မဲခေါင်၊ ဇွန် ၁၂
စစ်ကောင်စီနှင့် PNO – ပြည်သူ့စစ်က ပြီးခဲ့သည့် မတ် ၃၀ ရက်တွင် ဖမ်းဆီးသွားသည့် မြေသိမ်းခံ ဟိုပုံးမြို့နယ် ညောင်ဗက်ရွာ ရွာသူကြီးနှင့်အသက် ၁၅ နှစ် ကလေးတစ်ဦးအပါအဝင် ဒေသခံ ၄ ဦးကို စစ်ကောင်စီတရားရုံးက ထောင်ဒဏ်ချမှတ်လိုက်သည်ဟု သတင်းရင်းမြစ်များက ပြောသည်။
ဟိုပုံးမြို့နယ်၊ ညောင်ဗက်ကျေးရွာအား ဖျက်သိမ်းပေးမည်ဟု လက်မှတ်ထိုးမှ ဖမ်းထားသူများကို ပြန်လွှတ်ပေးမည် ဖြစ်ကြောင်း PNO တပ်ဖွဲ့ဝင် မြေပွဲစားများက ဖိအားပေးခြိမ်းခြောက်သဖြင့် လက်မှတ်ထိုးပေးခဲ့သော်လည်း ဖမ်းဆီးခံရသည့် ဒေသခံများအနက် ၆ ဦးသာ ပြန်လွတ်လာပြီး ရွာသူကြီးအပါအဝင် ၄ ဦးမှာ ဟိုပုံးတရားရုံးတွင် တရားစွဲဆိုထောင်ချခြင်း ခံလိုက်ရသည်ဟု သတင်းရင်းမြစ်တစ်ဦးက ပြောသည်။
“တရားမဝင် ဆန္ဒပြတာ၊ တာဝန်ရှိသူကို အာခံတာ နယ်မြေကျူးကျော်တာတွေကို လုပ်လို့တဲ့။ အမှန်က သူတို့ပြောတဲ့ဟာတွေကို ရွာသားတွေ တခုမှ မလုပ်ရဘူး၊ PNO နဲ့ စစ်တပ်ပဲလုပ်တာလေ။ သူတို့က ငါတို့ရွာ ငါတို့မြေကို လာသိမ်းတာလေ၊ ထောင်ချခံရတဲ့ ဖြားကျော်ရဲ့တူတစ်ယောက်ဆို အသက် ၁၅ နှစ်ပဲရှိသေးတာ။ ကလေးပဲ ရှိသေးတာကို ဖမ်းပြီး အဲ့လောက်ထိလုပ်တယ်တဲ့ စိတ်နာလိုက်တာ”ဟု ဒေသခံ သတင်းရင်းမြစ်တဦးက ပြောသည်။
စစ်ကောင်စီနှင့်PNO ဖမ်းဆီးပြီး ထောင်ချခံရသည့်သူများမှာ ညောင်ဗက်ရွာသူကြီး ဖြားခွန်ထီး၊ ဖြားခွန်ကျော်နှင့် ဖြားခွန်ကျော်၏ တူတော်စပ်သူ ၂ ဦးဖြစ်သည်။
“အခုက တောင်လေးလုံးထောင်ကို ပို့လိုက်ပြီတဲ့။ ထောင်ဘယ်နှနှစ်ချလဲ မသိရသေးဘူး။ တရားရုံးချိန်းတုန်းက သွားကြည့်တာ ပေးမကြည့်ဘူး၊ ဖမ်းခံရတဲ့သူနဲ့လည်း ပေးမတွေ့ဘူး။ သူတို့၄ဦးကို ဖမ်းတုန်းက ကားတစီးကိုလည်း PNO သိမ်းသွားတာ ပြန်မပေးဘူး။ ရွာသားတွေ လက်မှတ်ထိုးပေးလည်း ပြန်မလွတ်လာဘူး။ ရွာသားတွေ ဘာမှ မလုပ်ရဲအောင် လုပ်ပြမယ်ဆိုပြီး PNO မြေပွဲစားတွေက ကြိမ်းဝါးခဲ့သလိုပဲ တကယ်လုပ်သွားတာလေ။ ပအိုဝ်းအချင်းချင်းကို အခုလိုလုပ်တာ ရင်နာလို့မဆုံးဘူးဗျာ”ဟု ဒေသခံတစ်ဦးက ပြောသည်။
ယင်းမြေယာကိစ္စနှင့်ပတ်သက်ပြီး ဒေသခံပြည်သူလူထုက PNO ပါတီကို အကူအညီ တောင်းခံခဲ့သော်လည်း ၎င်းတို့နှင့် မသက်ဆိုင်ဟု ပြောဆိုပြီး ကူညီရန် ငြင်းဆန်ခဲ့သည်ဟုလည်း ဒေသခံပြည်သူများက ပြောသည်။
“ပြောတော့ ပအိုဝ်းလူကြီးတွေတဲ့ ဆက်ကြေးတွေကျ မပျက်မကွက် ထည့်ပေးတယ်။ တပ်သားသစ်စုဆောင်းလည်း ပေးတယ်။ အခု အခက်အခဲဖြစ်တော့ အကူအညီတောင်းတာကျ သူတို့နဲ့မဆိုင်ဘူးတဲ့”ဟု ညောင်ဗက်ရွာသူတစ်ဦးက ပြောသည်။
PNO တပ်ဖွဲ့ဝင် မြေပွဲစားများ၏ ပြောကြားချက်အရ တရားစွဲထောင်ချခံရသူအနက် တစ်ဦးမှာ ထောင်ဒဏ်နှစ် ၂၀ ချမှတ်ခံရသည်ဟု ပြောသော်လည်း အတည်ပြု၍ မရသေးကြောင်း ညောင်ဗက်ရွာခံတစ်ဦးက ပြောသည်။
“မြေပွဲစားက ဖုန်းဆက်လာပြီး ကလန်ကဆန်လုပ်တဲ့ မင်းတို့ရွာသားတွေ တစ်ယောက်ကိုတော့ ထောင်နှစ်၂၀ကျသွားပြီ၊ အဲ့လိုမဖြစ်ချင်ရင် ရွာကနေ မြန်မြန်ထွက်သွားဆိုပြီး ခြိမ်းခြောက်လာတယ်။ ဒါပေမယ့် တစ်ကယ် နှစ် ၂၀ ကျတာလား ခြိမ်းခြောက်ချင်လို့ ပိုပြီးပြောတာလား တိတိကျကျမသိရသေးဘူး”ဟု ၎င်းသတင်းရင်းမြစ်က ပြောသည်။
ပြီးခဲ့သည့် မတ် ၃၀ ရက်တွင် PNO တပ်ဖွဲ့ဝင် မြေပွဲစားများဖြစ်သည့် ဦးခွန်အုန်း၊ ခွန်လကျော်၊ ခွန်မောင်ဟန်၊ ခွန်စင်ခံထွက်ပေ၊ ခွန်မောင်နီ၊ ခွန်မောင်မြတို့သည် စစ်ကောင်စီ ရဲတပ်ဖွဲ့များနှင့် PNO ပြည်သူ့စစ်များကို ခေါ်ဆောင်လာကာ ညောင်ဗက် ရွာသူကြီးအပါအဝင် ၁၀ ဦးကို ဖမ်းဆီးသွားခဲ့ခြင်း ဖြစ်သည်။
ယင်းသို့ဖမ်းဆီးပြီးနောက် ရွာအား ဖျက်သိမ်းပေးမည်ဟု လက်မှတ်ရေးထိုးမှသာလျှင် ပြန်လွတ်ပေးမည်ဖြစ်ကြောင်း ဖိအားအားပေးသဖြင့် ဒေသခံများမှာ လက်မှတ်ရေးထိုးပေးခဲ့သော်လည်း ၆ ဦးသာ ပြန်လွတ်လာပြီး ရွာသူကြီးအပါအဝင် ကျန် ၄ ဦးမှာ ထောင်ချခံလိုက်ရခြင်း ဖြစ်သည်။
ရှမ်းပြည်တောင်ပိုင်း၊ ဟိုပုံးမြို့ နောင်တောင်းဘုန်းကြီးကျောင်း တောင်ဘက်တွင်ရှိသည့် ညောင်ဗက်ကျေးရွာသည် PNO အဖွဲ့အစည်း မပေါ်ခင်ကတည်းက ရွာတည်ရှိခဲ့ရာ သက်တမ်း နှစ် ၅၀ ကျော်ပြီ ဖြစ်သည်။
သို့သော် ယင်းကျေးရွာသည် စစ်တပ်ပိုင်မြေပေါ် တည်ရှိသည်ဟုဆိုကာ ယခင်ကတည်းက ဒေသခံများကို အကြိမ်ကြိမ် နှင်ထုတ်ဖူးသည်။
PNO မြေပွဲစားများက ရွာသားများကို ပြောင်းရွှေ့ခိုင်းသည့် နေရာသည် ဘုရားဖြူကျေးရွာသားများ ပိုင်ဆိုင်သည့် မြေနေရာသာဖြစ်ပြီး ယင်းမြေနေရာကိုပြောင်ရွေ့လျှင်လည်း မြေကွက်တစ်ကွက်ကို ၂၅သိန်းမှ သိန်း၅၀ထိ ပေးသွင်းခိုင်းနေခြင်းဖြစ်သည်။
“အခုဆို သူတို့က ဟိုပုံး – နောင်တောင်းလမ်းမ အရှေ့ဘက်မှာရှိတဲ့ အိမ်တွေကို အကုန်ပြန်ဖျက်ခိုင်းနေတာ၊ အိမ်ခြေ ၂၇၀ ကျော် ၃၀၀ နီးပါးရှိတယ်။ အကုန်လုံး ဒေသခံ ပအိုဝ်းတွေကြီးပဲ”ဟု ဒေသခံတစ်ဦးက ပြောသည်။
ညောင်ဗက်ကျေးရွာ၏ မြေယာအရေးနှင့် ပတ်သက်ပြီး အကြိမ်ကြိမ် စာတင်ဖူးသော်လည်း စစ်ကောင်စီတပ်က ယင်းမြေနေရာသည် တပ်နှင့် မဆိုင်တော့ကြောင်း ၂၀၁၅ ခုနှစ်ကတည်းကပင် နိုင်ငံတော်မှတဆင့် ဒေသခံများအား ပြန်ပေးရန် PNO ပါတီက ဥက္ကဌနေရာယူပြီး ဦးဆောင်ဖွဲ့စည်းထားသည့် ပအိုဝ်း ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ကို လွှဲပြောင်းခဲ့ပြီဖြစ်ကြောင်း အကြိမ်ကြိမ် ပြန်လည် ပြောဆိုခဲ့သည်ဟု ဒေသခံများက ပြောသည်။
ဟိုပုံး – လွိုင်လင် ကားလမ်းမကြီး မြောက်ဘက်ရှိ မြေဧက ၁၄၀၀၀ ကျော်ကို စစ်တပ်က ၁၉၉၂ ခုနှစ်တွင် သိမ်းဆည်းခဲ့ပြီး ၂၀၁၅ ခုနှစ်၊ ဖေဖော်ဝါရီတွင် နိုင်ငံတော်မှတဆင့် ဒေသခံများအား ပြန်ပေးရန် ပြန်လည်အပ်နှံခဲ့သည်။
နိုင်ငံတော်မှ ဒေသခံများ လက်ဝယ်အရောက် ပြန်ပေးရန် ပအိုဝ်း ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ကို တာဝန်ပေးအပ်ခဲ့ရာ PNO ဥက္ကဌ ခွန်စံလွင် ခေါင်းဆောင်သည့် ပအိုဝ်း ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့က ဒေသခံများကို မြေပြန်မပေးပဲ မြို့ရပ်ကွက် တိုးချဲ့မည်ဟုဆိုကာ PNO ကို ပြန်ချပေးပြီး မတရား သိမ်းဆည်းခဲ့သည့် မြေဖြစ်ကြောင်း သိရသည်။
#MeKongNews
#မြေသိမ်းခံ
#ညောင်ဗက်ရွာသူကြီး
#ဒေသခံပြည်သူ
#စစ်ကောင်စီတရားရုံး
