မဲခေါင်၊ မတ် ၁၉
ပြီးခဲ့တဲ့ ဖေဖော်၀ါရီ နှောင်းပိုင်းကနေ လက်ရှိအချိန်ထိ ရှမ်း-ကရင်နီ နယ်စပ်မှာ ဖြစ်ပွားနေတဲ့ နမ့်နိန်းနဲ့ ဘောရန် တိုက်ပွဲတွေအတွင်း ကျဆုံးခဲ့တဲ့ ရဲဘော် ၃ ဦးအတွက် ဝမ်းနည်း ဂုဏ်ယူတယ်လို့ ကရင်နီပြည်သူ့ကာကွယ်ရေးတပ်ဖွဲ့ -KNDF က ထုတ်ပြန်ပါတယ်။
ကရင်နီ ပြည်သူ့ကာကွယ်ရေးတပ်- KNDF/B-11 က ရဲဘော် ဒေါမိနစ်တုန်ဟာ နမ့်နိန်းကျေးရွာအနီး စစ်ကောင်စီနဲ့ ဖြစ်ပွားခဲ့တဲ့ တိုက်ပွဲအတွင်း ပြင်းထန်ဒဏ်ရာရရှိခဲ့ပြီးနောက် မတ်လ ၁၃ ရက်နေ့က ကျဆုံးခဲ့ပါတယ်။
အလားတူ ဘော်ရန်တောင် တိုက်ပွဲအတွင်း KNDF/B-11 ရဲဘော် အောင်မင်းနဲ့ ရဲဘော် မင်းအောင်တို့ဟာ စစ်ကောင်စီတပ်တွေကို ခုခံတိုက်ခိုက်ရင်း မတ်လ ၁၅ ရက်မှာ ကျဆုံးခဲ့ရတယ်လို့ ဖော်ပြထားပါတယ်။
ရဲဘော်ဒေါမိနစ်တုန်၊ ရဲဘော် အောင်မင်းနဲ့ ရဲဘော်မင်းအောင် တို့ဟာ စစ်အာဏာရှင်စနစ် အမြစ်ပြတ်ချေမှုန်းရေး၊ တန်းတူအခွင့်အရေး၊ ဖက်ဒရယ် ဒီမိုကရေစီရရှိအရေး ကြိုးစားတိုက်ပွဲ၀င်ခဲ့တာကြောင့် များစွာ၀မ်းနည်းရပြီး KNDF/B-11 အနေနဲ့ သူရဲကောင်းတွေအဖြစ် မှတ်တမ်းတင် အလေးနီပြုတယ်လို့ ဆိုပါတယ်။
ပြီးခဲ့တဲ့ ဖေဖော်၀ါရီလနှောင်းပိုင်းကတည်းက စစ်ကောင်စီ၊ PNO ပအို၀်းပြည်သူ့စစ် ပူးပေါင်းအဖွဲ့တွေနဲ့ လက်ရှိချိန်ထိတိုက်ပွဲတွေ ဖြစ်ပွားနေတာကြောင့် လက်နက်ခဲယမ်း၊ စားနပ်ရိက္ခာ၊ ဆေးဝါးနဲ့ သယ်ယူပို့ဆောင်ရေးအတွက် စက်သုံးဆီတွေ အရေးပေါ် လိုအပ်နေလို့ ပြည်သူတွေ ကူညီပေးကြဖို့ ထုတ်ပြန်ချက်မှာ ဖော်ပြထားပါတယ်။
မတ်လ ၁၆ ရက်အထိ တိုက်ပွဲတွေအတွင်း စစ်ကောင်စီ၊ PNO ပူးပေါင်းတပ်ဘက်က စစ်သား ၄၅ ဦးခန့်သေပြီး လက်နက်ခဲယမ်း အများအပြားကို ပြည်သူ့ကာကွယ်ရေး ပူးပေါင်းတပ်ဖွဲ့တွေ သိမ်းဆည်းရမိခဲ့ပြီး တိုက်ပွဲတွေကတော့ ဆက်လက် ပြင်းထန်နေဆဲ ဖြစ်ပါတယ်။
MK-007
