မဲခေါင်၊ ဖေဖော်ဝါရီ ၉
ရှမ်းပြည်နယ်မြောက်ပိုင်း၊ မူဆယ်ခရိုင်၊ ကွတ်ခိုင်မြို့နယ်၊ မန်ပြိန်းကျေးရွာအုပ်စု ကောင်းခန်ရွာအနီးမှာ ဒီကနေ့ မနက်ပိုင်းက စတင်ပြီး စစ်ကောင်စီတပ်နဲ့ ကချင် လွတ်မြောက်ရေး တပ်မတော်-KIA တို့ တိုက်ပွဲ ဖြစ်ပွားနေတယ်လို့ ဒေသခံတွေက ပြောပါတယ်။
ဒီကနေ့ မနက်ပိုင်းက ပြည်ထောင်စု လမ်းမကြီးပေါ်ကနေ သိန္နီမြို့နယ်မှ ကွတ်ခိုင်မြို့ဘက် တက်လာတဲ့ စစ်ကောင်စီ ယာဉ်တန်းကို KIA တပ်ဖွဲ့မှ ကြားဖြတ် တိုက်ခိုက်ရာက တိုက်ပွဲ ပြင်းထန်ခဲ့တာလို့ ဒေသခံက ပြောပါတယ်။
“နေ့လယ်ပိုင်း အထိ ပစ်ခတ်သံတွေ ကြားနေရတယ်။ တိုက်ပွဲ ပြင်းထန်တယ်။ ခုညနေဘက် အခြေအနေတော့ မသိသေးဘူး။ ကျနော်တို့လဲ မြို့ပေါ် ရောက်နေပြီ” လို့ ဒေသခံ တစ်ဦးက ပြောပါတယ်။
လက်ရှိ ဖြစ်ပွားနေတဲ့ တိုက်ပွဲ ဖြစ်စဉ် အသေးစိတ်နဲ့ နှစ်ဘက် ထိခိုက် သေဆုံးမှုတွေကိုတော့ မဲခေါင်သတင်း အနေနဲ့ စုံစမ်းမေးမြန်းနေဆဲ ဖြစ်ပါတယ်။
မနေ့ ဖေဖေါ်ဝါရီ ၈ ရက်နေ့ကလည်း မံစီမြို့နယ်မှာ စစ်ကောင်စီတပ်နဲ့ KIA တို့ တိုက်ပွဲ ဖြစ်ပွားခဲ့ရာမှာ စစ်ကောင်စီတပ်သားတွေ သေဆုံးမှုရှိခဲ့ပြီး ဒဏ်ရာရ စစ်သားတွေကိုတော့ နမ့်ခမ်းဆေးရုံမှာ ကုသပေးနေတယ်လို့ ဒေသခံ တစ်ဦးက ဆိုပါတယ်။
ကချင်လွတ်မြောက်ရေး တပ်မတော်-KIA ဟာ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး စာချုပ်-NCA မှာ လက်မှတ် ရေးထိုးထားခြင်း မရှိတဲ့ တိုင်းရင်းသား တော်လှန်ရေး အဖွဲ့ ဖြစ်ပါတယ်။
#MeKongNews
