ်။ ဝိဇ္ဇာသမားတွေကတော့ ကျောင်းအပ်ခ ၁၃၀,၀၀၀ နဲ့ ဖောင်ဝယ်တာက ၅,၀၀၀ ကုန်မယ်။ အဝေးက လာတဲ့ သူတွေကတော့ လိုင်ဇာရဲစခန်းမှာ ရဲထောက်ခံစာ လုပ်ရတယ်။ အဲမှာလည်း တတ်နိုင်သလောက် ထည့်ပေးပေါ့။ စုစုပေါင်း ၁၅၀,၀၀၀ လောက်ကုန်မယ်” လို့ ကျောင်းတာဝန်ရှိသူ တစ်ဦးက မဲခေါင်သတင်းဌာနကို ပြောပါတယ်။
ဒါ့အပြင် အဝေးက ကျောင်းလာအပ်တဲ့ ကျောင်းသူ/သားတွေ အနေနဲ့ လိုင်ဇာမြို့ထဲက ကိုယ်နေတဲ့ ရပ်ကွက်ရဲ့ ထောက်ခံစာလည်း ပူးတွဲ တင်ပြဖို့လိုတယ်လို့ ဆိုပါတယ်။
ပထမနှစ် စတင်တက်ရောက်မယ့် ကျောင်းသားတွေ အနေနဲ့ စိတ်ပိုင်းဆိုင်ရာ စစ်ဆေးခြင်း-Psycho Test အရင်ဆုံး ဖြေဆိုပြီးမှပဲ General Education Program ရဲ့ နှစ်ဝက် ၂ ခုပေါင်း ၁၂ ဘာသာ သင်ကြားရမယ်လို့ သိရပါတယ်။
ဒါ့အပြင် နှစ်ဝက်စာမေးပွဲ ၂ ကြိမ်လုံး အောင်မြင်တဲ့ ကျောင်းသူ/သားတွေကို ၎င်းတို့ ဝါသနာပါ စိတ်ဝင်စားတဲ့ ဘာသာရပ်တွေ ဆက်လက်သင်ယူခွင့် ပြုထားတယ်လို့ ကျောင်းရဲ့ ကြေညာချက်မှာ ဖော်ပြထားပါတယ်။
ပညာရပ်စုံတက္ကသိုလ်မှာ ဝိဇ္ဇာ၊ သိပ္ပံဘာသာရပ်တွေ အပြင် ဆေးတက္ကသိုလ်လည်း ဖွင့်လှစ်ထားပြီး ဆေးကျောင်းသားတွေ ကိုတော့ KIA က ထောက်ပံ့မှု တချို့ ပေးထားတယ်လို့ သိရပါတယ်။
ဒီနှစ်ခေါ်ယူထားတဲ့ ပထမအသုတ်မှာ ပထမနှစ်၊ တတိယနှစ်တို့ ပါဝင်မှာဖြစ်ပြီး ဒုတိယနှစ်နဲ့ စတုတ္ထနှစ်ကိုတော့ လာမယ့် မေလ ၁၃ ရက်နေ့မှာ ဖွင့်လှစ်သွားမယ်လို့ သိရပါတယ်။
KSCU ပညာရပ်စုံ တက္ကသိုလ်ကို ၂၀၂၂ ခုနှစ် မေလ ၃၁ ရက်နေ့မှာ ဖွင့်လှစ်ခဲ့ပြီး ပထမဆုံးအကြိမ် ဘွဲ့နှင်းသဘင် အခမ်းအနားကို ၂၀၂၃ ခုနှစ်၊ ဖေဖော်ဝါရီလ ၂၅ ရက်နေ့က ပြုလုပ်ပြီးစီးခဲ့ပါတယ်။
အဲ့ဒီ အခမ်းအနားကို အမျိုးသား ညီညွတ်ရေး အစိုးရ-NUG ရဲ့ ပညာရေးဝန်ကြီး ဒေါက်ဇော်ဝေစိုးနဲ့ KIA စစ်ဦးစီးချုပ် ဗိုလ်ချုပ်ဂွမ်မော်တို့ ကိုယ်တိုင် တက်ရောက် ချီးမြှင့်ခဲ့ပါတယ်။
၂၀၂၃-၂၄ ပညာသင်နှစ်အတွက် သင်ယူနေတဲ့ ပထမအသုတ် ကျောင်းသား အယောက် ၃၅၀ ရှိတယ်လို့ သိရပါတယ်။
CJ – 006
#MeKongNews
#လိုင်ဇာ #KIA #KSCU #ပညာရပ်စုံတက္ကသိုလ်
