မဲခေါင်၊ အောက်တိုဘာ ၁
စစ်ကောင်စီသည် ဒေသကွပ်ကဲရေးမှူး (လွိုင်ကော်) ဖြစ်သူ ဗိုလ်မှူးချုပ် ဝေလင်းအောင် (DSA 42) အား အရှေ့အလယ်ပိုင်းတိုင်းစစ်ဌာနချုပ် (ရလခ) ၏ တိုင်းမှူးအဖြစ် တိုးမြှင့်ခန့်အပ်လိုက်ကြောင်း သိရသည်။
အလားတူ ခိုလန်မြို့ရှိ တိုင်းစစ်ဌာနချုပ်နေရာတွင် ဒေသကွပ်ကဲမှုစစ်ဌာနချုပ် (ဒကစ/ခိုလမ်) အဖြစ် ပြောင်းလဲဖွင့်လှစ်လိုက်ပြီး ဒကစမှူးအဖြစ် ယခင် ဒုတိုင်းမှူးဖြစ်သူ ဗိုလ်မှူးကြီး အောင်ကျော်သက်(အလုပ်သင် ၂၅)ကို ပြန်လည်ခန့်အပ်ထားကြောင်း သိရသည်။
ထိုသို့ ပြင်ဆင်ဖွဲ့စည်းမှုများသည် ရှမ်းပြည်နယ်အတွင်းမှ အဆင့်ဆင့် ခွာစစ်ဆင်လာရခြင်း ဖြစ်ကြောင်း စစ်ရေးလေ့လာသူများက သုံးသပ်ကြသည်။
ယခု စစ်တိုင်းအဆင့် တိုးမြင့်လိုက်သည့် ဒေသကွပ်ကဲမှုစစ်ဌာနချုပ် (လွိုင်ကော်) ၏ လက်အောက်တွင် ခလရ (၅၄) – လွိုင်ကော်၊ ခလရ (၇၂) – လောပိတ၊ ခလရ (၁၃၄) – ဖားဆောင်း၊ ခလရ (၁၃၅) – ဖားဆောင်း၊ ခမရ (၃၃၇) – ဘော်လခဲ၊ ခမရ (၄၂၈) – ဖရူးဆို၊ ခမရ (၄၂၉) – ဘော်လခဲ၊ ခမရ (၄၃၀) – ဘော်လခဲ၊ ခမရ (၅၃၀) – လွိုင်လင်လေးနှင့် ခမရ (၅၃၁) – ဖရူးဆို စသည့် တပ်ရင်းများပါသည်။
စစ်တပ်၏ ကွပ်ကဲမှု အပြောင်းအလဲနှင့် ပတ် သက်၍ CDM ဗိုလ်ကြီးဇင်ယော်က “ဒေသကွပ်ကဲမှူးဆိုတာက Admin Authority (စီမံခန့်ခွဲမှု အာဏာ) ပဲရှိတယ်။ Operation Authority (စစ်ဆင်ရေး အာဏာ) မရှိဘူး။ အခု အာဏာသိမ်းပြီးမှသာ စစ်ဆင်ရေး အာဏာတွေကို လုပ်လာတာ။ အဲ့တော့ ရှမ်းအရှေ့အလယ်ပိုင်းမှာ စစ်ဆင်ရေး အာဏာ လျှော့ချလိုက်တာပေါ့။ အဓိကကတော့ ရှမ်းအဖွဲ့တွေဖြစ်တဲ့ UWSA၊ RCSS၊ SSPP စတဲ့ အဖွဲ့တွေကို စစ်ဆင် ရေး အနေအထား လျှော့ချလိုက်ပြီးမှ ကရင်နီဒေသမှာ Operation Command ကျင့်သုံးမှာဖြစ်လို့ Command တစ်ခု တိုးလာတဲ့ အနေအထားပါပဲ” ဟု ပြောသည်။
ဆက်လက်၍ ၎င်းက “ရှမ်းပြည်မှာ စစ်ဆင်ရေးအာဏာ လျှော့လိုက်ပေမဲ့ ကရင်နီနဲ့ နေပြည် တော် ဆက်စပ်နယ်မြေတွေမှာ စစ်ဆင်ရေးအာဏာကို ပိုပြီးတော့ သုံးလာမယ်၊ ထိုးစစ်တွေ လုပ်လာမယ်။ အဓိကကတော့ ကရင်နီ၊ ကရင်၊ သံတောင်၊ မြောင်းမြ (သို့မဟုတ် မြောင်းပိုင်း) နဲ့ စစ်တောင်းမြစ်ဝှမ်း ဒေသတွေကို ထိုးစစ်ဆင်နိုင်တယ်” ဟု သုံးသပ်ပြောကြားသည်။
အခြား စစ်ရေးလေ့လာသူ တစ်ဦးကလည်း စစ်ကောင်စီသည် ရှမ်းပြည်အလယ်ပိုင်းတွင် စစ်ရေး လျှော့ချလိုက်ပြီး နေပြည်တော်၏ ဝင်ပေါက်ဖြစ်သော ကရင်နီဒေသကို ပအိုဝ်းအထူးဒေသ (၆) နယ်မြေနှင့် တွဲဖက်ကာ ကာကွယ်မှု ပြုလုပ်ခြင်းဖြစ်ကြောင်း၊ ရှမ်းတောင်နယ်မြေနှင့် ဆက်စပ်၍ စစ်ရေးနှင့် လုံခြုံရေး အဆင့်မြှင့်တင်မှုများ ပြုလုပ်လာခြင်းကြောင့် ရှမ်းတောင်နှင့် ကရင်နီဒေသများတွင် တိုက်ပွဲများ ပိုမိုပြင်းထန်လာနိုင်ကြောင်း သုံးသပ်ထားသည်။
ယခု ရလခနှင့် တွဲဖက်၍ ဖယ်ခုံအခြေစိုက် အမှတ် (၇) စစ်ဆင်ရေးကွပ်ကဲမှုဌာနချုပ် (စကခ-၇) လက်အောက်မှ ခလရ (၁၀၂) – ငွေတောင်၊ ခလရ (၂၅၀) – လွိုင်ကော်၊ ခလရ (၂၆၁) – လွိုင်ကော်၊ ခမရ (၃၃၆) – ဖယ်ခုံ၊ ခမရ (၄၂၁) – ဖယ်ခုံ၊ ခမရ (၄၂၃) – ဆီဆိုင်၊ ခမရ (၄၂၄) – ဆီဆိုင်၊ ခမရ (၄၂၅) – ဘန်းယဉ်၊ ခမရ (၄၂၆) – ဘန်းယဉ်နှင့် ခမရ (၄၂၇) ငွေတောင် တပ်ရင်းများမှ ကရင်နီနှင့်ရှမ်းတောင်ကို စစ်ရေးအကူအညီအဖြစ် လုပ်ဆောင်မည်ဟု ခန့်မှန်းသည်။
၎င်းအပြင် ရပခ လက်အောက်ခံ မိုးဗြဲအခြေ စိုက် ခမရ ၄၂၂ မှလည်း ပစ်ကူ၊ စစ်ကူ လုပ်ဆောင်နေမည်ဖြစ်သည်ဟုဆိုသည်။
ကရင်နီပြည်ရှိ တော်လှန်ရေးတပ်များမှာ လွိုင်ကော်၌KNDF၊ KA၊ Loikaw PDF နှင့် ပူးပေါင်းတပ်များ၊ ဒီမော့ဆို၌ KNDF၊ DMO-PDF၊ KA နှင့် မဟာမိတ်များ၊ ဖရူဆို၌ KNDF၊ KA၊ Hpruso/ဒေသခံတပ်များ ဘောလခဲ၌ KNDF၊ Bawlakhe PDF၊ KA/KNSO ဆက်စပ်တပ်များ၊ ဖားဆောင်း၌ KNDF၊ ဒေသခံတော်လှန်ရေးတပ်များ၊ မယ်စဲ့၌ KNDF၊ KNPLF/KPLA၊ KA နှင့် မဟာမိတ်များ ရှိသည်။
လက်ရှိ ကရင်နီနှင့် ရှမ်းတောင်ဒေသတွင် တော်လှန်ရေးတပ်များဘက်မှ အဓိကဆက်စပ်တပ်ဖွဲ့များမှာ မိုးဗြဲ၌ KNDF ဗျူဟာ (၁)၊ ဗျူဟာ (၈)၊ PDF/Local Forces၊ ဖယ်ခုံ၌ KNDF BO-3၊ BO-11 နှင့် ဒေသခံ PDF မဟာမိတ်များ၊ ဖယ်ခုံ နှင့် ပင်လောင်းကြား KNDF BO-22 နှင့် မဟာမိတ် PDF များ၊ ပင်လောင်း KNDF ဗျူဟာ (၈) နှင့် ၎င်းအောက် တပ်ဖွဲ့များ၊ ပေါင်းလောင်း၌ KNDF BO-24 နှင့် ဆက်စပ် ဒေသခံတော်လှန်ရေးတပ်များ၊ မိုးဗြဲ–ဖယ်ခုံ–ကရင်နီနယ်စပ်၌ အမှတ် (၁) အယ်လ်ဖာစစ်ဒေသအဖြစ် ပူးပေါင်းဖွဲ့စည်းထားသော တပ်ဖွဲ့များ က စစ်ကောင်စီ ကို တော်လှန်တိုက်ခိုက် လျက်ရှိသည်။
#MeKongNews
#လွိုင်ကော်
#ရလခ
#ရှမ်းအလယ်
#ကရင်နီ
#နေပြည်တော်
