မဲခေါင်၊ ဇန်နဝါရီ ၃၁
ပဲခူးမြို့မှာ အာဏာသိမ်းစစ်ကောင်စီဝန်ထမ်းတွေက စည်းကမ်းသတ်မှတ်ချက်နဲ့ မညီလို့ဆိုတဲ့ အကြောင်းပြချက်နဲ့ ဆိုင်ကယ်တွေအများအပြား ဖမ်းဆီးပြီး ဖေဖော်ဝါရီလ ၁ရက် မနက် ၁၀နာရီမှာ တရားရုံးမှာ လာရွေးခိုင်းတယ်လို့ ပဲခူးဒေသခံတွေထံက စုံစမ်းသိရပါတယ်။
ဆိုင်ကယ်လိုင်စင်၊ လူလိုင်စင်၊ ဘတ်မှတ်မပါတာ၊ ဦးထုတ်မဆောင်းတာ စတဲ့ အကြောင်းပြချက်တွေနဲ့ ဖမ်းဆီးတာဖြစ်ပြီး အရင်လိုဒဏ်ငွေတန်းမဆောင်ခိုင်းဘဲ ဖေဖော်ဝါရီလ ၁ရက်နေ့ မနက်၁၀နာရီမှသာ ရဲစခန်းမှာ လာရွေးခိုင်းတယ်လို့ ကိုယ်တိုင်ကြုံရတဲ့ ပဲခူးမြို့ခံတစ်ဦးက ပြောပါတယ်။
“ဖမ်းတာက အရင်ကထက်လည်း နေရာစုံတယ်။ နေရာတိုင်းနီးပါးမှာ ဖမ်းတာ။ ဖမ်းပြီးတော့ ဖေဖော်ဝါရီ ၁ရက်မှ ရုံးမှာလာရွေးဖို့ ပြောတယ်။ တော်တော်ရယ်စရာကောင်းတယ်”လို့ သူက မှတ်ချက်ပေးပါတယ်။
စစ်တပ်အာဏာသိမ်းတာ ၂နှစ်ပြည့်တဲ့ ဖေဖော်ဝါရီလ ၁ရက်မှာ အသံတိတ်သပိတ်လုပ်ဖို့ တော်လှန်ရေးအင်အားစုတွေက တိုက်တွန်းထားပြီးစစ်ကောင်စီက ဒါက အထမမြောက်အောင် နည်းမျိုးစုံနဲ့ လုပ်ဆောင်နေတာဖြစ်တယ်လို့ အဲဒီဒေသခံက ဆက်ပြောပါတယ်။
ဒါ့အပြင် ဈေးဆိုင်တွေ၊ စတိုးဆိုင်တွေကိုလည်း ဖေဖော်ဝါရီလ ၁ရက်မှာ မပိတ်ဖို့နဲ့ ပိတ်ရင် အရေးယူမယ်ဆိုတဲ့အကြောင်း ခြိမ်းခြောက်လက်မှတ်ထိုးခိုင်းတာတွေရှိတယ်လို့ ပဲခူးမြို့က ဈေးဆိုင်ပိုင်ရှင်တစ်ဦးက ပြောပါတယ်။
“ဆိုင်မထွက်ရင်ဖမ်းမယ်၊ ဒဏ်ငွေပေးရမယ်ဆိုပြီးတော့လည်း ခြိမ်းခြောက်တယ်။ ဇိုင်းကနိုင်းတောင်ပိုင်းနဲ့ မြောက်ပိုင်း လမ်းမတန်းပေါ်က ဆိုင်ခန်းတွေရော၊ မင်းလမ်းမပေါ်က ဆိုင်ခန်းတွေရော၊ ဈေးကြီးထဲက ဆိုင်ခန်းတွေရော၊ လမ်းတန်းပေါ်က ဆိုင်တော်တော်များများကို လက်မှတ်ထိုးခိုင်းတယ်” လို့ သူက ပြောပါတယ်။
ပြီးခဲ့တဲ့ ၂၀၂၂ခုနှစ် ဖေဖော်ဝါရီလ ၁ရက်ကလည်း စစ်တပ်အာဏာသိမ်းတစ်နှစ်ပြည့်အဖြစ် အသံတိတ်သပိတ် – Silent Strike ပြုလုပ်ကြရမှာ တစ်နိုင်ငံလုံးနီးပါး တိတ်ဆိတ်သွားတဲ့အတွက် နိုင်ငံတကာသတင်းတွေမှာပါ အရေးတယူပြောရတဲ့အထိ ဖြစ်ခဲ့ပါတယ်။
အဲဒီတုန်းကလည်း အာဏာသိမ်းစစ်ကောင်စီက အသံတိတ်သပိတ် မလုပ်ဖို့ အတင်းအကြပ်ဖိအားပေးခြိမ်းခြောက်နေတဲ့ ကြားက ပြည်သူတွေဟာ တခဲနက်ပူးပေါင်းပါဝင်ခဲ့တာ ဖြစ်ပါတယ်။
#MeKongNews
