မဲခေါင်၊ မတ် ၁၉

စစ်ကိုင်းတိုင်း၊ ဆားလင်းကြီးမြို့နယ်မှာ မီးရှို့ခံရတဲ့ ကျေးရွာက ကလေးငယ် အယောက် ၂၀၀ ကို မနေ့က မတ်လ ၁၈ ရက်နေ့မှာ ပဲနို့နဲ့ ဟမ်ဘာဂါ အာဟာရဒါန ပြုခဲ့တယ်လို့ အညာပစ်တိုင်းထောင်လေးများအဖွဲ့က ပြောပါတယ်။

အခုလို လှူဒါန်းနိုင်ဖို့ အတွက် LIGHTS OF THE FUTURD-Group အနာဂါတ် အလင်းတန်းအဖွဲ့က ကူညီပေး ခဲ့တယ်လို့ သိရပါတယ်။

“မီးလောင်ပြင်က ကလေးငယ်တွေ အတွက် တတ်နိုင်သလောက် လှူဒါန်း ဖြစ်တာပါ။ အရင်ကလို ပြန်မရနိုင်တော့တဲ့ အခြေအနေမှာ ကလေးငယ်တွေ အတွက် အားအင်ဖြစ်စေဖို့ ရည်ရွယ်ချက်နဲ့ လှူဒါန်းခဲ့ပါတယ်” လို့ အညာပစ်တိုင်းထောင်လေးများအဖွဲ့ ဦးဆောင်သူက ပြောပါတယ်။

ပြီးခဲ့တဲ့ မတ် ၁၃ ရက်နေ့မှာတော့ ယင်းမာပင်မြို့နယ်ထဲက မီးရှို့ခံရတဲ့ ကျေးရွာ ၂ ရွာက အိမ်ထောင်စု ၁၅၃ စုကို မီးဖိုချောင်သုံး ပစ္စည်း တစ်အိမ်ထောင် ဒန်အိုး တစ်လုံး၊ ဇလုံ တစ်လုံး၊ ဇွန်းကြီး တစ်ချောင်း၊ သောက်ရေခွက် တစ်ခု၊ ဆန် တစ်ပြည်၊ ဆီ ၅၀ သားနဲ့၊ ငါးသေတ္တာ တစ်ဗူးနှုန်း လှူဒါန်းနိုင်ခဲ့တယ်လို့ သိရပါတယ်။

အညာပစ်တိုင်းထောင်လေးများအဖွဲ့ဟာ စစ်ကိုင်းတိုင်းထဲက မီးလောင်အိမ်ခြေ ၁,၀၉၂ လုံးကို ထောက်ပံ့ လှူဒါန်းနိုင်ခဲ့ပြီး တစ်အိမ်ထောင် အတွက် ၁၈,၀၀၀ ကျပ် ကုန်ကျတယ်လို့ သိရပါတယ်။

ကုလသမဂ္ဂ လူသားချင်း စာနာမှုဆိုင်ရာ ညှိနှိုင်းရေးရုံး UNOCHA ရဲ့ မတ်လ ၄ ရက်နေ့ ထုတ်ပြန်ချက်အရ အာဏာသိမ်းပြီး နောက်ပိုင်း စစ်ရေးပဋိပက္ခတွေကြောင့် စစ်ကိုင်းတိုင်းထဲမှာ အိုးအိမ်စွန့်ခွာ ထွက်ပြေးနေရတဲ့ ပြည်သူ ၇ သိန်းခွဲ ဝန်းကျင်ရှိနေပြီး လူသားချင်း စာနာမှုဆိုင်ရာ အကူအညီတွေ လိုအပ်နေတာပါ။

စစ်အာဏာသိမ်းပြီးနောက် မြန်မာနိုင်ငံတွင်း စစ်တပ်ရဲ့ မီးရှို့ဖျက်ဆီးမှုကြောင့် အိမ်ခြေ ၅ သောင်းခွဲကျော် မီးလောင် ဆုံးရှုံးခဲ့ရပြီး စစ်ကိုင်းတိုင်းထဲမှာ အိမ်ခြေ ၄၃,၀၀၀ ကျော် မီးလောင် ပျက်စီးသွားတယ်လို့ Data For Myanmar က ဖေဖော်ဝါရီ ၁၀ ရက်နေ့မှာ ထုတ်ပြန်ထားပါတယ်။

MK-009

#MeKongNews

#ဆားလင်းကြီးမြို့နယ်

#UNOCHA

#အညာပစ်တိုင်းထောင်လေးများ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)